ABŞ VƏ BÖYÜK BRITANIYANIN ƏN YENI TARIXI (1918-2007-CI ILLƏR) KİTABI HAQQINDA

SSRİ-nin dağılması ilə onun tərkibinə daxil olan milli respublikalar, o cümlədən Azərbaycan müstəqillik qazandılar. Azərbaycan Respublikasının dünya sivilizasiyasına qoşulmaq imkanları genişləndi. Dünya Azərbaycanı, Azərbaycan isə dünyanı dərk etməyə başladı. Azərbaycanın qabaqcıl ölkələr səviyyəsinə yüksəlməsi üçün onun dünyanın aparıcı dövlətlərinin tarixi ilə, onların əldə etdikləri nailiyyətlərlə tanış olmağa ehtiyacı da artdı. Gənclərimizin dünya tarixinə, ilk növbədə dünyanın birinci super dövləti olan ABŞ-ın, aparıcı dövlətlərindən biri olan Böyük Britaniyanın tarixinə marağının artması fərəhləndirici hal hesab edilməlidir. Bu baxımdan bu dövlətlərin müasir tarixinin daha dərindən gənclərə öyrədilməsi xüsusi aktuallıq kəsb edir. Bütün bunları nəzərə alaraq biz «ABŞ və Böyük Britaniyanın ən yeni tarixi» mövzusunda dərs vəsaiti yazmağı və tələbələrin istifadəsinə təqdim etməyi lazım bildik. Dərs vəsaitində bu dövlətlərin 1918-ci ildən halhazıra qədərki tarixindən qısaca da olsa, bəhs etmişik. Dərs vəsaitindən ali məktəb müəllimləri və tələbələri, magistraturaya daxil olmaq istəyənlər, ümumiyyətlə, bu ölkələrin müasir tarixi ilə maraqlanan hər bir oxucu istifadə edə bilər.