1137
18/03/2017 1901-ci ildə - Rusiya hökuməti imperiyanın mərkəzi vilayətlərindən Azərbaycan ərazisinə - Mil və Muğan düzlərinə 40 min kəndlinin köçürülməsi barədə qərar qəbul edib. Bu, imperiyanın milli əyalətlərdə həyata keçirdiyi ruslaşdırma siyasətinin tərkib hissəsi idi. Köçürülmə nəticəsində Azərbaycanın sözügedən bölgələrində onlarla rus yaşayış məntəqəsi yarandı.
1916-cı ildə - Şair, tərcüməçi, Azərbaycan Yazıçılar Birliyinin üzvü Böyükağa Məmməd oğlu Qasımov (1916-1957) Bakı qəzasının Maştağa kəndində xırda sahibkar-dəmirçi ailəsində doğulmuşdur.
1918-ci ildə - Erməni quldur dəstələri Şamaxıda əhaliyə qarşı kütləvi soyqırımlar həyata keçiriblər. Öldürülənlər arasında Rusiya I Dövlət Dumasının (1906-1907) deputatı Məmmədtağı Əliyev də vardı. Şamaxı gecə ikən cənubdan ermənilər, şimal-şərqdən isə malakanlar tərəfindən mühasirəyə alındı. Onlar şəhərin müsəlman hissəsini bombalamağa başladılar. Müsəlmanlar topların qarşısında dayana biləcək vəziyyətdə olmadıqlarından geri çəkildilər. Dəhşətli qarışıqlıq baş verdi. Ermənilər və malakanlar axşama yaxın şəhərin ən varlı hissəsi "Piran-Şirvan"a daxil oldular. Evlər yandırılır, yanan evlərdən qaçan kişilər, qadınlar, uşaqlar və ümumiyyətlə, küçədə görünən hər kəs güllələnirdi. Dəstənin quldur üzvləri evlərə soxularaq, sakinləri öldürüb qarət edirdilər. Şəhərin küçələrində türk-müsəlman meyitləri üst-üstə qalaqlanmışdı. Bu vəhşiliklər Gəncədən silahlı türk-müsəlman dəstəsi Şamaxı şəhəri və Şamaxı qəzası əhalisinin köməyinə gələnə qədər bir neçə gün davam etmişdi. Gəncəlilərin gəlişindən sonra ermənilər və malakanlar Şamaxıdan malakanlar yaşayan Qozlu kəndinə çəkildilər. Nəticədə Şamaxı şəhəri və qəzasının 72 kəndi Bakı Sovetinin bolşevik-daşnak qoşunları tərəfindən dağıdıldı. Şamaxı qırğınlarında 8 min nəfərə qədər türk-müsəlman əhali öldürüldü, onların 1653 nəfəri qadın, 965 nəfəri uşaq idi. Şamaxıda yerli əhaliyə dəyən maddi ziyan о dövrün qiymətləri ilə bir milyard rubldan çox idi. 1918-ci ilin mart qanlı hadisələrindən sonra Şamaxı şəhəri uzun müddət özünə gələ bilmədi. Həmin hadisələr ərəfəsində 15 min əhalisinin 80 faizdən çoxu türk-müsəlman olan Şamaxıda 1921-ci ildə cəmisi 1700 nəfər yaşayırdı. Bir neçə gündən sonra türk-müsəlman əhaliyə qarşı soyqırımlar İrəvandan Bakıyadək əksər bölgələri əhatə etdi.
1922-ci ildə - Dramaturq, Yazıçılar Birliyinin üzvü Qeybulla İbadulla oğlu Rəsulov (1922-1988) Azərbaycanın Qax rayonunun İlisu kəndində anadan olmuşdur.
1923-cü ildə - Azərbaycan Milli Elmlər Akademiyasının həqiqi üzvü, tibb elmləri doktoru, əməkdar elm xadimi, professor Rəhim Rəhimov (1923-2013) Naxçıvan Muxtar Vilayətinin Ordubad şəhərində anadan olmuşdur.
1927-ci ildə - V Ümumazərbaycan sovetlər qurultayında sovet Azərbaycanının ikinci Konstitusiyası qəbul edilib. Həmin vaxtadək respublikanın siyasi, iqtisadi quruluşunda zorakı metodlarla həyata keçirilmiş dəyişikliklər yeni Konstitusiyaya salındı.
1943-cü ildə - Xalq yazıçısı Mövlud Süleymanlı Qərbi Azərbaycanın Qızıl Şəfəq kəndində (Ermənistan SSR Kalinino rayonu) anadan olub. "Köç" romanının, povest, pyes və ssenarilərin müəllifidir. Uzun illər Azərbaycan dövlət radiosuna rəhbərlik edib.
1951-ci ildə - Yazıçı-publisist, filologiya elmləri doktoru, BDU-nun Kitabşünaslıq və nəşriyyat işi kafedrasının professoru, Azərbaycan Milli Elmlər Akademiyası Nizami adına Ədəbiyyat İnstitutunun Xarici ölkələr ədəbiyyatı və ədəbi əlaqələr şöbəsinin baş elmi işçisi, qəzetçi-yazar İsmayıl Ömər oğlu Vəliyev Qərbi Azərbaycanın Allahverdi rayonunun Böyük Ayrım kəndində anadan olmuşdur.
1991-ci ildə - Xəzər Universiteti Azərbaycan Respublikası Nazirlər Kabinetinin 41 saylı qərarı ilə, Azərbaycanda beynəlxalq standartlara uyğun kadrlara, eləcə də ingilisdilli mütəxəssislərə olan kəskin ehtiyacı ödəmək məqsədilə yaradılmışdır.
1992-ci ildə - BMT baş katibinin xüsusi nümayəndəsi Sayrus Vens Dağlıq Qarabağ münaqişəsi ilə bağlı vəziyyətlə tanış olmaq üçün Bakıya gəlib. BMT rəsmisi Bakıdan sonra İrəvan və Xankəndiyə səfər edib.
1994-cü ildə - Erməni silahlı dəstələri Xankəndi səmasında İranın "Herkules" təyyarəsini raketlə vurublar. Təyyarədə olan 34 iranlı diplomat və ailə üzvləri həlak olublar.
1994-cü ildə - Qarabağ müharibəsi iştirakçısı Əbülfət Avtandil oğlu Əliyev (1971-1994) Murov dağında gedən qeyri-bərabər döyüşdə snayper gülləsindən şəhid olmuşdur.