1155
22/03/2017 1854-cü ildə - Görkəmli pedaqoq, publisist və şair, maarifpərvər ziyalı Məhəmməd Tağı Kərbəlayi Səfər oğlu Səfərov (Məhəmməd Tağı Sidqi) (1854-1903) Naxçıvanda anadan olmuşdur.
1893-cü ildə - Görkəmli teatr aktyoru, teatr və kino rejissoru, kino redaktoru, xalq artisti Abbas Mirzə Mirzə Əbdülrəsul oğlu Şərifzadə (1893-1938) anadan olub. Stalin repressiyalarının qurbanı olub.
1909-cü ildə - Xalq yazıçısı, nasir, dramaturq, tənqidçi, Azərbaycan Yazıçılar Birliyinin üzvü, SSRİ Dövlət mükafatı laureatı, Stalin mükafatı laureatı, 1941-cı ildən Sov.İKP üzvü Mehdi Əli oğlu Hüseynov (Mehdi Hüseyn) (1909-1965) Qazaxın Şıxlı kəndində anadan olub.
1912-ci ildə - Azərbaycan türkü olan sufi-şair, 1944-cü ildə isə fəlsəfi baxışlarına, irfani şeirlərinə görə şairin özü repressiyaya məruz qalmış Təhləli Novruz Qarayazı bölgəsində, indiki Qardabani rayonunun Təhlə kəndində anadan olub.
1913-cü ildə - Azərbaycanın görkəmli teatr və kino aktyoru, xalq artisti Əliağa İsmayıl oğlu Ağayev (1913-1983) Bakıda anadan olub.
1914-cü ildə - Xalq artisti Lütfəli Əmir oğlu Abdullayev (1914-1973) Nuxa şəhərində (indiki Şəki) doğulub.
1915-ci ildə - II Dünya müharibəsində sürücü-mexanik, tank komandiri, tank vzvodunun komandiri kimi Cənub-Qərb, Şimali Qafqaz, 1-ci Belorusiya cəbhələrində alman faşist işğalçılarına qarşı vuruşmalarda iştirak etmiş Sovet İttifaqı Qəhrəmanı Nəcəfqulu Rəcəbəli oğlu Rəfiyev (1915-1970) Ordubad şəhərində anadan olmuşdur.
1919-cu ildə - Xalq yazıçısı, Yazıçılar Birliyinin sədri, Milli Məclisin deputatı olmuş İsmayıl Qəhrəman oğlu Şıxlınski (İsmayıl Şıxlı) (1919-1995) anadan olub.
1919-cu ildə - İkinci Dünya müharibəsində qırıcı təyyarəçi və qadınlardan ibarət qırıcı aviasiya polkunun komandir müavini, 1946-1952-cı illərdə komsomol və partiya komitələrində məsul vəzifələrdə çalışmış, 1952-1975-ci illərdə keçmiş Azərbaycan SSR-in İctimai Təminat naziri olmuş Züleyxa Həbib qızı Seyidməmmədova (1919-1999) Bakı şəhərində, ziyalı ailəsində anadan olmuşdur.
1920-cı ildə - Azərbaycan Cümhuriyyətinin əsas qoşunlarını Qarabağa yeritməyə məcbur etmək üçün ermənilər gecə saat 3-də eyni vaxtda Şuşa, Xankəndi, Əsgəran, Xocalı və Tərtərdə yerləşən qoşun bölmələrinin üzərinə basqınlar etdilər. Martın 22-dən başlayaraq davam edən döyüşlər qoşun bölmələrini yormaqla bərabər, onlara müəyyən maddi və canlı itkilər də verilmişdi. Döyüşlərin davam etdirilməsi bu itkilərin bərpa olunmasını tələb edirdi. Keşişkənd ətrafında erməni qüvvələri güclü zərbə olsalar da, tamamilə məhv edilməmişdilər. Xırda qruplarda birləşərək onlar Azərbaycan mövqeləri üzərinə öz hücumlarını davam etdirirdilər. Belə hücumların qarşısının qətiyyətlə alınması üçün qoşun bölmələrinin hərtərəfli təmin və təchiz edilməsi günün zəruri məsələsinə çevrilirdi. Bolşevik qoşunları Azərbaycanın şimal sərhədlərinə yaxınlaşdıqca, erməni silahlı dəstələrinin fəallığı da artırdı. Geniş cəbhədə Azərbaycan qoşun bölmələrinin təzyiqinə davam gətirməyən erməni silahlıları ailələrini Zəngəzura köçürüb kiçik dəstələrlə Azərbaycan kəndlərinə hücum edirdilər.
1930-cu ildə - Ölümündən sonra "20 Yanvar şəhidi" fəxri adına layiq görülmüş Bayram İsmayıl oğlu Nəsibov (1930-1990) anadan olmuşdur.
1933-cü ildə - Xalq artisti, "Şərəf nişanı" ordeni ilə təltif edilmiş, Leyli ("Leylı və Məcnun" – Üzeyir Hacıbəyov), Əsli ("Əsli və Kərəm" – Üzeyir Hacıbəyov), Xanəndə qız ("Koroğlu" - Üzeyir Hacıbəyov), Ərəbzəngi ("Şah İsmayıl"- Müslüm Maqomayev), Şahsənəm ("Aşıq Qərib" – Zülfü Hacıbəyli), Sənəm ("Gəlin qayası" – Ş. Axundova) və s. muğam, təsnif və xalq mahnılarının mahir ifaçısı Rübabə Xəlil qızı Muradova (1933-1983) Ərdəbil şəhərində anadan olub.
1992-ci il martın 22-25-də - Naxçıvan Muxtar Respublikası Ali Məclisinin Sədri Heydər Əliyev Türkiyə Respublikası hökumətinin dəvəti ilə Türkiyəyə səfər edib, danışıqlar apardı. Türkiyə Naxçıvana 100 min dollar kredit ayırdı və bunun hesabına ərzaq, əkin üçün toxum, avadanlıq göndərdi. Az bir vaxtda İğdır-Naxçıvan elektrik xətti çəkildi, Muxtar Respublika Türkiyənin elektrik şəbəkəsinə qoşuldu. Sədərək-Türkiyə yolu tikildi. Qarşılıqlı avtonəqliyyat əlaqələri yaradıldı. "Türksat" rabitə şirkəti Naxçıvanın Bakı ilə telefon əlaqəsini bərpa etdi.
2002-ci ildə - Prezident Heydər Əliyevə "Mətbuatın dostu" mükafatı təqdim edilib. Dövlət başçısı "RUH" Jurnalistlərin Hüquqlarını Müdafiə Komitəsinin 2001-ci ilin yekunları üzrə keçirdiyi sorğunun nəticələrinə əsasən bu mükafata layiq görülmüşdü.