“8 FEVRAL” TARIXIMIZDƏ
Ana səhifə > Xəbərlər > “8 Fevral” tariximizdə
479    
07/02/2017

1265-ci ildə - Elxanilər dövlətinin qurucusu, Çingiz xanın nəvəsi, Mengü xanın və Xubilay xanın qardaşı Hülakü xan (1218-1265) vəfat etmişdir. 

1806-cı ildə - Rusiyanın Qafqazdakı işğalçı qoşunlarının komandanı, Azərbaycan torpaqlarının istilasında xüsusi amansızlıq göstərmiş general Pavel Sisianov Bakının Qala qapısı yanında qətlə yetirilib. Sisianov şəhərin təslim edilməsi barədə Bakı xanı Hüseynqulu xanla danışıqlar apararkən xanı müşayiət edən İbrahim bəy tərəfindən öldürülmüşdü. Sisianovun ölümündən sonra rus qoşunlarının hücumları xüsusilə amansızlaşdı. 1806-cı ilin oktyabrında Bakı işğal edildi, 1813-cü ildə (Gülüstan müqaviləsi) Bakı xanlığının Rusiyaya birləşdirilməsi rəsmiləşdi.

1828-ci ildə - Qacarlarla növbəti müharibə (1826-1828) gedişində Cənubi Azərbaycan torpaqlarını istila edən Rusiya qoşunları Ərdəbil şəhərini ələ keçiriblər. İşğal nəticəsində şəhərin bir çox tarixi-mədəni inciləri yağmalanmış, o cümlədən Şeyx Səfi məqbərəsindən 166 qədim əlyazma Sankt-Peterburqa aparılmışdı.

1864-cü ildə - Zaqatala üsyanının rəhbəri Hacı Murtuz ruslara təslim oldu, tezliklə Yenisey quberniyasına sürgün edildi və burada da öldü.

1881-ci ildə - Azərbaycan Cümhuriyyətinin ordusunun ilk baş qərargah rəisi, «Əsgəran savaşının qəhrəmanı» kimi tanınan general-mayor Həbib bəy Hacı Yusif oğlu Səlimov (1881-1920) İrəvanda anadan olub. 

1907-ci ildə - Təbrizdə şah rejiminə qarşı silahlı üsyan başlanıb. Qacarlar dövlətində baş verən inqilabın (1905-1911) mərkəzi Cənubi Azərbaycana, Təbrizə keçib. Bir qədər sonra Səttərxanın fədai dəstələri bütün Cənubi Azərbaycanda inqilab hakimiyyətini bərqərar etdilər.

1921-ci ildə - Bitərəf qadınların fevralın 8-dən 11-dək Bakıda keçirilən birinci qurultayında 1188 nəfər qadın nümayəndə iştirak edirdi. Nümayəndələrin milli tərkibi belə idi: Azərbaycanlılar - 41,8, ruslar -16,7, ermənilər - 13,8, başqa millətlərdən olanlar - 7,7 faiz. Qurultayın toplanmasında məqsəd Azərbaycanın zəhmətkeş qadın kütlələrini hərəkətə gətirmək və qəza qadın şöbələrinin işini təmin etmək idi. Azərbaycan tarixində qadınların ilk xüsusi qurultayı qadınların istək və arzularını müəyyənləşdirməli, onları ölkənin qarşısında duran mühüm xalq təsərrüfatı vəzifələrinin həllinə səfərbər etmək idi.

1924-cü ildə - Bakı şəhərində ilk dəfə elektrik-tramvay yolu istifadəyə verildi. Bu xətt Azneft yoluyla Dəmir Yolu Vağzalını birləşdirirdi.

1929-cu ildə - Məşhur xalq rəssamı Məmmədağa Hüseynağa oğlu Hüseynov Bakıda anadan olmuşdur.

1992-ci ildə - Şuşa rayonunun Malıbəyli və Quşçular kəndinə hücum etdilər. Kəndlərin hər ikisi bir günün içində işğal edildi, işğal nəticəsində təxminən 50 nəfər dinc sakin Ermənistan ordusu və muzdlu əsgərləri tərəfindən vəhşicəsinə öldürüldü. Yerdə qalan əhali qaçmaqla canını qurtara bildi, kəndlərin hər ikisi isə tamamilə yandırıldı.

1994-cü ildə - Prezident Heydər Əliyev Türkiyəyə ilk rəsmi səfərə gedib. Səfər gedişində ikitərəfli sazişlər imzalanmış, Azərbaycana Türkiyə biznesinin cəlb edilməsi yönündə razılaşmalar əldə edilmişdi.  

2005-ci ildə - Abşeron Milli Parkı Azərbaycan Respublikası Prezidentinin 8 fevral tarixli Sərəncamı ilə 783 hektar sahəsində, Abşeron Dövlət Təbiət Yasaqlığının bazasında yaradılmışdır.

2013-cü ildə - Azərbaycan Respublikasının ilk telekommunikasiya peyki “Azerspace-1” orbitə çıxarılmışdır.