“17 FEVRAL” TARIXIMIZDƏ
Ana səhifə > Xəbərlər > “17 Fevral” tariximizdə
1131    
16/02/2017

1201-ci ildə - Dünya şöhrətli azərbaycanlı alim, riyaziyatçı, astronom və filosof Nəsirəddin Tusi (1201-1274) anadan olmuşdur. Tusinin yaratdığı Marağa rəsədxanası uzun illər Asiyanın ən mötəbər elm mərkəzlərindən biri olub.

1897-ci ildə - Azərbaycanlı hərbçi, çar ordusunun podpolkovniki, Xan qızı Xurşidbanu Natəvanın övladı Mehdiqulu xan Vəfa Şuşada öz xərcinə qiraətxana açmışdır.

1909-cu ildə - Görkəmli torpaqşünas-eroziyaşünas alim, kənd təsərrüfatı elmləri doktoru, professor, AMEA müxbir üzvü Kazım Əbdülmanaf oğlu Ələkbərov (1909-1987) Bakı şəhərində anadan olmuşdur.

1919-cu ildə - Azərbaycanda Sovet dövründə Quranın yeni tərcüməsi təşəbbüskarı olmuş, həkim, şair, mətnşünas Əli Fəhmi (1919-1975) Bakının Sabunçu qəsəbəsində anadan olmuşdur.

1920-ci ildə - Dilçi-filoloq, professor Əlövsət Zakir oğlu Abdullayev (1920-1993) Şamaxı r-nunun Məlikçobanlı kədində anadan olub.

1958-ci ildə - Teatr və kino aktyoru Xeyri Osman oğlu Əmirzadə (1893-1958) Bakıda vəfat edib.

1992-ci ildə - Erməni silahlı qüvvələri Dağlıq Qarabağın Xocavənd (Martuni) rayonunda azərbaycanlıların yaşadığı Qaradağlı kəndini işğal ediblər. Bunadək kənd dəfələrlə erməni qüvvələrinin hücumlarına məruz qalmışdı. İşğal zamanı kəndin onlarla sakini öldürülüb və yaralanıb.  (Əlavə məlumat üçün kitab: Qaradağlı soyqırımı)

1992-ci ildə - Azad Həsənqulu oğlu Rüstəmov könüllü olaraq Xocavənd rayonunun Qaradağlı kəndi uğrundakı döyüşlərə qatılıb. Müharibəyə yola düşərkən cəmi 14 günlük ailə həyatı yaşayıb. Sonuncu dəfə döyüşlərin birində əsir götürüldüyü məlumdur, indiyədək cənazəsi tapılmayıb.

1992-ci ildə - Azərbaycanın Müdafiə Nazirliyinin rəhbərliyində növbəti dəyişiklik olub, Daşaltı (26 yanvar) faciəsinin günahkarı hesab edilən Təcəddin Mehdiyev müdafiə naziri vəzifəsindən azad edilib, bu vəzifənin müvəqqəti icrası nazirin 1-ci müavini, Baş Qərargah rəisi Şahin Musayevə tapşırılıb. Azərbaycanın Qarabağdakı itkilərində xüsusi "rolu" olan general Ş.Musayev 1992-ci ilin mayında Şuşanın işğalından sonra ölkədən qaçdı.   

1993-cü ildə - Azərbaycan və Rusiya hökumətləri arasında sərbəst ticarət sazişi imzalanıb.

1994-cü ildə - Aşqabadda Azərbaycan və Türkmənistan hökumətləri arasında ticarət-iqtisadi əməkdaşlıq haqqında saziş imzalanıb.  

2009-cu ildə - Amerikalı ermənişünas alim Ronald Suninin “Erməni xalqı: qədim dövrdən bu günə kimi” kitabı çapdan çıxıb. Kitabda Dağlıq Qarabağın azərbaycanlıların tarixi vətəni kimi göstərməsi ermənilərin qəzəbinə səbəb olub.