1199    

03/03/2017

1460-cı ildə - Şah I İsmayılın babası Şeyx Cüneydin başçılıq etdiyi qızılbaş türkləri ilə Şirvanşah I Xəlilullahın qoşunları arasında Samur çayı sahilində döyüş baş verib. Döyüşdə qızılbaşlar məğlub oldu və Şeyx Cüneyd öldürüldü.     

1830-cu ildə - Bütünlüklə Paskeviçin bəyannaməsi əsasında hazırlanan "Car Balakən əyalətinin idarə edilməsi qaydaları "elan edildi. Əyaləti idarə etmək üçün ki, Bekoviç-Çerkassinin sədrliyi ilə müvəqqəti idarə təsis olunurdu.

1842-ci ildə - Məşhur Bakı milyonçusu, mesenat Ağa Musa Nağıyev (1842-1919) anadan olub. Bakıda 100-ə yaxın müxtəlif təyinatlı bina inşa etdirib, onların bir qismi bu gün də paytaxta gözəllik verməklə yanaşı, elm, təhsil, sosial, mədəni təyinatlı obyektlər olaraq ("İsmailiyyə" binası - MEA-nın Rəyasət Heyəti, Mərkəzi Klinik Xəstəxana və s.) fəaliyyət göstərir. Nağıyev 77 yaşında, özünün doğum günündə (4 mart) vəfat edib.

1906-cı ildə - "Nəşri-maarif" və ya "Nəşri-savad və maarif" xeyriyyə cəmiyyətinin nizamnaməsi təsdiq edilmişdir. Başlıca məqsədi Bakı şəhərində və quberniyasında yaşayan müsəlmanlar arasında elm və maarifi, xüsusilə ibtidai təhsili Azərbaycan və rus dillərində yaymaq, hər növ maarifçilik fəaliyyətini dəstəkləmək idi. 

1919-cu ildə - Şair, publisist Əliqulu Qəmküsar (Nəcəfov) (1880-1919) axşam evinə qayıdarkən menşeviklər tərəfındən öldürülmüş və Tifiisdə dəfn edilmişdir. Ə.Haqverdiyev Qəmküsarın ölümünə təəssüf hissini belə ifadə edib: “Əliqulu Nəcəfzadəyə dəyən güllə “Molla Nəsrəddin” məcmuəsinin ürəyinə dəydi.” 

1920 ildə - Göyçay şəhərinin seldən qorunması üçün qanun layihəsi hazırlandı. Lakin Azərbaycan Xalq Cümhuriyyətinin süqutu nəzərdə tutulan bu tədbiri həyata keçirməyə imkan vermədi. 

1936-cı ildə martın 4-dən 7-ə - Azərbaycan memarlarının ilk qurultayı keçirilmişdir. 

1992-ci ildə - Azərbaycan ordusunun Ağdamda yerləşən və Qarabağ münaqişəsinin başlanğıcında ermənilərin nəzarəti altına keçən strateji əhəmiyyətli Qazançı kəndinin azad olunması üçün əməliyyat keçirildi. Əməliyyat nəticəsində kənd Azərbaycan ordusunun nəzarəti altına keçdi, döyüş nəticəsində Azərbaycan ordusunun 7 əsgəri şəhid oldu. Onlardan biri Əlabbas İsgəndərov Azərbaycanın Milli Qəhrəmanı adına layiq görüldü. Ermənilər tərəfdən onlarla döyüşçü məhv edildi.

2001-ci ildə - Parisdə Fransa prezidenti Jak Şirakın vasitəçiliyi ilə Azərbaycan və Ermənistan prezidentlərinin Qarabağ münaqişəsinin nizamlanması üzrə növbəti danışıqları başlayıb. İki gün davam edən danışıqlar Ermənistanın kompromissiz mövqeyi üzündən nəticəsiz bitib.   

2008-ci ildə - Ermənistan silahlı qüvvələri Tərtər rayonunda işğal etdikləri mövqelərdən Azərbaycan silahlı qüvvələrinin istqamətində hücuma cəhd göstərmişlər. Erməni hücumunun qarşısını alan Azərbaycan silahlı qüvvələrinin hissələri əks-hücuma keçərək, Ermənistan ordusunun işğal etdikləri bəzi hərbi mövqeləri azad etmişlər. 

2008-ci ildə - Kosovoda Türkiyə taborunun tərkibində fəaliyyət göstərən 34 nəfərlik sülhməramlı Azərbaycan taqımı Milli Məclisin martın 4-də keçirilən iclasının qərarı ilə geri çağırılmışdı.