1102    

24/02/2017

1830-cu ildə - Car-Balakən bölgəsindəki üsyanı yatırmaq üçün Rusiya ordusunun Qafqaz korpusunun hissələri əraziyə yeridilib. General İvan Paskeviçin rəhbərlik etdiyi qoşunlar üsyanı yatırmağa müvəffəq olsa da, bir neçə aydan sonra bölgədə yeni üsyan başlandı.

1864-cü ildə - Yazıçı, tərcüməçi, ictimai xadim Əli bəy Hüseynzadə (1864-1940) Salyanda anadan olub. Peterburq və İstanbulda ali təhsil alıb, Bakıda "Həyat" qəzetinin, daha sonra "Kaspi" qəzeti və "Füyuzat" jurnalının redaktoru olub. 1910-cu ildən ömrünün sonunadək Türkiyədə yaşayıb, İstanbul Universitetində dərs deyib. 

1881-ci ildə - Şair, yazıçı, dramaturq, publisist, pedaqoq, ədəbiyyatşünas, tərcüməçi, 1934-cü ildən Azərbaycan Yazıçılar Birliyinin üzvü, Əməkdar incəsənət xadimi Abdulla Axund Mustafa oğlu Talıbzadə (Abdulla Şaiq) (1881-1959) Tiflisdə ruhani ailəsində anadan olub. 

1886-cı ildə - Vedidə erməni-daşnak quldur dəstələrinə qarşı könüllü xalq birləşməsini təşkil etmiş Abbasqulu bəy Xanbaba bəy oğlu Şadlinski (1886-1930) İrəvan quberniyasının Böyük Vedi kəndində anadan olub. 

1921-ci ildə - Təsviri sənətinin görkəmli nümayəndəsi, xalq rəssamı, əməkdar incəsənət xadimi, Dövlət Mükafatı laureatı, Azərbaycan Respublikası Prezidentinin fərdi təqaüdçüsü  Oqtay Seyid Hüseyn oğlu Sadıqzadə (1921-2014) Xızıda anadan olub. 

1934-cü ildə - Əməkdar və xalq rəssamı Cəmil Mir Yusif oğlu Müfidzadə Bakıda anadan olub.

1991-ci ildə - Qarabağ münaqişəsi gedişində ermənilər növbəti terror aksiyası həyata keçiriblər. Laçın-Yevlax yolunda sərnişin avtobusunun partladılması nəticəsində 7 azərbaycanlı həlak olub.

1992-ci ildə - İranın xarici işlər naziri Əli Əkbər Vilayəti Qarabağ münaqişəsində ilk vasitəçilik təşəbbüsü ilə Bakıya səfərə gəlib.

1994-cü ildə - Milli Məclis "Xocalı soyqırımı günü haqqında" qərar qəbul edib. Qərarda hər il fevralın 26-nın Xocalı soyqırımı günü kimi qeyd edilməsi, bu barədə beynəlxalq təşkilatlara məlumat verilməsi nəzərdə tutulmuşdu.