928
28/10/2017 1895-ci ildə - Qaçaq Nəbi Gorus qəsəbəsini öz dəstəsiylə əhatəyə almış, rus polkovnikindən əsir alınan Həcəri tələb etmişdir. Rus polkovniki Nəbinin bu tələbini yerinə yetirməyə məcbur olmuşdur.
1911-ci ildə - XX əsr Azərbaycan ədəbiyyatının görkəmli nümayəndəsi, xalq yazıçısı, dramaturq, ictimai xadim Mirzə Əjdər oğlu İbrahimov (1911-1993) anadan olub. "Gələcək gün", "Böyük dayaq" romanlarının, povest və hekayələrin, pyeslərin müəllifidir. 1950-ci illərdə Azərbaycan SSR Ali Soveti Rəyasət Heyətinin sədri, SSRİ-nin Asiya və Afrika xalqları ilə Həmrəylik Komitəsinin sədri olub, uzun müddət respublika Yazıçılar Birliyinə rəhbərlik edib.
1918-ci ildə - Azərbaycan Xalq Cümhuriyyəti Nazirlər Kabinetinin iclasında Gürcüstan hökumətinin xahişi ilə növbəti Zaqafqaziya bonlarının kəsilməsi haqqında məsələ müzakirə olundu. Azərbaycan hökuməti əlavə olaraq daha 80 milyon kağız pul kəsməyə razılıq verdi və bunun əvəzində tələb etdi ki, həm ona olan borclar ödənilsin, həm də bu valyutanın bir hissəsi respublikada qalsın. Belə şəraitdə milli valyutanın öz xüsusi pulunun yüksək kursunu qoruyub saxlamaq çox çətin idi. Xeyli zəif iqtisadi potensiala malik olan hər iki qonşu respublika sərt maliyyə siyasəti apararaq çalışırdılar ki, ixrac etdikləri mala görə ödəniş öz milli valyutaları ilə aparılsın.
1957-ci ildə - AMEA-nın müxbir üzvü, tarix elmləri doktoru, professor, Azərbaycan Respublikasının Milli Məclisinin IV və V çağırış (2010-2015; 2015-2020) deputatı, Azərbaycan Milli Elmlər Akademiyasının Qafqazşünaslıq İnstitutunun direktoru Musa Cəfər oğlu Qasımlı Yardımlı rayonunun Hamarkənd kəndində anadan olmuşdur.
1993-cü ildə - ABŞ Dövlət Departamenti Ermənistan silahlı qüvvələrinin Azərbaycana qarşı işğal əməliyyatlarının (Zəngilan, Cəbrayıl, Füzuli rayonları) genişlənməsi ilə bağlı bəyanat verib. Bəyanatda erməni qüvvələrindən BMT Təhlükəsizlik Şurasının münaqişə ilə bağlı qətnamələrinə əməl etmək, qoşunları işğal etdikləri ərazilərdən çıxarmaq tələb olunurdu. Vaşinqtonun çağırışı erməni tərəfdən saya salınmadı.
1995-ci ildə - Bakı metrosunda dəhşətli qəza baş verib. Metronun "N.Nərimanov" və "Ulduz" stansiyaları arasında sərnişin qatarında yanğının baş verməsi nəticəsində 300-dən çox insan həlak olub. Bu, dünya tarixində ən böyük metro qəzası idi. Tələfatın böyük olması qatarın tuneldə alışması və xilasetmə əməliyyatının yetərsizliyi ilə bağlı idi. Hadisədə terror əməli aşkarlanmadı və o, texniki qəza kimi qiymətləndirildi. Azərbaycanın Milli Qəhrəmanı Çingiz Adil oğlu Babayev (1964-1995) qatarda baş vermiş qəzada sərnişinlərin həyatını xilas edərkən faciəli surətdə həlak olmuşdur. Bakının Yasamal rayon qəbiristanlığında dəfn edilmişdir. Onun şərəfinə Bakı Metrosunun “Ulduz” stansiyasında abidə kompleksi ucaldılmış, C.Naxçıvanski adına hərbi liseydə isə büstü qoyulmuşdur. Təhsil aldığı orta məktəbə və yaşadığı binanın önünə xatirə lövhəsi vurulmuşdur.