1038    

18/03/2017

1910-cu ildə - Səttərxanın rəhbərliyi ilə Qacar hakimiyyətinə qarşı inqilab (1905-1911-ci illər İran inqilabı) Cənubi Azərbaycanda qələbə çaldıqdan sonra Tehrana yürüş başlanıb. Səttarxan və Bağırxanın fədai dəstələri Təbrizdən Tehrana yola düşüblər. Lakin Rusiyanı köməyi ilə inqilab 1911-ci ildə uğursuzluqla nəticələndi. Təbrizə daxil olan rus qoşunları inqilabçılara divan tutdular.

1919-cu ildə - Azərbaycan Cümhuriyyətinin parlamenti ölkədə fəhlələrin iş və məişət şəraitinin yaxşılaşdırılması məqsədilə yaradılan Fəhlə məsələsi üzrə Xüsusi Müşavirənin statusunu təsdiq edib. Fəhlə və sahibkarların nümayəndələrindən ibarət qurum dərinləşən iqtisadi böhranda hökumətin fəhlələrlə bağlı siyasətini tənzimləməli idi.

1925-ci ildə - Azərbaycanlı ictimai-siyasi xadim, yazıçı, publisist, həkim, Azərbaycan SSR-in 1-ci Xalq Xarici İşlər Komissarı, Azərbaycan SSR İnqilab Komitəsinin Sədri, Azərbaycan SSR Xalq Komissarları Sovetinin 1-ci Sədri, ZSFSR İttifaq Sovetinin 1-ci Sədri, SSRİ Mərkəzi İcraiyyə Komitəsi Rəyasət Heyətinin ZSFSR-dən 1-ci Sədri Nəriman Nərimanov (1870-1925) müəmmalı şəkildə ölmüş və Moskvada Kremlin divarları yaxınlığında dəfn edilmişdir.

1951-ci ildə - Qərbi Azərbaycanın Qarabağlar rayonu ləğv edilərək ərazisi əsasən Vedi və Qəmərli rayonlarına birləşdirilmişdir. Mərkəzi Çimənkənd olmuşdur.

1992-ci ildə - Görkəmli şair, publisist Teymur Süleyman oğlu Əliyev (1924-1992) vəfat etmişdir.

1994-cü ildə - Erməni xüsusi xidmət orqanlarının təşkilatçılığı ilə Bakı metropoliteninin "20 Yanvar" stansiyasında terror aktı törədilib. Partlayış nəticəsində 14 nəfər həlak olub, 49 nəfər yaralanıb. Terror aktının Ermənistan xüsusi xidmət orqanlarında təlimlər keçmiş separatçı "Sadval" təşkilatının üzvləri tərəfindən həyata keçirildiyi müəyyən edilib, qrupun üzvləri cinayət məsuliyyətinə cəlb edilib.

2004-cü ildə - Prezident İlham Əliyev Bratislavada (Slovakiya) "Daha geniş Avropaya istiqamət: yeni gündəlik" adlı beynəlxalq konfransda iştirak edib. Avropa Birliyi üzvlüyünə namizəd və AB ilə tərəfdaş ölkələrin iştirak etdiyi konfransda Azərbaycan prezidenti "Avropanın Qara dəniz və Qafqaz qonşuluğu" mövzusunda müzakirələrdə çıxış edib.