944
27/10/2017 1917-ci ildə - Bakı Fəhlə və Əsgər Deputatları Sovetinin fövqəladə yığıncağı keçirildi. İclasın gündəliyində duran əsas məsələ hakimiyyət məsələsi idi. Bolşeviklərin kəskin etirazına baxmayaraq, menşevik-eser-daşnak bloku 168 səsə qarşı 246 səslə Bakıda ali hakimiyyət orqanı kimi İctimai Təhlükəsizlik Komitəsinin (İTK) yaradılması haqqında qərarın qəbul olunmasına müvəffəq oldu.
1924-cü ildə - Amerika tarixçisi, Yeyl Universitetinin tarix üzrə əməkdar professoru Firuz Kazımzadə (1924-2017) Moskvada anadan olmuşdur.
1929-cu ildə - Gürcüstanın azərbaycanlılar yaşayan Qarayazı bölgəsinin Dəmirçi-Həsənli kəndində kolxoz quruculuğu və sovet hakimiyyəti əleyhinə üsyan başlanıb. İsaxan Hacıbayramoğlunun başçılıq etdiyi üsyan tədricən bütün Borçalı mahalını əhatə edib. Nəticədə hökumət üsyanın yatırılması üçün bölgəyə çoxlu sayda hərbi qüvvələr yeridib. Üsyançılara qarşı hərbi əməliyyata həmin vaxt Zaqafqaziya (ZSFSR -Zaqfederasiya) təhlükəsizlik orqanlarının rəhbərlərindən olan Lavreti Beriya şəxsən komandanlıq edib. Üsyan qəddarlıqla yatırılıb və bütün fəalları güllələnib.
1931-ci ildə - Azərbaycanın bariton səsli opera müğənnisi Mürsəl Tağı oğlu Bədirov (1931-2003) Dağıstanda anadan olub.
1931-ci ildə - BDU-nun professoru, Əməkdar elm xadimi, Rusiya Pyotr Elmlər və İncəsənət Akademiyasının akademiki, Azərbaycanın “Şöhrət” ordeni ilə təltif edilmiş Cəmil Mirzə Teymur oğlu Əhmədli (1931-2010) Gədəbəy rayonunun Söyüdlü kəndində, müəllim ailəsində anadan olmuşdur. Cəmil Əhmədlinin təşəbbüsü və rəhbərliyi ilə 1969-cu ildə Azərbaycanda ilk sosioloji laboratoriya yaradılmışdır. 16 monoqrafiyanın, 400-dən artıq məqalənin müəllifi olan Cəmil Əhmədli 12 doktor, 100-ə yaxın namizəd yetirmişdir. Alim “Azərbaycan Sovet Ensiklopediyası”nda 54 məqalənin müəllifidir.
1932-ci ildə - Görkəmli bəstəkar Asəf Zeynalabdin oğlu Zeynallı (1909-1932) Bakıda ağır xəstəlikdən vəfat etmişdir.
1937-ci ildə - 1–ci dərəcəli müşavir-diplomat, ictimai xadim, H.Z.Tağıyev adına Milli mükafat laureatı, prezident təqaüdçüsü Ramiz Abutalıb oğlu Abutalıbov ziyalı ailəsində anadan olmuşdur.
1938-ci ildə - İlk azərbaycanlı pianoçulardan biri Xədicə Osman qızı Qayıbova (Müftizadə) (1893-1938) repressiyanın qurbanı olmuşdur.
1950-ci ildə - Tanınmış dirijor və pedaqoq, Azərbaycan Respublikası əməkdar incəsənət xadimi və Xalq Artisti, professor Ağaverdi Ağaəli oğlu Paşayev Bakıda anadan olub.
1952-ci ildə - Azərbaycanın Milli Qəhrəmanı, Qarabağ müharibəsi iştirakçısı Rafael Əvəz oğlu Əsədov (1952-1992) Gəncədə anadan olub.
1971-ci ildə - Azərbaycanın Milli Qəhrəmanı İqor Vladimiroviç Makayev (1971-1992) Gəncə şəhərində fəhlə ailəsində doğulmuşdur.
1992-ci ildə - Milli Məclisin qəbul etdiyi "Azərbaycan Respublikasının bayramları haqqında" Qanuna əsasən "Novruz", "Mövlud", "Qurban" və "Ramazan" (Orucluq) bayramları hər il rəsmi qeyd olunurdu.
1993-cü ildə - Erməni silahlı qüvvələrinin genişmiqyaslı hücumu nəticəsində Füzuli rayonunun Horadiz qəsəbəsi və Arazboyu kəndləri - Azərbaycan-İran sərhədinin 40 km-i işğal olunub. Cəbrayıl rayonunun Arazboyu kəndləri və Zəngilan rayonu erməni işğalçı qüvvələrinin mühasirəsinə düşüb.
1993-cü ildə - Bakıda səfərdə olan İran prezidenti Əli Əkbər Haşimi-Rəfsəncani Azərbaycan prezidenti Heydər Əliyevlə görüşdən sonra Ermənistanın təcavüzünü pisləyən bəyanat verib. İran prezidentinin Ermənistan rəhbərliyi ilə telefon danışıqlarından sonra işğalçı qüvvələrin hücumuna qısa ara verilib, Arazboyu bölgələrdə mühasirəyə alınmış əhali İran ərazisinə keçib.
1993-cü ildə - Heydər Əliyev BMT Təhlükəsizlik Şurasına müraciət edərək qurumu Ermənistanın təcavüzünü dayandırmaq üçün təcili tədbirlər görməyə çağırıb.