"29 DEKABR" TARIXIMIZDƏ
Ana səhifə > Xəbərlər > "29 Dekabr" tariximizdə
108    
29/12/2017

1921-ci ildə - Xalq yazıçısı, “Şöhrət” ordenli, publisist, ədəbiyyatşünas, ictimai xadim, filologiya elmləri doktoru, professor, Azərbaycan Yazıçılar Birliyinin üzvü. Əzizə Məmməd qızı Cəfərzadə (1921-2003) Bakı şəhərində anadan olmuşdur.

1929-cu ildə - Azərbaycan Kinematoqrafçılar İttifaqının və Rəssamlar İttifaqqının üzvü, “Azərbaycanın Xalq rəssamı” fəxri adına, iki dəfə Dövlət mükafatına layiq görülmüş və “Şöhrət” ordeni ilə təltif olunmuş Kamil Nəcəf oğlu Nəcəfzadə (1929-2011) Lənkəran şəhərində doğulub.

1946-cı ildə - Şair, publisist, Azərbaycan Yazıçılar Birliyinin üzvü Nüsrət Yusif oğlu Kəsəmənli (1946-2003) Qazaх rayonunun Kalinkənd kəndində fəhlə ailəsində doğulmuşdur. 

1982-ci ildə - Nasir, Azərbaycan ədəbiyyatında detektiv janrının banisi, Azərbaycan Yazıçılar Birliyinin üzvü, “Vətən müharibəsı” (I dərəcəli), “Qırmızı ulduz” ordenləri, “Döyüşdə fərqlənməyə görə”, “Köniqsberqin alınmasına görə”, “Berlinin alınmasına görə”, “Almaniya üzərində qələbəyə görə”, “Yaponiya üzərində qələbəyə görə” medallarına layiq görülmüş Cəmşid Cabbar oğlu Əmirov (1918-1982) vəfat etmişdir.

1989-cu ildə - Cəlilabadda 1989-cu il dekabrın 8-dən fasiləsiz mitinqlər, tətillər başlanmışdı. İnzibati orqan işçiləri xalqın tərəfinə keçdi. Xalqın tələbi ilə raykomun 57 gün əvvəl təyin olunmuş birinci katibi istefa verdi. Yeni katib paytaxtdan göndərildi. Rayonda hakimiyyətə gəlmək istəyənlər yenidən adamları qızışdırdılar. Vəziyyəti nizama salmaq üçün dekabrın 27-də rayona gətirilən milis dəstələri həbslər keçirdi. Qəzəblənmiş əhali hücum edib raykomun, milisin binalarını dağıtdı, rəhbərləri döyüb qovdu. Toqquşmalarda 150-dən çox adam yaralandı. Dekabrın 29-da burada "Xalq hökuməti" adlandırılan hökumət fəaliyyətə başladı. Müvəqqəti Təşkilat Komitəsi və Milli Müdafiə Şurası yaradıldı.

1989-cu ildə - Türkiyənin ilk qadın vəkili, Beynəlxalq Qadın Hüquqşünaslar Cəmiyyətinin ilk prezidenti, Azad Fikirləri Yayma Dərnəyi və Türk-Amerikan Universitetlər Dərnəyinin təməlini qoyan Sürəyya xanım Əhməd bəy qızı Ağaoğlu (1903-1989) İstanbulda vəfat etmişdir. 2003-cü ildə Sürəyya Ağaoğlunun 100 illik yubileyinə həsr olunmuş gümüş xatirə sikkələri buraxılmışdır.

1991-ci ildə - Azərbaycan Respublikasının dövlət müstəqilliyi haqqında Konstitusiya Aktına münasibətlə bağlı referendum keçirilib. Oktyabrın 18-də Ali Sovetdə qəbul olunan tarixi sənəd respublika rəhbərliyi tərəfindən yalnız SSRİ süqut edəndən sonra ümumxalq səsverməsinə çıxarılmışdı və artıq referendum sırf formal xarakater daşıyırdı.

1998-ci ildə - Naxçıvan Muxtar Respublikasının Konstitusiyası Milli Məclis tərəfindən təsdiq edilərək qüvvəyə minib.

2000-ci ildə - Prezident Heydər Əliyev 2001-ci il, XXI əsr və III minilliyin başlaması münasibətilə Azərbaycan xalqına müraciət edib. Müraciətdə Azərbaycan xalqının qədim dövrlərdən XX əsrin sonunadək keçdiyi tarixi yol geniş təfərrüatı ilə təhlil olunur və Azərbaycanın gələcək strateji inkişaf istiqamətləri qeyd olunur.

2000-ci ildə - Azərbaycan Respublikası Dövlət Neft Fondunun Əsasnaməsi prezident tərəfindən təsdiq olunub. Qurum 2001-ci ilin yanvarından fəaliyyətə başladı.
2006-cı ildə - Azərbaycan Prezidenti İlham Əliyev Bakı şəhərində Heydər Əliyev Mərkəzinin yaradılması haqqında sərəncam imzalayıb. Mərkəzin təməlaatma mərasimi 2007-ci ilin sentyabrında keçirildi.

2006-cı ildə - Azərbaycan Prezidenti İlham Əliyevin fərmanı ilə Azərbaycan Respublikasının Dövlət Mülki Aviasiya Administrasiyası yaradılıb.   

2016-cı ildə - Azərbaycanın Milli Qəhrəmanı Çingiz Salman oğlu Qurbanov (1994-2016) Azərbaycan-Ermənistan dövlət sərhəddində ermənilərin kəşfiyyat qrupunun təxribatının qarşısını alan zaman, ermənilərin pusqusuna düşdü və şəhid oldu.