“6 YANVAR” TARIXIMIZDƏ
Ana səhifə > Xəbərlər > “6 Yanvar” tariximizdə
457    
06/01/2017

1733-cü ildə – Səfəvi ordusu Bağdad yaxınlığında baş verən döyüşdə Osmanlı qoşunlarını məğlub edib. Tərəflər arasında imzalanan Bağdad sülh müqaviləsinə əsasən, Osmanlı dövləti 1723-1724-cü illərdən başlayaraq ələ keçirdiyi bütün Səfəvi torpaqlarını geri qaytarmağa razılıq verib. Osmanlı dövləti həmin dövrdə Şimali Azərbaycanın böyük hissəsini (Xəzəryanı ərazilərdən savayı), habelə Təbriz, Ərdəbil, Marağa, Xoy və digər Cənubi Azərbaycan ərazilərini nəzarətə götürmüşdü. 

1907-ci ildə – Xalq artisti İsmayıl Yusif oğlu Dağıstanlı (Hacıyev, 1907–1980) Qax rayonunun Zərnə kəndində doğulub.

1938-ci ildə – Tanınmış baletmeyster, Əməkdar incəsənət xadimi Yulana Yusif qızı Əlikişizadə Bakıda anadan olub.

1938-ci ildə - Azərbaycan Yazıçılar Birliyinin üzvü, görkəmli şairimiz Mikayıl Müşfiq 1937-ci ildə "xalq düşməni" ittihamı ilə həbs edilərək, 1938-cı ildə qətl edilmişdir. 

1946-cı ildə – Cənubi Azərbaycan milli hökumətinin qərarı ilə Azərbaycan dili dövlət dili elan olundu (16 dey 1324-cü il). 

1962-ci ildə – SSRİ Xalq artisti Mərziyyə Yusif qızı Davudova (1901 - 1962) vəfat edib.

1975-ci ildə - Dilçi, ədəbiyyatşünas Əhməd Cəfəroğlu (1899-1975) vəfat etdi. 

1976-cı ildə – Görkəmli bəstəkar, dirijor və musiqişünas Əfrasiyab Bədəlbəyli (1907-1976) vəfat edib.

1994-cü ildə – Qarabağda Ermənistan işğalçı qoşunları ilə müharibədə əks-hücuma keçən Azərbaycan Milli Ordusunun birləşmələri 1993-cü ilin ağır məğlubiyyətlərindən sonra ilk hərbi uğurunu qazanıb. Azərbaycan Silahlı Qüvvələrinin hissələri Füzuli rayonunun Aşağı Yağlıvənd, Kərimbəyli və Şükürbəyli kəndlərini erməni işğalından azad edib, bölgədə strateji əhəmiyyət daşıyan Horadiz qəsəbəsi tam nəzarət altına alınıb.