1158    

12/01/2017

1908-ci ildə – Böyük bəstəkar Üzeyir Hacıbəyovun müəllifi olduğu ilk Azərbaycan operası "Leyli və Məcnun" tamaşaya qoyulub. Bu, müsəlman Şərqində ilk opera əsəri idi. Premyera öncəsi Bakı küçələrinə vurulan ilk afişa bu məzmunda idi: "Müsəlman dilində əvvəlinci (ilk) dəfə opera. "Leyli və Məcnun". Şənbə günü, axşam, yanvarın 12-si (yeni təqvimlə 25-i) "Nicat" maarif cəmiyyətinin dram heyəti tərəfindən mövqe-tamaşaya qoyulacaq". "Leyli və Məcnun"un ilk tamaşasının rejissoru Hüseyn Ərəblinski, dirijoru Əbdürrəhim bəy Haqverdiyev olmuşdur. Rollarda: Hüseynqulu Sarabski (Məcnun), Əbdürrəhman Fərəcov (Leyli), C. Dağıstani (İbn Səlam), Mirmahmud Kazımov(Məсnunun anası), Mirzə Muxtar (Məсnunun atası), İ. Qasımov (kəngərli) (Fəttah, Leylinin atası), С. Vəzirov (Leylinin anası), İbrahim Kasumov (Kəngərli) (Zeyd), 7 ərəbin rolunda isə -Məmmədov, Səfərov, İsmayılov, V.Vəzirov, Əliyev və b. çıxış etmişlər. Tarda solo olaraq Qurban Pirimov və Şirin Axundov ifa etmişdir.  Xareoqraf Bəhram Vəzirov, suflyor isə A.Rzayev, məsul idarəçi isə Sara Aşurbəylinin atası Balabəy Aşurbəyov olub. Üzeyir Hacıbəyov isə orkstrdə skripkada ifa etmişdir.  

1958-ci ildə - Azərbaycanın polis zabiti, Milli Qəhrəmanı Nizami Murad oğlu Məmmədov Xankəndi şəhərində dünyaya göz açmışdır. Nizami Məmmədov özünümüdafiə batalyonlarına silah-sursat çatdırılmasında iştirak etmiş, döyüşlərə atılmışdı. Nizami Daşaltı, Malıbəyli, Qaladərəsi kimi mühüm əməliyyatlarda iştirak etmişdi. 1992-ci il 29 mart tarixində snayper gülləsi onun həyatına son qoymuşdu. 

1989-cu ildə – SSRİ Ali Sovetinin Rəyasət Heyəti "Azərbaycan SSR-in Dağlıq Qarabağ Muxtar Vilayətində xüsusi idarə formasının tətbiq edilməsi haqqında" fərman verib. Fərmana əsasən, Dağlıq Qarabağın Azərbaycan tərkibində muxtar vilayət statusu saxlanılmaqla bölgədə birbaşa Moskvaya tabe olan "Xüsusi İdarə Komitəsi" yaradıldı. Moskvanın qərarı guya münaqişənin səngiməsinə yönəlmişdi. Gerçəkdə isə Arkadi Volskinin rəhbərlik etdiyi "komitə" Dağlıq Qarabağın Azərbaycanın suverenliyindən çıxarılmasına xidmət edirdi. Əhalinin geniş etiraz çıxışlarından sonra "Xüsusi İdarə Komitəsi"
həmin ilin noyabrında Bakının formal tabeçiliyində olan Təşkilat Komitəsi ilə əvəzləndi.

1995-ci ildə – Azərbaycan Respublikası ilə Uruqvay arasıında diplomatik münasibətlər qurulub.

2004-cü ildə – Prezident İlham Əliyev Azərbaycan Milli Ensiklopediyasının nəşri haqqında və Azərbaycan dilində latın qrafikası ilə kütləvi nəşrlərin həyata keçirilməsi haqqında sərəncamlar imzalayıb.