"14 DEKABR" TARIXIMIZDƏ
Ana səhifə > Xəbərlər > "14 Dekabr" tariximizdə
245    
14/12/2017

1846-cı ildə - Rusiya çarı I Nikolay Cənubi Qafqazın inzibati bölgüsündə dəyişikliklər edilməsi barədə fərman verib. Fərmana əsasən, 1841-ci ildə yaradılmış Gürcüstan-İmeretiya quberniyası və Xəzər vilayəti ləğv olunub, onların əvəzində 4 quberniya - Tiflis, Kutaisi, Dərbənd və Şamaxı quberniyaları yaradılıb. Azərbaycan torpaqları Tiflis, Dərbənd və Şamaxı quberniyaları arasında bölünüb.

1908-ci ildə - Bitki fiziologyası sahəsində ilk azərbaycanlı elmlər doktoru (1944), akademik Müzəffər Heydər oğlu Abutalıbov (1908-1984) Ordubad şəhərində anadan olmuşdur.

1915-ci ildə - Görkəmli müğənni, SSRİ Xalq Artisti, SSRİ və Azərbaycan SSR Dövlət Mükafatları laureatı, Sosialist Əməyi Qəhrəmanı, Dağıstan MSSR-ın Xalq Artisti, Gürcüstan SSR-ın Əməkdar İncəsənət Xadimi, SSRİ xalq artisti Rəşid Behbudov (1915-1989) anadan olmuşdur. 

1919-cu ildə - Bakıda Azərbaycan-Ermənistan konfransı işə başlayıb. Noyabrın 23-də tərəflər arasında bağlanmış sazişə uyğun olaraq keçirilən konfrans ərazi mübahisələrinə həsr olunmuşdu. Lakin bir həftə (dekabrın 21-dək) sürən konfrans nəticəsiz bitdi. Azərbaycan heyəti (XİN başçısı F.Xoyski, daxili işlər naziri M.Hacinski) sərhəd mübahisələrinin həllində israr etsə də, erməni tərəf müxtəlif bəhanələrlə bundan yayınıb, Zəngəzur daxil olmaqla heç bir məsələdə razılıq əldə olunmayıb. Bundan bir qədər sonra (yanvar 1920) erməni qüvvələri Zəngəzurda 50-dək azərbaycanlı kəndini talan etdilər.

1927-ci ildə - Kristalloqrafiya sahəsində məşhur alim, ədəbiyyatşünas, Böyük Britaniya Kral Akademiyasının fəxri üzvü, Azərbaycan EA-nın müxbir üzvü Xudu Məmmədov (1927-1988) Ağdamın Mərzili kəndində anadan olub. Keçmiş SSRİ-də ilk dəfə "Kristalloqrafiya və kristallofizika" ixtisası üzrə namizədlik dissertasiyası müdafiə edib, bu sahədə kəşfləri dünya elmi mərkəzlərində yüksək qiymət alıb. "Naxışların yaddaşı", "Qoşa qanad" kimi populyar kitabların müəllifidir.   

1929-cu ildə - Ədəbiyyatşünas, tərcüməçi, Azərbaycan Yazıçılar Birliyinin üzvü, Gürcüstanın əməkdar mədəniyyət işçisi, filologiya elmləri doktoru, Azərbaycan Xalq Hərəkatının fəal iştirakçısı, Azərbaycan SSR Ali Sovetinin deputatı Dilarə Ələkbər qızı Əliyeva (1929-1991) Gürcüstanın Tbilisi şəhərində dəmirçi ailəsində anadan olmuşdur.

1947-ci ildə - SSRİ məkanında Ərzaq və sənaye mallarına kartoçka sistemi ləğv edildi və onların vahid dövlət pərakəndə qiymətləri ilə satışına keçildi. 

1996-cı ildə - Xəzərdə "Dan ulduzu" və "Əşrəfi" yataqlarının birgə işlədilməsi üzrə ABŞ, Səudiyyə Ərəbistanı və Yaponiya neft şirkətləri ilə ARDNŞ arasında sazişlər bağlandı. 

2015-ci ildə - Bəstəkar, Azərbaycan SSR əməkdar incəsənət xadimi, professor, Azərbaycan SSR xalq artisti, "Şöhrət" ordeni, "Humay" mükafatı laureatı Azər Hüseyn oğlu Rzayev (1930-2015) Bakı şəhərində dünyasını dəyişib.