“15 FEVRAL” TARIXIMIZDƏ
Ana səhifə > Xəbərlər > “15 Fevral” tariximizdə
648    
14/02/2017

1905-ci ildə - Çarizm tətil hərəkatına qarşı polis tədbirini gücləndirdi. Müvəqqəti Bakı general-qubernatoru vəzifəsi təsis edildi və Mixail Aleksandroviç Nakaşidze şəhərin general-qubernatoru təyin edildi. Lakin çox keçmədi ki, o, daşnakların terror aktının qurbanı oldu və mayın 11-də qətlə yetirildi.   

1914-cü ildə - Görkəmli teatr və kino aktyoru, xalq artisti Muхtar Həsən oğlu Avşarov (1914-2004) İrəvan şəhərində anadan olmuşdur. 

1917-ci ildə - Gəncədə fəhlə həyəcanları başlandı. Mahlıc istehsalı ilə məşğul olan fəhlələrin, sonra isə dəmiryolçuların başladığı tətil fevralın sonunadək davam etdi.

1934-cü ildə - Akademik, Azərbaycan Milli Aviasiya Akademiyasının rektoru, fizika-riyaziyyat elmləri doktoru Arif Paşayev anadan olmuşdur.

1949-cu ildə - Azərbaycan Respublikası xarici işlər nazirinin müavini, diplomat Mahmud Məmməd-Quliyev Gəncə şəhərində anadan olmuşdur.

1969-cu ildə - Azərbaycanın Milli Qəhrəmanı Ramazan Heybullah oğlu Çirinqov (1969-1995) Balakən rayonunun Meşəşambul kəndində anadan olmuşdur. 

1990-cı ildə - Kirov adına Bakı qazıma dəzgahları zavodunun direktoru (1943-1945), “Azneftmaş” trestinin rəhbəri (1946-1948), Azərbaycan KP MK katibinin müavini, sənaye və nəqliyyat şöbəsinin müdiri (1948-1950), Azərbaycan Nazirlər Sovetinin Dövlət Plan Komissiyasının sədri (1950-1953), Respublika  Dövlət  Plan  Komitəsi sədrinin birinci müavini (1953-1954), Azərbaycan SSR Dövlət Plan Komitəsinin sədri (1954-1963), Zaqafqaziya iqtisadi rayonunun Plan Komissiyasının  sədri (1963-1965), Azərbaycan SSR Nazirlər Soveti sədrinin birinci müavini (1965-1970), Azərbaycan SSR Nazirlər Sovetinə sədri (1970-1981) və SSRİ Nazirlər Sovetinin üzvü Əli İsmayıl oğlu İbrahimov (1913-1990) Bakı şəhərində vəfat etmişdir.

1993-cü ildə - Ermənistan ekspedisiya korpusu Rusiyanın 7-ci ordusunun 128-ci motoatıcı alayı və kazaklardan ibarət silahlı dəstənin iştirakı ilə Ağdərə istiqamətində hücuma keçdi. Fevralın 15-dən 16-na keçən gecə Ağdərə-Kəlbəcər yolu düşmən tərəfindən tutuldu.

1997-ci ildə - Amerika Birləşmiş Ştatları ATƏT-in Minsk qrupuna üçüncü (Rusiya və Fransadan sonra) həmsədr olaraq qəbul olunub. Erməni tərəfin Fransanın Minsk qrupunda ikinci həmsədr olmasında israrını davam etdirəndən sonra Azərbaycan da öz növbəsində ABŞ-ın namizədliyini irəli sürmüşdü. Nəticədə kompromis variant kimi üçlü həmsədrlik formatı qəbul olundu. O vaxtdan Qarabağ münaqişəsinin nizamlanması üzrə beynəlxalq vasitəçilik bu formatda fəaliyyət göstərir.

2008-ci ildə - Prezident İlham Əliyev "Azərbaycan Xalq Cümhuriyyətinin 90 illik yubileyi haqqında" sərəncam imzalayıb. Sərəncama əsasən, tarixi yubiley respublikada geniş şəkildə qeyd olundu, Xalq Cümhuriyyəti parlamentinin 90 illiyi münasibətilə çoxsaylı xarici ölkə nümayəndə heyətlərinin iştirakı ilə Milli Məclisin xüsusi iclası keçirildi.