1025    

17/03/2017

1918-ci ildə - Cənubi Azərbaycanın Urmiya şəhərində xarici ölkə diplomatların (Britaniya, ABŞ, Fransa, Rusiya konsulları) gözü qarşısında erməni quldur dəstələri mindən çox müsəlman-türk əhalini qətlə yetirib.

1918-ci ildə - Daşnaklar Azərbaycanın müsəlman-türk əhalisinə qarşı soyqırım hazırlıqlarını daha da sürətləndirdilər. Erməni Milli Şurası cəbhədən qayıdan erməni əsgərlərini Bakıda saxlamaq üçün martın əvvəllərində "Erməni əsgərlərinə" müraciət etdi. Erməni milyonçusu Mantaşevin zavodları isə ermənilərin silah-sursat cəbbəxanası rolunu oynamağa başladı. İrandan və Orta Asiyadan Sovet hökumətinin adına göndərilən silahlar da ermənilərin əlinə keçdi. 1918 il martın 17-də qırğın törətmək üçün bəhanə yaratmaq məqsədilə "Müsavat" partiyası üzvlərinin və azərbaycanlı əsgərlərin, yunkerlərin olduğu "Avetik" gəmisi Şaumyanın əmri ilə atəşə tutuldu. Elə həmin gün B.Avakyan "Astoriya" mehmanxanasında Hərbi İnqilabi Komitə adından daşnaklara silah payladı. 

1919-cu ildə - Azərbaycan Cümhuriyyətinin parlamentinin qəbul etdiyi yeni qanun yerlərdə vergi yığmaq hüququnu üzvləri zemstvo yığıncaqları və icmalar tərəfindən seçilən gəlir vergisi üzrə quberniya və qəza idarə heyətlərinə verildi.

1920-ci ildə - V.İ.Leninin Qafqaz cəbhəsi Hərbi-İnqilabi Şurası adından göndərdiyi teleqram sovet hökumətinin Azərbaycana münasibətindəki gizli niyyətlərindən xəbər verir: "Bizim üçün Bakını ələ keçirmək son dərəcə vacibdir. Bütün səyləri bu istiqamətə yönəldin, həm də bəyanatlar sırf diplomatik olmalıdır, möhkəm yerli Sovet hakimiyyətinin hazırlanmasında maksimum yəqinlik əldə edilməlidir".

1922-ci ildə - Azərbaycanda da aclıq kəskinləşdiyindən, 1922-ci il martın 17-də Azərbaycan MİK-in qərarı ilə o da aclıq çəkən rayon elan edildi. Respublikanın "Aclara kömək" MK-sı 200 min aclar payı müəyyənləşdirdi. 

1991-ci ildə - SSRİ-də ittifaqın saxlanılması məsələsi ilə bağlı referendum keçirilib. Rəsmi məlumatlara əsasən, referendumda əhalinin 76 faizi SSRİ-nin saxlanılmasına səs vermişdi. Altı respublikanda (Latviya, Estoniya, Litva, Ermənistan, Gürcüstan, Moldova), həmçinin Azərbaycanın Naxçıvan Muxtar Respublikasında referendum keçirilməmişdi. Azərbaycanda referendumun rəsmi nəticələrinə görə, əhalinin 75 faizinin SSRİ-nin saxlanılmasına tərəfdar olduğu elan edildi.

2004-cü ildə - Prezident İlham Əliyevin imzaladığı əfv fərmanına əsasən, 129 məhkum, o cümlədən dövləti cinayətlərə görə məhkum edilmiş 42 nəfər azadlığa çıxıb.