"1 NOYABR" TARIXIMIZDƏ
Ana səhifə > Xəbərlər > "1 Noyabr" tariximizdə
41    
01/11/2017

1906-cı ildə - Azərbaycanın ictimai-siyasi və ədəbi fikir tarixində önəmli rol oynamış "Füyuzat" (ərəbcə "gerçəyi dərk etmək") jur- nalı nəşrə başlayıb. Hacı Zeynalabdin Tağıyevin maliyyə yardımı ilə nəşr olunan jurnalın redaktoru Əli bəy Hüseynzadə idi. Jurnalda Məhəmməd Hadi, Mirzə Ələkbər Sabir, Hüseyn Cavid və dig- ər qabaqcıl ziyalılar çıxış edirdilər.

1907-ci ildə - Çar Rusiyasının III Dövlət Duması fəaliyyətə başlayıb. III Dumada Cənubi Qafqazın müsəlman əhalisini yalnız bir deputat, azərbaycanlı Xəlil bəy Xasməmmədov təmsil edirdi. Öncəki iki Dumadan fərqli olaraq, III Duma beşillik səlahiyyət müddətini sonadək (iyun 1912) işlədi.

1922-ci ildə - Maarif Komissarlığının kollegiyası Bakı Dövlət Türk Teatr Məktəbinin təşkil edilməsi haqqında qərar çıxartmışdı.

1923-cü ildə -Elmi-tədqiqat işləri aparmaq məqsədilə Əbdürrəhim bəy Haqverdiyevin sədrliyi ilə Azərbaycanı Tədqiq və Tətəbbö Cəmiyyəti yaradılmışdı. Bu cəmiyyət respublikanın baş elmi müəssisəsi olmuşdu.

1931-ci ildə - Görkəmli alim, akademik Ələşrəf Veysəl oğlu Məmmədov (1931-2003) Qax rayonunun İlisu kəndində anadan olmuşdur.

1939-cu ildə - Şair Məmməd Mürşüd oğlu İsmayılov Tovuz rayonunun Əsrik-Cırdaxan kəndində anadan olmuşdur.

1944-cü ildə - SSRİ Xalq Komissarları Soveti iyunun 24-də Təbrizdə Azərbaycan dilində orta məktəbin açılması haqqında qərarın qəbulundan sonra C.Ələsgərovun direktor olduğu, 36 nəfər müəllim və inzibati-təsərrüfat işçisindən ibarət bu məktəbdə dərslər başlandı.

1951-ci ildə - Görkəmli aktyor, rejissor, Əməkdar artist, Xalq artisti fəxri adlarına layiq görülmüş İsmayıl Hüseyn oğlu Hidayətzadə (1901-1951) Bakıda vəfat etmişdir.

1960-cı ildə - AMEA A.A.Bakıxanov adına Tarix İnstitutunun elmi işlər üzrə direktor müavini, “Azərbaycanın orta əsrlər tarixi” şöbəsinin aparıcı elmi işçisi, Bakı Dövlət Universitetinin Tarix fakültəsinin dosenti, Türkiyə Cümhuriyyəti Atatürk Araşdırma Mərkəzi elmi əsərlərin qiymətləndirilməsi şurasının üzvü, tarix üzrə elmlər doktoru Tofiq Hümbət oğlu Nəcəfli Füzuli rayonunun Aşağı Seyidəhmədli kəndində anadan olmuşdur.

1965-ci ildə - Azərbaycan SSR Xalq artisti adı verilmiş, “Şərəf Nişanı” ordeni və bir sıra medallarla təltif edilmiş əməkdar müəllim, xanəndə Mir Möhsün ağa Seyid İbrahim oğlu Şuşinski (1889-1965) vəfat etmişdir. 

1965-ci ildə - Azərbaycan Demokratik Respublikası parlamentinin üzvü, Azərbaycan Xalq Cümhuriyyətinin Daxili işlər naziri Mustafa bəy Nadir ağa oğlu Vəkilov (1896-1965) vəfat edib. 

1973-cü ildə - Azərbaycanın Milli qəhrəmanı Yavər Əlibala oğlu Şahbazov (1973-1995) Xaçmaz rayonunda anadan olmuşdur.

1991-ci ildə - Azərbaycan müstəqilliyini bərpa etdikdən sonra, Milli Təhlükəsizlik Nazirliyi yaranıb.

1992-ci ildə - Azərbaycanın Milli qəhrəmanı Əfqan Qaraxan oğlu Hüseynov (1963-1992) Qubadlı rayonunun Səfiyan və Quşçular kəndlərinin müdafiəsi zamanı qəhrəmancasına şəhid oldu. 

1992-ci ildə - Azərbaycanın Milli qəhrəmanı Ənvər Talış oğlu Arazov (1953-1992) noyabrın 1-dən 2-nə keçən gecə Ağdam rayonunun Sırxavənd kəndində erməni quldurları ilə qeyri-bərabər döyüşə girərək, mərdliklə həlak olmuşdur.

1993-cü ildə - Prezident Heydər Əliyevin fərmanı ilə yenidən təşkil edilmiş Azərbaycan Respublikası Müdafiə Şurasının ilk toplantısı keçirilib. Toplantıda Müdafiə Nazirliyinin rəhbər strukturlarında kadr dəyişiklikləri edilib, Nurəddin Sadıqov müdafiə məsələləri üzrə dövlət müşaviri, Nəcməddin Sadıqov müdafiə nazirinin 1-ci müavini və Baş Qərargah rəisi təyin olunub. 

1994-cü ildə - Azərbaycanla Qvatemala arasında diplomatik münasibətlər qurulub. 

1999-cu ildə - Ankarada prezident Heydər Əliyevə Atatürk Sülh Mükafatının təqdimetmə mərasimi keçirilib. Azərbaycan rəhbəri Türkiyə Cümhuriyyətinin yüksək mükafatına iki ölkə arasında dostluq əlaqələrinin inkişafı, Cənubi Qafqazda sülh və sabitlik naminə göstərdiyi xidmətlərə görə layiq görülmüşdü.

2008-ci ildə - Azərbaycanda ilk dəfə "Kənd təsərrüfatı işçiləri günü" qeyd olunub. Aqrar sahə işçilərinin peşə bayramı günü prezident İlham Əliyevin sərəncamı (9 oktyabr 2008) ilə təsis edilib. 

2012-ci ildə - Coğrafiyaşünas, coğrafiya elmləri doktoru (1968), professor (1969), Azərbaycan Milli Elmlər Akademiyasının həqiqi üzvü (1989), Azərbaycan Respublikasının əməkdar elm xadimi (2008) Budaq Əbdüləli oğlu Budaqov (1928-2012) Bakı şəhərində vəfat etmişdir.