1020    

23/11/2017

1919-cu ildə - Azərbaycanla Ermənistan arasında ərazi mübahisələrinin sahmana salınması ilə bağlı müvəqqəti saziş imzalanıb. ABŞ diplomatlarının vasitəçiliyi ilə Tiflisdə imzalanan sənədə görə, tərəflər arasında mübahisəli məsələlər Ermənistan-Azərbaycan konfransında (dekabr 1919) həllini tapmalı idi. 1918-ci ilin 28 mayında Azərbaycan Milli Şurası İrəvan və Eçmiədzin qəzalarını Ermənistan Respublikasına güzəştə gedəndən sonra ermənilər Zəngəzur, Qarabağ və Naxçıvana da ərazi iddiası irəli sürməyə başlamışdılar. Cümhuriyyətin baş naziri N.Usubbəyli 1919-cu ilin oktyabrında Ermənistanın Bakıdakı diplomatik nümayəndəsi Q.Bekzadyanla görüşdə bu bölgələrlə bağlı heç bir güzəştin olmayacağını bəyan etmişdi.

1936-cı ildə - Yazıçı-dramaturqu, şair, tərcüməçi, pedaqoq, ictimai xadim Aqşin Əlisəttar oğlu Babayev anadan olmuşdur.

1948-ci ildə - Bəstəkar, musiqişünas-alim, publisist, dramaturq, pedaqoq və ictimai xadim, müasir Azərbaycan peşəkar musiqi sənətinin və milli operasının banisi Üzeyir bəy Əbdülhüseyn oğlu Hacıbəyov (1885-1948) Bakıda vəfat etdi. 

1993-cü ildə - Milli Şura "Müdafiə haqqında" Qanun qəbul etdi. Qanunda ordu quruculuğunda məsul vəzifəli şəxs və orqanların fəaliyyəti sistemləşdirildi, məsuliyyət sahələri dəqiqləşdirildi.

1994-cü ildə - Azərbaycanla Nikaraqua arasında diplomatik münasibətlər qurulub.

1999-cu ildə - Görkəmli teatr xadimi, Azərbaycan SSR Xalq Artisti, Dövlət Mükafatları Laureatı Leyla Ağalar qızı Bədirbəyli (1920-1999) Bakıda vəfat etdi. 

2004-cü ildə - BMT Baş Assambleyasının 59-cu sessiyasında "Azərbaycanın işğal edilmiş ərazilərində vəziyyət" adlı məsələ müzakirə olunub. İclasda Azərbaycan XİN başçısı Elmar Məmmədyarov Ermənistanın işğal etdiyi ərazilərdə həyata keçirdiyi məskunlaşdırma siyasəti barədə məlumat verib. Minsk qrupunun həmsədri olan ölkələrin (ABŞ, Rusiya, Fransa) BMT-dəki təmsilçiləri Azərbaycanın iradlarını qəbul etsələr də, məsələ ilə bağlı qətnamənin qəbulunda tələsməməyi tövsiyə ediblər. Nəticədə kompromis variant kimi işğal olunmuş ərazilərdəki məskunlaşdırma faktlarını araşdırmaq üçün bölgəyə ATƏT-in xüsusi missiyasının göndərilməsi (fevral 2005) qərara alınıb.