"9 NOYABR" TARIXIMIZDƏ
Ana səhifə > Xəbərlər > "9 Noyabr" tariximizdə
59    
09/11/2017

1918-ci ildə - Azərbaycan Xalq Cümhuriyyətinin üçrəngli (göy, qırmızı, yaşıl) bayrağı qəbul edilib. Ölkəmiz müstəqilliyini bərpa edəndən (1991) sonra Cümhuriyyətin bayrağı Azərbaycanın dövlət rəmzi kimi qəbul olundu.

1926-cı ildə - Azərbaycan Respublikasının Əməkdar rəssamı, Xalq rəsamı Davud Mehti oğlu Kazımov (1926-2015) Bakı şəhərində anadan olmuşdur.

1954-cü ildə - Azərbaycan Respublikasının Xalq artisti, bəstəkar, professor Siyavuş Əşrəf oğlu Kərimi Bakıda anadan olub.

1973-cü ildə - Azərbaycan Respublikasının Əməkdar artisti, Xalq artisti, aktoyr Rza Rüstəm oğlu Əfqanlı (Cəfərzadə) (1899-1973) Bakıda vəfat etmişdir.

1991-ci ildə - Azərbaycanın dövlət müstəqilliyi birinci olaraq Türkiyə tərəfindən tanınıb. Türkiyənin baş naziri Məsud Yılmaz tarixi qərarı telefonla Azərbaycan Nazirlər Sovetinin sədri Həsən Həsənova çatdırıb.

1993-cü ildə - Avropa Birliyi Qarabağ münaqişəsi barədə bəyanat qəbul edib. Bu, təşkilatın münaqişəyə ilk rəsmi münasibəti idi. Bəyanatda erməni qüvvələrinin işğal hərəkətinin davam etməsi pislənilir, ev-eşiyindən didərgin düşmüş əhaliyə yardım göstəriləcəyi bildirilirdi.

1994-cü ildə - Yazıçı Bayram Salman oğlu Bayramov (1918-1994) Bakıda vəfat etmiş, II Fəxri Xiyabanda dəfn olunmuşdur. O, “Azərbaycanın Xalq yazıçısı” fəxri adına layiq görülmüş, “Böyük Vətən müharibəsi”, “Qırmızı əmək bayrağı”, “Şərəf nişanı”, “Xalqlar dostluğu”, ordenləri ilə təltif edilmişdir.

1998-ci ildə - ATƏT-in Minsk qrupunun həmsədrləri Qarabağ münaqişəsinin həlli ilə bağlı "ümumi dövlət" adlı yeni planı tərəflərə təqdim ediblər. Bundan öncəki planlardan ("paket həll", "mərhələli həll") fərqli olaraq, yeni layihə beynəlxalq hüquq normalarına, Azərbaycanın ərazi bütövlüyü və suverenliyinə zidd idi, Dağlıq Qarabağın faktiki müstəqil dövlətə çevrilməsini ön görürdü. Bakı layihəni birmənalı şəkildə rədd etdi.

1999-cu ildə - Azərbaycan Respublikasının Prezidenti xüsusi Fərmanla "1999-2000-ci illərdə Azərbaycan Respublikasında aqrar islahatların dərinləşdirilməsi və kənd təsərrüfatında sahibkarlığın inkişafına kömək göstərilməsinə dair Dövlət Proqramı"nı təsdiq etdi.

2001-ci ildə - Bakıda dünya azərbaycanlılarının I qurultayı işə başlayıb. Prezident Heydər Əliyevin 23 may 2001-ci il tarixli sərəncamına əsasən keçirilən qurultayda Azərbaycan diasporunun 36 ölkədən 1150 nümayəndəsi və 900-dən çox qonaq iştirak edirdi. İki gün sürən qurultayda yekun qətnamə, dünya azərbaycanlılarına müraciət qəbul edildi. Forumda qəbul edilən qərara müvafiq olaraq 2002-ci ildə Xarici Ölkələrdə Yaşayan Azərbaycanlılarla İş üzrə Dövlət Komitəsi yaradıldı.