1045
10/02/2017 1725-ci ildə - Rusiya Xarici İşlər Kollegiyası işğal olunmuş Xəzəryanı ərazilərdə xristian əhalisinin yerləşdirilməsi barədə fərman verib. Bu, çar Rusiyasının xristianlar adı altında xüsusilə ermənilər vasitəsilə Cənubi Qafqazda möhkəmlənmək siyasətinin ilk praktik addımı idi. Çar I Pyotr sələflərinə məhz bu siyasəti vəsiyyət etmişdi.
1829-cu ildə - Rusiyanın Tehrandakı səfiri, şair Aleksandr Qriboyedov qətlə yetirilib. Türkmənçay müqaviləsindən sonra İrandan erməni əhalisinin Azərbaycana köçürülməsində iştirak edən Qriboyedov müqavilənin birinci ildönümündə bir qrup dindarın Rusiya səfirliyinə basqını zamanı öldürülmüşdü. Bu hadisədən sonra Qacar şahı Rusiya ilə münasibətləri sahmanlamaq üçün Peterburqa böyük miqdarda qızıl və daş-qaş göndərdi.
1914-cü ildə - Azərbaycan Respublikasının Xalq Artisti Rəmziyyə Osman qızı Veysəlova (1914-1993) Bakıda anadan olmuşdur.
1920-ci ildə - Azərbaycan kommunist təşkilatlarının fevralın 11-12-də Bakı şəhərində keçirilən I qurultayında Azərbaycan Kommunist Partiyası yaradıldı.
1931-ci ildə - Azərbaycanın tanınmış şairi va ictimai xadimi Rəhim bəy Mirzə Məmmədbağır oğlu Mirzəyev (Mirzə Rəhim Fəna) (1844-1931) vəfat edib.
1980-cı ildə - Şair, dramaturq, tərcüməçi, Azərbaycan Yazıçılar Birliyinin üzvü Əliağa Həsənağa oğlu Vəliyev (Əliağa Kürçaylı) (1928-1980) vəfat edib.
1981-ci ildə - Görkəmli aktyor, xalq artisti, Qırmızı Əmək Bayrağı ordeni laureatı Möhsün Sadıq oğlu (Möhsün Sənani) Cəfərov (1900-1981) Bakıda vəfat edib.
1984-cü ildə - Yevlax-Balakən dəmir yol xətti istifadəyə verilib.
1992-ci ildə - Erməni silahlı qüvvələri Şuşa rayonunun Malıbəyli və Quşçular kəndlərini işğal ediblər.
1992-ci ildə - Azərbaycan Respublikası İspaniya ilə diplomatik əlaqələr qurmuşdur.
1992-ci ildə - Azərbaycan Respublikası yenidən müstəqillik əldə etdikdən sonra ilk hərbi mətbuat orqanı kimi "Xalq Ordusu" adlanan qəzetin birinci nömrəsi çap olunmağa başlayıb.
1992-ci ildə - Konstitusiya Qanununa uyğun olaraq "Azərbaycan Respublikası Milli Bankının yaradılması haqqında" Azərbaycan Respublikası Prezidentinin fərmanı ilə Dövlət Bankının, keçmiş SSRİ Sənaye-Tikinti Bankının, SSRİ Aqrar-Sənaye Bankının Azərbaycan Respublikası bankları bazasında Azərbaycan Respublikasının Mərkəzi Bankı yaradıldı.
2000-ci ildə - Prezident Heydər Əliyev Baş Dövlət Vergi Müfəttişliyinin ləğv edilməsi, onun bazasında Vergilər Nazirliyinin yaradılması barədə fərman verib. 11 fevral vergi xidməti işçilərinin peşə bayramı günü kimi qeyd olunur.
2000-ci ildə - Azərbaycan Respublikası Surinam ilə diplomatik əlaqələr qurmuşdur.
2004-cü ildə - Prezident İlham Əliyev "Azərbaycan Respublikasının regionlarının sosial-iqtisadi inkişafı Dövlət Proqramının (2004-2008-ci illər) təsdiq edilməsi haqqında" fərman imzalayıb. Dövlət Proqramının uğurla həyata keçirilməsi nəticəsində respublikanın bölgələrinin iqtisadi mənzərəsi köklü şəkildə yaxşılaşmış, geniş aqrar-sənaye, sosial, energetika və kommunikasiya infrastrukturu yaranmış, 700 mindən çox yeni iş yerləri açılmışdır.
2009-cu ildə - Azərbaycan Müdafiə Nazirliyinin Hərbi Hava Qüvvələri və Hava Hücumundan Müdafiə Qoşunlarının komandanı general-leytenant Rail Qurban oğlu Rzayev (1945-2009) Bakıda (səhər xidməti avtomobilində işə gedərkən) qətlə yetirilib.
2012-ci ildə - Görkəmli bəstəkar, xalq artisti Elza İmaməddin qızı İbrahimova (1938-2012) Bakı şəhərində vəfat edib.
2013-cü ildə - Leytenant, Azərbaycan Hərbi Hava Qüvvələrinin zabiti Bəhruz Novruz oğlu Zeynalov (1989-2013) adı çəkilən qüvvələrə məxsus Mil Mi-17 helikopterinin Qaradağ rayonu ərazisində Xəzər dənizinə düşməsi nəticəsində faciəli şəkildə həyatını itirmişdir.