1293
05/02/2017 1828-ci ildə - Təbriz yaxınlığındakı Türkmənçay kəndində Qacar şahzadəsi Abbas Mirzə ilə Paskeviç arasında sülh danışıqları yenidən başlandı. Rusiya hökuməti Paskeviçin qarşısında şahdan Cənubi Azərbaycan ərazisinin də Rusiyaya birləşdirilməsini tələb etmək vəzifəsini qoymuşdu. Danışıqların iştirakçısı A.S.Qriboyedov da Cənubi Azərbaycan ərazisinin Rusiyaya birləşdirilməsi fikrinə tərəfdar çıxdı.
1905-ci ildə - Bakıda erməni daşnak qüvvələrinin müsəlman (türk) əhaliyə qarşı kütləvi qırğınları başlayıb. Çar Rusiyası hakim dairələrinin ölkədəki inqilab dalğasından diqqəti yayındırmaq üçün təhrik etdikləri toqquşmalar fevralın 9-dək davam etdi və erməni silahlı dəstələri mindən çox müsəlman-türkü qətlə yetirdi. Ermənilər arasında da ölənlər vardı. Bakıda bir müddət hərbi vəziyyət elan edildi, lakin erməni qüvvələrinin müsəlman əhaliyə qarşı hücumları aralıqlarla sonrakı dövrdə də (1907-ci ilədək) davam etdi.
1918-ci ildə - Zaqafqaziya Komissarlığı Qafqaz cəbhəsinin komandanı Vahib paşaya Türkiyə ilə sülh danışıqları aparmaq istədiyini bildirən teleqram göndərməyə məcbur oldu.
1923-cü ildə - AK(b)P MK katibliyi Ümumazərbaycan miqyasında uşaq baxımsızlığına qarşı mübarizə aparmaq həftəsi keçirmək, bu işi fevralın 12-də Bakıda başlamaq, sonra isə qəzalarda davam etdirmək haqqında qərar qəbul etdi. Kampaniyaya ümumi rəhbərlik üçün XKS-nin sədri Q.Musabəyovun sədrliyi ilə komissiya təsdiq edildi.
1924-cü ildə - Görkəmli aktrisa, xalq artisti Firəngiz Abbasmirzə qızı Şərifova (1924-2014) Bakıda anadan olub.
1927-ci ildə - Azərbaycan aktyoru və rejissoru, ssenari müəllifi, mətn oxuyan, filmlərin bədii rəhbəri, Azərbaycan Respublikasının xalq artisti, "Qızıl Dərviş" mükafatı laureatı Lütfi Şahbaz oğlu Məmmədbəyov (1927-2004) Ağdaşda anadan olub.
1938-ci ildə - Xalq artisti, aktyor Rafiq Əşrəf oğlu Əzimov Bakıda anadan olub.
1946-cı ildə - Hərbi - dirijor, pedaqoq, xalq artisti, Azərbaycan Respublikasının Müdafiə Nazirliyi Hərbi dəniz orkestr xidmətinin rəisi, general-mayor Yusif Yevgeniyeviç Axundzadə Bakı şəhərində anadan olub.
1946-cı ildə - fevralın 6-dan xalq qoşunları yaradılmasına başlandı. Hərbi məktəb açıldı, az müddətdə xalq qoşunları üçün 250 nəfərdən çox zabit hazırlandı.
1950-ci ildə - Məşhur xanəndə, xalq artisti Ağaxan Minaxan oğlu Abdullayev (1950-2016) Bakıda anadan olub.
1955-ci ildə - Azərbaycanın ilk maarifçi qadınlarından biri, Cəlil Məmmədquluzadənin həyat yoldaşı, tarixçi Əhməd bəy Cavanşirin qızı, xeyriyyəçi, tərcüməçi, Azərbaycan Yazıçılar İttifaqının üzvü Həmidə Əhməd bəy qızı Məmmədquluzadə (1873- 1955) vəfat edib.
1970-ci ildə - Azərbaycanın Milli Qəhrəmanı Mirəsgər Mirabdulla oğlu Seyidov (1970-1992) Babək rayonunun Qaraxanbəyli kəndində anadan olmuşdur.
1992-ci ildə - Azərbaycanla Ukrayna arasında diplomatik münasibətlər qurulub.
1995-ci ildə - Prezident Heydər Əliyevin fərmanı ilə Səfər Əbiyev Azərbaycanın müdafiə naziri təyin edilib. Dövlət başçısının digər fərmanı ilə Məmmədrəfi Məmmədov (1993-cü ilin payızında nazir təyin olunmuşdu) müdafiə naziri vəzifəsindən azad edilib.
1996-cı ildə - Prezident Heydər Əliyev sərəncamı ilə noyabrın 12-i Konstitusiya günü elan edildi.
2004-cü ildə - Prezident İlham Əliyevin Rusiyaya ilk rəsmi səfəri başlayıb. İki gün sürən səfər gedişində Azərbaycan prezidenti Rusiya rəhbərliyi ilə ikitərəfli münasibətlərin geniş spektrini müzakirə edib, bir sıra sənədlər imzalanıb.