1005
01/02/2017 1906-cı ildə - Çarın ali qərarı ilə Qafqaz diyarının vilayət və quberniyalarında Dövlət Dumasına seçkilər haqqında əsasnamənin tətbiqi qaydaları və əlavə qanunlar təsdiq edildi. "Əsasnamə" kəndlilərin seçkilərini torpaq sahiblərinin seçkiləri ilə ümumi bir quberniya seçki məclisində birləşdirərək, Qafqaz kəndlilərini dumada müstəqil təmsil olunmaqdan məhrum etdi.
1920-ci ildə - Erməni quldur dəstələri Qərbi Azərbaycandakı (indiki Ermənistan) Şuragel kəndində dəhşətli qırğın törədiblər. Kənd əhalisinin böyük hissəsi - əksəriyyəti qadın, qoca və uşaqlar olmaqla minədək insan qətlə yetirilib.
1943-cü ildə - İkinci dünya müharibəsi gedişinidə ən mühüm döyüşlərdən biri olan Stalinqrad döyüşü başa çatdı. (23 avqust 1942-ci ildə başlamışdı).
1951-ci ildə - Görkəmli kino işçisi, ssenarist Yusif Mansur oğlu Şeyxov Bakıda anadan olub.
1952-ci ildə - Azərbaycanın Milli Qəhrəmanı Akif Abbas oğlu Əkbərov (1952-1991) Cəbrayıl rayonunda anadan olub.
1971-ci ildə - Şəhid Əfrasim Alı oğlu Hacıyev Kolanı kəndində anadan olub.
1973-cü ildə - Şəhid Fikrət Allahverdi oğlu Cəbrayılov (1973-1992) İmişli rayonunun Şahverdili kəndində anadan olub.
1993-cü ildə - Görkəmli torpaqşünas alim, ictimai-siyasi xadim, kənd təsərrüfatı elmləri doktoru, professor, Azərbaycan SSR Elmlər Akademiyasının akademiki, Azərbaycan Respublikası əməkdar elm xadimi, Azərbaycan Dövlət mükafatı laureatı Həsən Əliyev (1907-1993) vəfat edib.
1994-cü ildə - Əbülfət Mürşüd oğlu Alımirzəyev (1966-1994) Horadiz qəsəbəsi istiqamətində gedən döyüşlərdə ağır yaralanaraq şəhid oldu.
1996-cı ildə - Azərbaycan gənclərinin ilk ümumrespublika forumu keçirilib. Forumda prezident Heydər Əliyev iştirak edib. Prezident Heydər Əliyevin fərmanı ilə 1997-ci ildən etibarən 2 fevral Azərbaycanda Gənclər günü kimi qeyd edilir.
2004-cü ildə - Türkiyə hökuməti Ceyhan terminalına Heydər Əliyevin adının verilməsi barədə qərar qəbul etmişdir.
2006-cı ildə - Bakıda Dünya Gömrük Təşkilatı Avropa regionu gömrük xidmətləri rəhbərlərinin beynəlxalq konfransı keçirilmişdir.