"28 NOYABR" TARIXIMIZDƏ
Ana səhifə > Xəbərlər > "28 Noyabr" tariximizdə
344    
28/11/2017

1578-ci ildə - Ağsu çayı sahilində, Mollahəsən kəndi yaxınlığında Səfəvi qoşunları ilə Osmanlının müttəfiqi, Krım xanı Adil Gərayın qoşunları arasında döyüş olub. Baba bəy Qaramanlının başçılıq etdiyi Səfəvi qüvvələri qalib gəliblər, Krım xanı yaralanaraq əsir düşüb, onun qoşun hissələri isə Osmanlının nazarətindəki Dərbəndə geri çəkiliblər. Bundan öncə (9 sentyabr 1578) Səfəvilər Qanıx (Alazan) çayı sahilində Osmanlını məğlub etmişdi. Lakin sonrakı hərbi əməliyyatlar Osmanlının üstünlüyü ilə keçdi və müharibə Səfəvilərin Şimali Azərbaycanı itirməsi ilə (1590) nəticələndi.

1852-ci ildə - Şair və mütəfəkkir, maarifçi və pedaqoq Mirzə Şəfi Vazeh (1794-1852) Tiflisdə vəfat edib. 

1939-cu ildə - Əməkdar incəsənət xadimi, Azərbaycanın Xalq artisti. bəstəkar Sevda Mirzə qızı İbrahimova Bakı şəhərində anadan olmuşdur.

1944-cü ildə - Polşa ərazisində fəaliyyət göstərən "Avanqard" partizan dəstəsinin tərkibində 12 azərbaycanlı partizan 1944-cü il noyabrın 28-də A.Bubnovun rəhbərliyi ilə alman generalı Ernest Rostu əsir almışdılar. Qəzəblənmiş faşist qərargahı xalq intiqamçılarına qarşı hücuma 3 piyada batalyonu göndərmişdi. Bu döyüşdə son patronadək qəhrəmanlıqla vuruşan azərbaycanlı partizanlardan Kərim Doşqan oğlu və Əli Qarabala həlak oldular. 

1989-cu ildə - SSRİ Ali Soveti "Dağlıq Qarabağ Muxtar Vilayətində vəziyyətin normallaşdırılması tədbirləri haqqında" qərar qəbul edib. Sənədə əsasən, Dağlıq Qarabağda Moskvanın birbaşa idarəçilik forması - Xüsusi İdarə Komitəsi (1989-cu il yanvarın 12-də yaradılmışdı) ləğv olunub, onun əvəzində Respublika Təşkilat Komitəsi yaradılıb. Bundan əlavə, muxtar vilayətin Xalq Deputatları Sovetinin fəaliyyəti bərpa olunub. DQMV üzrə Təşkilat Komitəsinin rəhbəri vəzifəsinə Azərbaycan KP MK-nın 2-ci katibi Viktor Polyaniçko təyin edildi. Bakının formal tabeçiliyində olsa da, bu qurum da gerçəkdə Moskvanın nəzarətində fəaliyyət göstərirdi.

2005-ci ildə - Tanınmış ictimai xadim və alim, Qadın Problemləri üzrə Dövlət Komitəsinin sabiq sədri, Əməkdar elm xadimi, tibb elmləri doktoru, professor Zəhra Tahir qızı Quliyeva (1923-2005) vəfat etmişdir.

2006-cı ildə - MDB dövlət başçılarının Minskdə keçirilən sammiti çərçivəsində Azərbaycan və Ermənistan prezidentlərinin görüşü olub. Görüşdən sonra prezident İlham Əliyev sülh prosesinin "həlledici mərhələyə" daxil olduğunu bildirib. Lakin çox keçmədən Ermənistan rəhbərliyi parlament seçkilərini (may 2007) bəhanə edərək danışıqlarda növbəti fasilə götürdü.