1177
23/03/2017 1920-ci ildə - Azərbaycan Cümhuriyyətinin koalisiya hökumətində (1919-cu ilin dekabrında qurulmuş 5-ci hökumət) növbəti ixtilaf başlanıb. Sosialist Əhməd bəy Pepinov (əmək və torpaq işləri naziri) hökumətdən istefa verib. Onun ardınca partiyadaşı Camo Hacinski (poçt-teleqraf naziri) istefa verib və sosialist fraksiyası koalisiyanı tərk edib. Bu "İttihad" fraksiyası (iki nazir) da koalisiyanı tərk etdiyini bəyan edib.
1920-ci ildə - Bəstəkar, musiqişünas, pedaqoq Əşrəf Cəlal oğlu Abbasov (1920-1992) anadan olub.
1919-cu ildə - "Azərbaycan" qəzetində Azərbaycan Xalq Cümhuriyyətinin dövlət gerbi və möhürü layihələrinin hazırlanması üçün müsabiqə elan edilmişdi. Hökumətin qərarı ilə Azərbaycanın dövlət gerbi və möhürünün ən yaxşı təsvirinin hazırlanması üçün iki mükafat (“Ən yaxşı gerb layihəsi”nə görə 1000 rubl, möhürə görə isə 500 rubl) müəyyənləşdirilmişdi. Müsabiqənin müddəti həmin il aprelin 20-dək müəyyən edilmiş və bu işin təşkili və icrasına nəzarət Poçt və Teleqraf Nazirliyinə həvalə edilmişdi. Lakin həmin müsabiqə uğurla nəticələnmədi və müvafiq gerb layihəsi qəbul edilmədi.
1942-ci ildə - Görkəmli aktyor, rejissor, əməkdar artist Rza Nəcəfəli oğlu Hüseynov (Darablı) (1883-1942) Bakıda vəfat etmişdir.
1944-cü ildə - Sağ sahil Ukraynasını alman-faşist işğalçılarından təmizləyən 416-cı Taqanroq diviziyasının əsgərləri çox sürətlə vuruşa-vuruşa Dnepr çayının sağ sahilinə keçərək, Nikolayev şəhəri yaxınlığında düşmənin müqavimətini qırmış, birgünlük qanlı döyüşlərdən sonra şəhəri ələ keçirib Cənubi Buq çayına çıxmışlar. fevralın 9-dan 10-na keçən gecə Dnepr çayını keçdiyinə və martın 23-də Nikolayev şəhərini azad etdiyinə görə diviziya Ali Baş Komandanın təşəkkürnaməsini aldı.
1944-cü ildə - Azərbaycanın Milli Qəhrəmanı Viktor Vasilyeviç Seryogin (1944-1992) Gürcüstan Respublikasının Tiflis şəhərində doğulmuşdur.
1945-ci ildə - SSRİ Elmlər Akademiyasının Azərbaycan filialı əsasında Azərbaycan SSR Elmlər Akademiyası yaradıldı. Onun ilk prezidenti akademik M.Mirqasımov oldu. Respublikada elmi-tədqiqat işlərinin mərkəzinə çevrilmiş akademiyada 16 institut və bölmə, Şərq əlyazmaları və nadir kitablar fondu fəaliyyətə başladı.
1946-cı ildə - Şair, nasir, tərcüməçi, Azərbaycan Yazıçılar Birliyinin üzvü Seyran Əsgər oğlu Xanlarov (Seyran Səxavət) Füzuli rayonunun Yağlıvənd kəndində anadan olmuşdur.
1946-cı ildə - Azərbaycan legionerlərinin komandiri Əbdürrəhman Fətəlibəyli-Düdənginskinin İngiltərənin baş naziri Klement Etliyə yazdığı bir məktubda SSRİ-yə qarşı Soyuq Müharibə yolu ilə necə mübarizə aparmağın mümkün olduğundan bəhs edilir. Bu məktub Soyuq Müharibənin elan edilməsindən 6 gün əvvəl yazılıb.
1949-cu ildə - Azərbaycanın milli qəhrəmanı Paşa Qurban oğlu Təhməzov (1949-1993) Lənkəran şəhərində anadan olmuşdur.
1960-cı ildə - Qarabağ müharibəsi iştirakçısı, şəhid, "Vətən uğrunda" medalı ilə təltif edilmiş Çingiz Binnət oğlu Cəfərov (1960-1994) Şuşa şəhərində anadan olub.
1981-ci ildə - Azərbaycanın Xalq artisti, musiqiçi, dirijor, bəstəkar Tofiq Qəzənfər oğlu Əhmədov (1923-1981) Bakıda vəfat etmişdir.
1990-cı il martın 23-dən 24-ə keçən gecə - Qazaxın Seyid Ayrım kəndi ermənilər tərəfindən işğal edilib.
1992-ci ildə - Azərbaycanın Koreya Respublikası, Salvador və Somali dövlətləri ilə diplomatik münasibətləri qurulub.
2000-ci ildə - Prezident Heydər Əliyevin Gürcüstana səfəri gedişində Bakı-Tbilisi-Ceyhan neft kəmərinin tranzit məsələsi ilə bağlı Gürcüstanla yaranmış problem çözülüb. Azərbaycan layihənin reallaşması naminə boru xəttindən öz payına düşəcək nəql tarifi haqqından Gürcüstanın xeyrinə imtina etdi.
2004-cü ildə - Prezident İlham Əliyevin Özbəkistana dövlət səfəri gedişində ikitərəfli sənədlər, o cümlədən "Strateji tərəfdaşlığın daha da möhkəmləndirilməsi haqqında Bəyannamə" imzalanıb. Daşkənddə Azərbaycan səfirliyinin yeni binasının, Nizami Gəncəvinin abidəsinin, Azərbaycan Mədəniyyət Mərkəzinin, Heydər Əliyev adına küçənin açılışı keçirilib.