1096    

24/03/2017

1897-ci ildə - Publisist, teatrşünas, salnaməçi, Azərbaycan Yazıçılar İttifaqının üzvü, Əməkdar Mədəniyyət işçisi, Azərbaycan Jurnalistlər Birliyinin "Qızıl qələm" mükafatı laureatı, əmək veteranı, Azərbaycanın Əmakdar jurnalisti, İttifaq əhəmiyyətli təqaüdçü, M.F.Axundov adına ədəbi mükafat laureatı Qulam Məmməd oğlu Məmmədli (1897-1994) Azərbaycanın Güneyinin Təbriz şəhərində anadan olmuşdur.  

1907-ci ildə - Azərbaycanın məşhur mühacir şairi Əbdülhəsən Almaszadə (Almas İldırım) (1907-1952) Bakının Qala kəndində anadan olmuşdur. 

1908-ci ildə - Tiflisdə Kamal Ünsizadənin redaktorluğu ilə Azərbaycan türkcəsində liberal ruhlu Məzhər ictimai-siyasi qəzetinin ilk sayı işıq üzü görüb. Cəmi 31 nömrəsi çıxmışdır (1917-ci ilə qədər). Bu qəzet dini təbliğ etmiş, ruhaniləri, yüksək rütbəli çar məmurlarını tərifləmişdir. Cəlil Məmmədquluzadə bu qəzet haqqında yazırdı: "Məzhər" qəzetinin sahibi Kamal əfəndi kimi gərək biz də canişin həzrətlərinə qəsidə oxuyaq ki, hökumət yanında hörmətimiz olsun".   

1920-ci ildə - 11-ci Qırmızı ordunun vasitəsi ilə Dərbənddə sovet hakimiyyəti elan olundu. Dərbənd şəhəri 1921-ci ildə Dağıstan Muxtar Sovet Sosialist Respublikasının tərkibinə daxil edildi. Bununla, Azərbaycanın tarixi şəhəri Dərbənd Rusiya Sovet Federativ Sosialist Respublikasının tərkibinə qatıldı. 

1933-cü ildə - Azərbaycan ədəbiyyatında xüsusi rol oynayan M. Ə. Sabir şeir məktəbi davamçılarından olan, görkəmli şair və dramaturq Rüfət Zülfüqar oğlu Əhmədzadə (1933-1988) Bakıda anadan olmuşdur.  

1988-ci ildə - Vedi rayonunun Vedi, Şirazlı, Xalisə və Şidli kimi kəndlərində 100-dən çox ev ermənilər tərəfindən talan edilib yandırıldı, əhalisi qovuldu.

1992-ci ildə - Ali Sovetin fövqəladə sessiyasında Azərbaycanda növbədənkənar prezident seçkilərinin keçirilməsi haqqında qərar qəbul edilib. Qərara əsasən, seçki 1992-ci il iyunun 7-nə təyin olunub.

1997-ci ildə - Prezident Heydər Əliyevin Ukraynaya rəsmi səfəri gedişində ikitərəfli sənədlər, o cümlədən dostluq, strateji tərəfdaşlıq və qarşılıqlı yardım haqqında müqavilə imzalanıb. Azərbaycan prezidenti Ukraynanın ali dövlət mükafatı, "Yaroslav Mudrı" ordeni ilə təltif edilib.

2000-ci ildə - Parlamentdə Azərbaycanın Avropa Şurasına tam hüquqlu üzv qəbul olunduqdan sonra yerinə yetirməli olduğu öhdəliklər sənədi qəbul olunub. Avropa Şurası Parlament Assambleyasının Siyasi Komitəsinin tərtib etdiyi öhdəliklər siyahısı Milli Məclisdə təmsil olunmuş siyasi partiyaların nümayəndələri tərəfindən imzalanıb.

2016-cı ildə - Azərbaycan Silahlı Qüvvələrinin kiçik çavuşu Elşad Raquf oğlu Abbaszadə Azərbaycan-Ermənistan təmas xəttində ermənilərin atəşkəs rejimini pozması nəticəsində şəhid olub, ölümündən sonra "Hərbi xidmətdə fərqlənməyə görə" III dərəcəli medalı ilə təltif edilib.