"18 NOYABR" TARIXIMIZDƏ
Ana səhifə > Xəbərlər > "18 Noyabr" tariximizdə
371    
17/11/2017

1910-cu ildə - Tanınmış neftçi, dövlət xadimi Süleyman Azad oğlu Vəzirov (1910-1973) anadan olmuşdur. "Azneft"in rəisi, SSRİ neft sənayesi nazirinin müavini işləyib.

1918-ci ildə - Nazirlər Şurası tərəfindən “Azərbaycan Məhkəmə Palatası haqqında Əsasnamə” təsdiq edilmişdir. F.Xoyski, X.Xasməmmədov, A.Səfikürdski, T. Makinski AXC-nin Ədliyyə nazirləri, eyni zamanda baş prokurorları olmuşlar. Olduqca mürəkkəb və ağır şəraitdə fəaliyyət göstərən AXC-nin Məhkəmə palatasında, Bakı və Gəncə dairə məhkəmələrinin tərkibində olan prokurorluq orqanları öz səlahiyyətləri daxilində böyük işlər görmüşlər.

1945-ci il noyabrın 18-dən 26-dək - Azərbaycanın böyük qəsəbə və şəhərlərində, o cümlədən Nəmin, Zəncan, Germi, Astara, Biləsuvarda, dekabrın 1-dən 19-dək Xoy, Maku, Səlmas, Marağa, Meşkinşəhr, Təbriz, Əhər, Xalxal, Ərdəbil, Kələybər, Miyandab və Urmiyədə "Hökumət qan tökülmədən irtica qüvvələrinin əlindən çıxıb xalqın əlinə keçdi".

1992-ci ildə - Azərbaycanla Gürcüstan arasında diplomatik münasibətlər qurulub.

1922-ci ildə - Azərbaycan MİK Rəyasət Heyəti qərar qəbul etdi ki, "Azərbaycan SSR-də aclığın olması və artması etiraf edilsin və bu məsələ üzrə tədbirlər hazırlansın".

1992-ci ildə - Milli Məclis Azərbaycanın BMT-nin qaçqınların statusu ilə bağlı Konvensiya və Protokoluna (28 iyul 1951 və 18 noyabr 1966-cı il) qoşulması barədə qərar qəbul edib.

1997-ci ildə - "Mədəniyyət haqqında" Azərbaycan Respublikası Qanunu qəbul edildi. Beynəlxalq Muzeylər Şurasının (İKOM), Beynəlxalq Kitabxanalar Şurasının (İFLA) Azərbaycan Milli komitələri yaradıldı.

1999-cu ildə - İstanbulun "Çırağan" sarayında Bakı-Tbilisi-Ceyhan neft kəməri layihəsi ilə bağlı tarixi sənədlər imzalanıb. Azərbaycan, Gürcüstan, Türkiyə prezidentləri H.Əliyev, E.Şevardnadze və S.Dəmirəl BTC-yə dair hökumətlərarası sazişi, üç ölkənin rəhbəri, habelə ABŞ prezidenti B.Klinton və Qazaxıstan prezidenti N.Nazarbayev layihənin dəstəklənməsinə dair "İstanbul bəyannaməsi"ni imzalayıblar.

2000-ci ildə - Bəstəkar, xalq artisti, bir çox məşhur mahnının müəllifi, çox sayda Azərbaycan filminin musiqilərinin bəstəkarı Emin Sabit oğlu Mahmudov (Emin Sabitoğlu) (1937-2000) Bakı şəhərində vəfat edib.

2002-ci ildə - NATO Parlament Assambleyasının İstanbulda keçirilən iclasında Azərbaycan Respublikası NATO PA-na assosiativ üzv qəbul olundu.

2007-ci ildə - Türkiyənin Ədirnə bölgəsindəki İpsala sərhəd-keçid məntəqəsində Türkiyə-Yunanıstan qaz kəmərinin açılış mərasimi keçirilib. Kəmərin işə salınması ilə Azərbaycan qazının Türkiyə üzərindən Yunanıstana (Avropa Birliyinə) nəqli başlayıb. Mərasimdə Azərbaycan prezidenti İ.Əliyev, Türkiyənin baş naziri R.T.Ərdoğan, Yunanıstanın baş naziri K.Karamanlis iştirak ediblər.