"16 DEKABR" TARIXIMIZDƏ
Ana səhifə > Xəbərlər > "16 Dekabr" tariximizdə
258    
16/12/2017

1898-ci ildə - Azərbaycanın xalq rəssamı Qəzənfər Ələkbər oğlu Xaliqov (1898-1981) Bakı yaxınlığındakı Qobu qəsəbəsində anadan olmuşdur.

1909-cu ildə - Yazıçı, publisist, felyetonçu, Azərbaycan Yazıçılar Birliyinin üzvü, Azərbaycanın əməkdar mədəniyyət işçisi, Jurnalistlər Birliyinin "Qızıl Qələm” mükafatı laureatı Cahangir Rəcəb oğlu Gözəlov (1909-1999) Yelizavetpol (Gəncə) quberniyasının Şuşa uyezdinin (indiki Ağdam rayonu) Şıxbabalı kəndində anadan olmuşdur.

1917-ci ildə - Zaqafqaziya Komissarlığı "Dövlət, keçmiş xanədan, kilsə, monastır, hüquqi şəxslər və sahibkar torpaqlarının torpaq komitələrinə verilməsi haqqında" qanun qəbul etdi. Bu qanuna görə, kəndlilərin alacağı torpaqlar torpaq komitələrinin sərəncamına verilməli, kəndlilər isə torpağı həmin komitələrdən icarəyə götürməli idilər.

1927-ci ildə - Azərbaycan EA-nın həqiqi üzvü, 1972-1978-ci illərdə o Azərbaycan EA Tarix İnstitutunun direktoru, 1976-1990-cı illərdə Azərbaycan EA-nın vitse-prezidenti, 1975-1988-ci illərdə Azərbaycan Sovet Ensiklopediyasının Baş redaktoru, 1989-1990-cı illərdə Azərbaycan Dövlət Universitetinin rektoru, 1976-1991-ci illərdə və 1997-ci ildən 2007-ci ilədək Azərbaycan MEA Rəyasət Heyətinin üzvü Cəmil Bahadur oğlu Quliyev (1927-2010) Ağdamda anadan olub.

1934-cü ildə - Şair, Azərbaycan Yazıçılar Birliyinin üzvü, Azərbaycanın əməkdar incəsənət xadimi Tofiq Bayram (1934-1991) Bakının Əmircan kəndində anadan olmuşdur.

1935-ci ildə - Əməkdar incəsənət xadimi, Azərbaycan Bəstəkarlar İttifaqının üzvü, Bakı Musiqi Akademiyasında Tələbə Elmi Cəmiyyətinin sədri və elmi rəhbəri, Ü. Hacıbəyli adına Bakı Musiqi Akademiyasının professoru, sənətşünaslıq doktoru İmruz Məmməd Sadıx qızı Əfəndiyeva Bakıda anadan olmuşdur.

1940-cı ildə - Bəstəkar, pianoçu, caz-muğam üslubunun banisi, Azərbaycanın əməkdar incəsənət xadimi Vaqif Əziz oğlu Mustafazadə (1940 – 1979) Bakı şəhərində İçəri Şəhərdə anadan olmuşdur.

1961-ci ildə - Azərbaycanın Milli Qəhrəmanı, Qarabağ müharibəsində ilk şəhid qadın jurnalisti Salatın Əziz qızı Əsgərova (1961-1991) Bakı şəhərində ziyalı ailəsində anadan olmuşdur.

1991-ci ildə - Naxçıvan Muxtar Respublikasının Ali Məclisinin Heydər Əliyevin sədrliyi ilə keçən iclasında 31 dekabrın dünya azərbaycanlılarının həmrəylik bayramı kimi qeyd olunması barədə qərar qəbul edilib. Ali Məclis bununla bağlı qanunvericilik aktının qəbul olunması üçün ölkə parlamentinə - Ali Sovetə müraciət edib. Dekabrın 25-də Ali Sovetin Milli Şurası müraciəti nəzərə alaraq 31 dekabrın Dünya azərbaycanlılarının həmrəyliyi günü elan olunması barədə qanun qəbul etdi.

2005-ci ildə - Prezident İlham Əliyev Azərbaycan Respublikasının Müdafiə Sənayesi Nazirliyinin yaradılması haqqında sərəncam imzalayıb. Sərəncama əsasən, yeni nazirlik Dövlət Xüsusi Maşınqayırma və Konversiya Komitəsinin bazasında yaradılıb.

2005-ci ildə -  Prezident İlham Əliyevin imzaladığı sərəncamla Azərbaycan Respublikasının Fövqəladə Hallar Nazirliyi yaradılıb. Sərəncama əsasən, Dövlət Sənayedə İşlərin Təhlükəsiz Görülməsinə Nəzarət və Dağ-Mədən Nəzarəti Komitəsi, Material Ehtiyatları Komitəsi ləğv edilərək onların funksiyaları Fövqəladə Hallar Nazirliyinə verilib. Bundan əlavə, Müdafiə Nazirliyinin Mülki Müdafiə İdarəsi, DİN-in Dövlət Yanğından Mühafizə İdarəsi, Dövlət Sularda Xilasetmə Xidməti, "İzotop" kombinatı, Dövlət Tikinti və Arxitektura Komitəsinin Tikilməkdə olan Obyektlərin Birləşmiş Müdiriyyəti yeni nazirliyin tabeliyinə verilib. Ölkə başçısının 2006-cı ildə imzaladığı sərəncama əsasən, 16 dekabr Fövqəladə Hallar Nazirliyi işçilərinin peşə bayramı günü kimi qeyd edilir.  

2011-ci ildə - "Şöhrət" ordeni ilə təltif edilmiş xalq artisti Firəngiz Yusif qızı Əhmədova (1928-2011) Bakı şəhərində vəfat etmişdir.