1000    

24/05/2018

Ensiklopedik soraq kitabının birinci cildində soyadları “A” hərfi ilə başlanan 77 soydaşımız haqqında məlumat verilir

Azərbaycan Milli Elmlər Akademiyası (AMEA) Riyaziyyat və Mexanika İnstitutunun direktoru, AMEA-nın müxbir üzvü, professor Misir Mərdanov və Bakı Avrasiya Universitetinin professoru Ədalət Tahirzadənin həmmüəllifi olduğu “1920-ci ilədək ali məktəblərdə oxumuş azərbaycanlılar” ensiklopedik soraq kitabının birinci cildi işıq üzü görüb.

İnstitutdan Lib.az-a bildirilib ki, “Təhsil” nəşriyyatında çapdan çıxan 480 səhifəlik kitabın elmi redaktoru AMEA Tarix İnstitutunun direktoru, akademik Yaqub Mahmudovdur. Nəşrdə 1918-1920-ci illərdə Azərbaycan Cümhuriyyətinin ali təhsilli bütün müsəlman dövlət adamlarının sənədli tərcümeyi-halı toplu halında ictimaiyyətə təqdim edilir.

Keçmiş SSRİ dövründə 1920-ci ilədək yalnız 62 ali təhsillimizin olduğu iddia edilirdi. Bu kitab həmin iddianın puç və yalan olduğunu ifşa edir. Ensiklopedik soraq kitabı Bakı ilə yanaşı, Rusiyanın müxtəlif şəhərlərindəki mərkəzi arxivlərdə uzunmüddətli gərgin araşdırmalar və sənədlər əsasında qələmə alınıb.

Birinci cilddə soyadları “A” hərfi ilə başlanan 77 soydaşımız haqqında məlumat verilir.

Əsər geniş oxucu kütləsi üçün nəzərdə tutulub.