“12 FEVRAL” TARIXIMIZDƏ
Ana səhifə > Xəbərlər > “12 Fevral” tariximizdə
617    
11/02/2017

1911-ci ildə - Məşhur tarzən, xalq artisti Bəhram Məşədi Süleyman bəy oğlu Mənsurov (1911-1985) Bakı şəhərində anadan olub. 

1915-ci ildə - Sovet İttifaqı Qəhrəmanı İdris Həsən oğlu Süleymanov (1915-1986) Goranboy rayonunun Goran qəsəbəsində anadan olmuşdur. 

1919-cu ildə - Azərbaycan Cümhuriyyətində Xosrov bəy Paşa bəy oğlu Sultanov Qarabağın general-qubernatoru təyin edildi. 

1920-ci ildə - Azərbaycan Kommunist (bolşeviklər) Partiyası yaranıb. Partiyanın təsis qurultayında (11-12 fevral) qəbul olunan proqramda Xalq Cümhuriyyəti hökumətini yıxmaq üçün silahlı üsyan xətti irəli sürülüb. Bolşevik Rusiyasının siyasətini həyata keçirən AK(b)P-nin rəhbəri isə Azərbaycan xalqının qatı düşməni, erməni millətçisi Anastas Mikoyan idi.

1923-cü ildə - Şair-dramaturq, tərcüməçi, əməkdar incəsənət xadimi İslam Əhməd oğlu Səfərli (1923-1974) Naxçıvan MR-in Babək rayonunun Şəkərabad kəndində dünyaya göz açmışdır. 

1923-cü ildə - Hərbi-siyasi xadim, General-mayor Mustafa Qurban oğlu Nuriyev (1923-1982) Astraxanbazar (indiki Cəlilabad) şəhərində anadan olmuşdur. 

1928-ci ildə - AMEA-nın müxbir üzvü, AMEA A.Bakıxanov adına Tarix İnstitutunun "Azərbaycanın 1941-1945-ci illər tarixi" şöbəsinin müdiri, tarix elmləri doktoru, professor, əməkdar elm xadimi Qaraş Əli oğlu Mədətov (1928-1993) Naxçıvan MR-nın Kəngərli rayonunun Qarabağlar kəndində anadan olmuşdur.

1931-ci ildə - Rusiya İmperator ordusunun artilleriya generalı, Azərbaycan Cümhuriyyəti Parlamentinin Müstəqillər fraksiyasının üzvü, hərbi naziri, Azərbaycan SSR-in hərbi xadimi Səməd bəy Sadıx bəy oğlu Mehmandarov (1855-1931) Bakıda vəfat etmişdir.

1933-cü ildə - Məşhur heykəltəraş, əməkdar rəssam Elmira Mehralı qızı Hüseynova (1933-1995) Bakı şəhərində anadan olub.

1964-cü ildə - Azərbaycanın Milli Qəhrəmanı, Qarabağ müharibəsi şəhidi Təbriz Xəlil Rza oğlu Xəlilbəyli (1964-1992) Bakı şəhərində anadan olub.

1988-ci ildə - Azərbaycanın Dağlıq Qarabağ Muxtar Vilayətində (DQMV) ermənilərin separatçılıq çıxışları başlayıb. DQMV-nin mərkəzi Stepanakert (Xankəndi) şəhərində vilayət partiya komitəsinin binası qarşısında "miatsum" (Ermənistana "birləşmə") şüarı altında mitinq keçirilib. Bu hadisələrə faktiki hazır olmayan Azərbaycanın o vaxtkı rəhbərliyi isə Bakıda yaşayan erməniləri canlı yayıma çıxararaq onların separatçılarla həmrəy olmadıqları barədə bəyanatlarını səsləndirdi.   

2009-cu ildə - Venesiya Komissiyası Azərbaycan Konstitusiyasına təklif olunan əlavə və dəyişiklikləri araşdırmağa başlayıb.