"23 DEKABR" TARIXIMIZDƏ
Ana səhifə > Xəbərlər > "23 Dekabr" tariximizdə
146    
23/12/2017

1911-ci ildə - Şərqşünas, tərcüməçi, filologiya elmləri doktoru, professor, əməkdar elm xadimi Məmməd Mübariz Əli oğlu Əlizadə (1911-1994) İranın Xamnə qəsəbəsində dəmirçi ailəsində anadan olmuşdur.

1946-cı ildə - Yazıçı-publisist, nasir, Azərbaycan Yazıçılar Birliyinin üzvü Əbülfət Misir oğlu Əhmədov (1946-1998) Ağcabədi rayonunda Salmanbəyli kəndində anadan olmuşdur.

1947-ci ildə - SSRİ Nazirlər Soveti "Ermənistan SSR-də yaşayan türk-müsəlman əhalinin Azərbaycan SSR-in Kür-Araz ovalığına köçürülməsi haqqında" 4083 saylı qərar qəbul edib. Qərarın təşəbbüskarı SSRİ Nazirlər Soveti sədrinin müavini, İ.Stalinin "sağ əli" A. Mikoyan idi. Qərara görə, türk-müsəlman əhalinin yerinə xaricdən ermənilər köçürülməli və onlar sovet dövlətinin rifahı üçün çalışmalı idilər. Qərar sərt şərtlərlə hazırlanmışdı, tarixi yurdunu, ev-eşiyini atıb köçməyə məcbur edilən insanlara ailə başına cəmi 2 ton yük (mal-qara, yataq və s.) götürməyə icazə verilirdi. Azərbaycan SSR-in rəhbəri M.Bağırovun İ.Stalinə müraciətindən sonra bu şərtləri qismən yumşaldan ikinci qərar (10 mart 1948) verildi. 1948-1953-cü illərdə 100 minə yaxın türk-müsəlman əhali Ermənistandan deportasiya edildi, Stalinin ölümündən sonra onların bir qismi geri qayıtsa da, 1988-ci ilin deportasiyası türk-müsəlman əhaliyə qarşı etnik təmizləməni başa çatdırdı.

1991-ci ildə - İsveçrə Konfederasiyası Azərbaycanın dövlət müstəqilliyini tanıyıb. İki ölkə arasında diplomatik münasibətlər 1992-ci il yanvarın 21-də quruldu.

1991-ci ildə - Ermənilər Xocalının Meşəli kəndində dinc, köməksiz əhalini gülləbaran etdi. 33 nəfər, o cümlədən 29 sakin öldürüldü, üç ailə evindəcə yandırıldı. Daşbaşı, Axullu kəndləri də işğal olundu, odlara qalandı. 1991-ci ilin axırlarında Ermənistan və Rusiya arasında "Dostluq, əməkdaşlıq və qarşılıqlı təhlükəsizlik haqqında müqavilə" imzalandı. Beynəlxalq ictimaiyyət tərəfindən, demək olar ki, heç bir müqavimətə rast gəlməyən, Rusiyanın himayəsini açıq-aşkar hiss edən erməni millətçiləri və separatçıları daha da azğınlaşdılar.

1991-ci ildə - Azərbaycanın Milli Qəhrəmanı Faiq Alış oğlu Ağayev (1969-1991) Xocalının Meşəli kəndində gedən döyüşlərdə şəhid oldu. 8 oktyabr 1992-ci ildə Azərbaycan Respublikasının Prezidenti Əbülfəz Elçibəyin 264 saylı fərmanı ilə ölümündən sonra "Azərbaycanın Milli Qəhrəmanı" adına layiq görülüb. 

2005-ci ildə - Bakı-Aktau (Qazaxıstan) reysini yerinə yetirən AN-140 sərnişin təyyarəsi Heydər Əliyev adına beynəlxalq hava limanında havaya qalxdıqdan bir neçə dəqiqə sonra qəzaya uğrayaraq Nardaran qəsəbəsi yaxınlığında, Xəzər sahilində yerə düşüb. Təyyarədə olan 18 sərnişin və 5 heyət üzvü həlak olub. Onların 15-i Azərbaycan, 8-i xarici ölkə vətəndaşları idi.