897    

07/11/2017

1870-ci ildə - Qafqaz canişinin qərarına əsasən, dövlət kəndliləri torpaq quruluşu haqqında "Əsasnamə" qüvvəyə mindi. "Əsasnamə"ni elan etmək üçün hər bir qəzanın mərkəzi və əhalisi daha çox olan yerlərindən həm əkinçi, həm də kəndli silklərinin müəyyən miqdarda nümayəndələrini quberniya şəhərinə çağırmaq, həm də şəxsən qubernatorun və digər yüksək vəzifəli şəxslərin iştirakı ilə bu sənədin elanı təklif olunurdu. Polisə kəndlilərin "sakitliyini" ciddi izləmək tapşırığı verilmişdi. Çar hökuməti "Əsasnamə"ni  bilavasitə yerlərdə elan etməklə qorxurdu. Noyabrın 8-də kəndli işləri üzrə quberniya divanxanaları açıldı, həmçinin barışıq vasitəçiləri (münsif) vəzifələri təsis edildi. Canişinin sərəncamı ilə kəndli işləri üzrə ibtidai sərəncamlar vermək məqsədilə təsis edilən müvəqqəti komissiyaların işləri quberniya divanxanalarının ixtiyarına keçirdi. Qəzalarda başda barışıq vasitəçiləri olmaqla barışıq şöbələri açıldı.

1923-cü ildə - Azərbaycanın Xalq artisti, 1961-ci ildən Azərbaycan Televiziya və Radiosu Estrada Orkestrinin bədii rəhbəri və baş dirijoru olmuş bir sıra estrada mahnısının, instrumental əsərlərin müəllifi Tofiq Qəzənfər oğlu Əhmədov (1923-1981) Bakıda anadan olmuşdur.

1934-cü ildə - Azərbaycanın görkəmli siyasi xadimi, diplomat, hüquqşünas, Çar Rusiyasında Birinci Dövlət Dumasının üzvü (1905), Bakıda Müsəlman Milli Şurasının Müvəqqəti İcraiyyə Komitəsinin üzvü (1917), Azərbaycan Xalq Cümhuriyyəti Parlamentinin Sədri (1918-1920) Əlimərdan bəy Ələkbər oğlu Topçubaşov (1863-1934) Paris ətrafında vəfat etmişdir. Onun məzarı Sen Klu şəhər qəbirstanlığında yerləşir.

1974-cü ildə - Azərbaycanın Milli Qəhrəmanı Əsgər Ələkbər oğlu Əliyev (1974-1995) Lənkəran rayonunun Ləj kəndində anadan olmuşdur.

1984-cü ildə - Akademik, Bitki fiziologyası sahəsində ilk azərbaycanlı elmlər doktoru, professor  Müzəffər Heydər oğlu Abutalıbov (1908-1984) Bakıda vəfat etmiş, Fəxri Xiyabanda dəfn olunmuşdur.

1992-ci ildə - Azərbaycan və Misir Ərəb Respublikası "Mədəniyyət sahəsində əməkdaşlıq haqqında Saziş" imzalamışdır.

1993-cü ildə - Azərbaycan Respublikası Argentina ilə diplomatik əlaqələr qurmuşdur.

2000-ci ildə - Avropa Şurası Nazirlər Komitəsinin 107-ci sessiyasında Azərbaycanın Avropa Şurasına üzv olmağa dəvət edilməsi barədə qətnamə qəbul edilib. Sənədə əsasən, Azərbaycana Avropa Şurası Parlament Assambleyasında 6 nəfərlik nümayəndə yeri ayrılıb. Azərbaycanın təşkilata rəsmi qəbulu 2001-ci il yanvarın 25-də gerçəkləşdi.