1107    

12/03/2017

1882-ci ildə - Çar Rusiyası tərəfindən Azərbaycanın quzeyində açıq polis nəzarəti haqqında yeni qaydalar təsdiq edildi. Polisin açıq nəzarəti altında olan şəxslərdən onun rütbəsi və yaşayış tərzi haqqında sənədlər alınır və əvəzində müəyyən yerdə yaşaması haqqında şəhadətnamə verilirdi. Nəzarət altında olan şəxslərin hökumət orqanlarının icazəsi olmadan yaşayış məntəqəsini tərk etməyə, pedoqoji fəaliyyətlə məşğul olmağa, mühazirələr oxumağa, elmi cəmiyyətlərin yığıncağında iştirak etməyə, mətbəə, fotoqrafiya, kitabxana açmağa ixtiyarları yox idi. Onlar dövləti və ictimai xidmətə buraxılmırdılar.

1896-cı ildə - Çar hakimiyyəti orqanları Qaçaq Nəbini öldürən və ya onun öldürülməsində fərqlənən adamlara çoxlu pul, qiymətli hədiyyələr, vəzifə və medalla mükafatlandırmağı vəd etmişdi. 1895-ci ilin sentyabrında Naxçıvan qəza rəisi Urmiya şəhərində yaşayan, orada ticarətlə məşğul olan Ordubad taciri hacı Fərəc oğluna Nəbinin İranda öldürülməsini təşkil etməyi tapşırdı. Nəbinin qətli üçün tacirə qızıl medal və 1000 manat xərclik vəd edildi. O, qaçaqlardan Şahhüseyn və Kərbəlayı İmamı satın almağa nail oldu. Onlar bir həftə ərzində Nəbini öldürməyə boyun oldular. 1896-cı il martın 12-də onlar İranın Larni kəndində Qaçaq Nəbiyə (1854-1896) hücum edərək onu öldürdülər. 

1906-cı ildə - Şair, dramaturq, tərcüməçi, ictimai xadim, Azərbaycan Yazıçılar Birliyininin üzvü, Azərbaycanın Əməkdar İncəsənət xadimi, Stalin mükafatı, II dərəcəli Azərbaycan Dövlət mükafatı laureatı, Sosialist Əməyi Qəhrəmanı, Sov.İKP üzvü olmuş Süleyman Əliabbas oğlu Rüstəmzadə (Süleyman Rüstəm) (1906-1989) Bakının Novxanı kəndində anadan olmuşdur. 

1922-ci ildə - Bolşevik Rusiyası gələcək SSRİ-nin təməli kimi üç Cənubi Qafqaz respublikasının (Azərbaycan, Gürcüstan, Ermənistan) ittifaqını - Zaqafqaziya Sovet Sosialist Respublikaları Federativ İttifaqını təşkil edib. 9 ay sonra, 1922-ci ilin dekabrında Zaqfederasiya SSRİ-nin qurucu subyektlərindən biri oldu.

1933-cü ildə - Xalq şairi Cabir Mirzəbəy oğlu Novruzov (Cabir Novruz) (1933-2002) Xızı rayonunun Upa kəndində anadan olmuşdur. Əsərlərində yüksək lirika ilə bərabər vətəndaş mövqeyi daim aparıcı xətt təşkil edib. 1995-2000-ci illərdə Milli Məclisin deputatı olub.

1945-ci ildə - Azərbaycanın siyasi xadimi, Azərbaycan Respublikası I, II, III, IV, V çağırış Milli Məclisinin deputatı, iqtisadi elmlər üzrə elmlər doktoru Eldar Rza oğlu İbrahimov Azərbaycan Republikası Naxçıvan Muxtar Respublikasının Babək rayonunun Cəhri kəndində anadan olmuşdur.  

1992-ci ildə - Azərbaycan Respublikası Daxili Qoşunlarının yarandığı gündür. Daxili Qoşunlar DİN-in tərkibində struktur kimi 1991-ci ilin sonunda formalaşıb, Ermənistanın ölkəmizə qarşı hərbi təcavüzünə qarşı ilk döyüşdə 1992-ci il martın 12-də iştirak edib. Prezident Heydər Əliyevin 9 mart 1995-ci il tarixli fərmanı ilə 12 mart Daxili Qoşunlar günü elan edilib.

1992-ci ildə - Azərbaycanın Türkiyə Respublikası ilə yaxınlaşması Rusiyanı narahat edirdi. Cənubi Qafqazda nüfuzuna xələl gələcəyindən təşvişə düşən Rusiya Azərbaycana təzyiqini artırdı: ermənilər martın 12-də Tərtər, Qazax, Tovuz, Ağdam, Cəbrayıl və Füzuli istiqamətlərində güclü hücuma başladılar. Azərbaycan Ali Sovetinin sədri Yaqub Məmmədov martın sonunda mətbuatda açıq elan etdi ki, "Rusiya Ermənistanın köməyi ilə Azərbaycana təzyiq göstərməyə cəhd edir", "Müharibəni yalnız Yeltsin dayandıra bilər".

1992-ci ildə - Ermənistan ordusu tərəfindən Ağdam rayonunun Baş Güneypəyə, Ağdərənin Sırxavənd kəndi işğal olundu. 

1992-ci ildə - Dövlət Müdafiə Komitəsində Şuşadakı vəziyyət müzakirə edildi.

1999-cu ildə - "Dövlət torpaq kadastrı, torpaqların monitorinqi və yer quruluşu haqqında" və "Torpaq icarəsi haqqında" qanunlar verildi. Bütün rayonlarda torpaq istifadəçilər üzrə inventarlaşdırıldı və iqtisadi cəhətdən qiymətləndirildi.