932    

05/11/2017

1918-ci ildə - Müəssislər Məclisinə seçkilər üzrə komissiya ilk iclasında siyasi şəraitin xalq nümayəndələrinin siyasi məsələlərin həll olunmasında iştirakını tələb etdiyini nəzərə alıb "təcili olaraq sadələşdirilmiş şəkildə müvəqqəti Azərbaycan parlamenti çağırılması" qənaətinə gəldi.

1925-ci ildə - Türkoloq, filologiya elmləri doktoru, professor Elməddin Məhəmməd oğlu Əlibəyzadə (1925-2015) Oğuz rayonunun Muxas kəndində anadan olub.

1952-ci ildə - Tənqidçi, ədəbiyyatşünas, tərcüməçi, 1985-ci ildən Azərbaycan Yazıçılar Birliyinin üzvü, filologiya elmləri doktoru (1990), M.F.Axundov adına ədəbi mükafat laureatı (1988), Azərbaycanın sabiq xarici işlər naziri (1999-2004), Azərbaycanın Polşadakı fövqəladə və səlahiyyətli səfiri (2004-2010), Azərbaycanın Macarıstandakı fövqəladə və səlahiyyətli səfiri Vilayət Muxtar oğlu Quliyev Ağcabədi rayonunda anadan olub. 

1964-cü ildə - Cəsur kəşfiyyatçı Rixard Zorge (1895-1944) ölümündən sonra Sovet İttifaqı Qəhrəmanı adına layiq görülmüşdür.  

1992-ci ildə - Naxçıvanda Yeni Azərbaycan Partiyasının təşkilat komitəsinin ilk toplantısı keçirilib. Naxçıvan Muxtar Respublikası Ali Məclisinin sədri Heydər Əliyev təşkilat komitəsinin sədri seçilib. Bir qədər əvvəl (16 oktyabr 1992) ölkənin bir qrup ziyalısı Heydər Əliyevə müraciət edərək onu yeni yaradılan partiyaya liderlik etməyə çağırmışdılar. Heydər Əliyev bu çağırışa müsbət cavab vermişdi. YAP-ın təsis konfransı noyabrın 21-də Naxçıvan şəhərində keçirildi.

2000-ci ildə - Azərbaycanda Milli Məclisə növbəti seçkilər keçirilib. Seçkilər majoritar (100 yer) və proporsional (25 yer) qaydada keçirilib. Səsvermənin nəticələrinə əsasən, proporsional sistem üzrə YAP birinci (16 yer), AXCP ikinci (4 yer) olmuşdu. "Vətəndaş Həmrəyliyi" 3, Kommunist Partiyası 2 yer qazanmışdı. Müxalifətin digər partiyalarından "Müsavat", AMİP və ADP 6 faizlik keçid həddini aşa bilməmişdi. Hakim partiyanın proporsional seçki siyahısına YAP sədrinin müavini İlham Əliyev başçılıq edirdi. Majoritar sistem üzrə nəticələri elan edilən 88 dairədən əksəriyyətində (54 mandat) YAP təmsilçiləri qalib gəlmişdilər. Majoritar sistem üzrə parlamentə 30-dək bitərəf deputat seçilmiş, müxalifət bir neçə yer əldə etmişdi. 11 dairədə təkrar seçkilər elan edildi, 1 dairədə isə (Xankəndi) seçki keçirilmədi. 2001-ci ilin yanvarında keçirilən təkrar seçkilərdən sonra YAP-ın parlament fraksiyası ümumilikdə 74 nəfər təşkil etdi.  

2002-ci ildə - "Humay" mükafatı laureatı (1999), əməkdar artist (1974), xalq artisti Eldəniz Məmməd oğlu Zeynalov (1937-2002) vəfat etdi.