"24 DEKABR" TARIXIMIZDƏ
Ana səhifə > Xəbərlər > "24 Dekabr" tariximizdə
160    
24/12/2017

1872-ci ildə - XIX əsrin sonu, XX əsrin əvvəllərində yazıb-yaratmış Azərbaycanın görkəmli ədibi, ictimai-siyasi xadim, mollanəsrəddinçi, istedadlı publisist, milli düşüncəli, maarifpərvər ziyalılardan biri Ömər Faiq Nemanzadə (1872-1937) Ahıska (Axalsıx) qəzasının Azqur kəndində anadan olmuşdur.

1928-ci ildə - Azərbaycanın Əməkdar memarı, Azərbaycan SSR Dövlət Mükafatı laureatı, “Şöhrət” ordeni ilə təltif edilmiş “Azərbaycan Respublikası Prezidentinin fərdi təqaüdçüsü Şamil Seyfulla oğlu Fətullayev (1928-2015) Bakı şəhərində anadan olmuşdur.

1939-cu ildə - Şair, tərcüməçi, Azərbaycan Yazıçılar Birliyinin üzvü, Azərbaycan Respublikasının Əməkdar Mədəniyyət İşçisi Məmməd Muxtar oğlu Aslanov Azərbaycanın Kəlbəcər rayonunun Laçın kəndində ziyalı ailəsində anadan olmuşdur.

1939-cu ildə - Görkəmli maarif xadimi, müəllim və şair Şeyx Məhəmməd Rasizadə (1878-1939) vəfat etmişdir.

1961-ci ildə - Azərbaycan Respublikasının prezidenti İlham Heydər oğlu Əliyev Bakı şəhərində anadan olub. 1982-ci ildə Moskva Dövlət Beynəlxalq Münasibətlər İnstitutunu, 1985-ci ildə onun aspiranturasını bitirib. Tarix elmləri namizədidir. 1985-1990-cı illərdə bu təhsil ocağında dərs deyib. 1991-1994-cü illərdə biznes fəaliyyəti ilə məşğul olub. 1994-cü ildə ARDNŞ-in vitse-prezidenti, 1996-cı ildə 1-ci vitse-prezidenti təyin edilib. 1995 və 2000-ci illərdə Milli Məclisin deputatı seçilib. 1997-ci ildən Milli Olimpiya Komitəsinə rəhbərlik edir. 1999-cu ildə YAP-ın I qurultayında partiya sədrinin müavini, 2001-ci ildə 1-ci müavini seçilib. 2001-2003-cü illərdə Azərbaycanın AŞPA-dakı nümayəndə heyətinə rəhbərlik edib, AŞPA-nın vitse-prezidenti olub. 2003-cü il avqustun 4-də Azərbaycanın baş naziri təyin edilib. 2003-cü ilin 15 oktyabr seçkilərində prezident seçilib. Birinci prezidentlik müddətində bir sıra xarici ölkələrin və beynəlxalq təşkilatların yüksək təltif və fəxri adlarına, AŞPA-nın xatirə medalına layiq görülüb. 2008-ci il oktyabrın 15-də ikinci müddətə prezident seçilib.

1991-ci ildə - Latın qrafikalı Azərbaycan əlifbasının bərpa olunması haqqında Qanun qəbul edilmişdi.

1993-cü ildə - Prezident Heydər Əliyev ilk dəfə iştirak etdiyi MDB sammitində (Aşqabad) bəyanatla çıxış edərək Birlik ölkələrini Ermənistanın Azərbaycana qarşı təcavüzünə münasibət bildirməyə çağırıb. Lakin MDB ölkələri bu məsələdə obyektiv mövqe tutmaqdan yayınıblar və ötən müddətdə qurum Ermənistanın işğalçılıq siyasətinə münasibət bildirməyib. Aşqabad sammitində Azərbaycan və Ermənistan prezidentlərinin növbəti görüşü də nəticəsiz bitib.