1159    

28/03/2017

1886-cı ildə - Azərbaycan teatrının görkəmli simalarından biri, SSRİ xalq artisti Ruhulla Fətulla oğlu Axundov (Sidqi Ruhulla) (1886-1959) anadan olmuşdur.

1895-ci ildə - Tənqidçi, ədəbiyyatşünas, tərcüməçi, Azərbaycan Yazıçılar Birliyinin üzvü, filologiya elmləri doktoru, professor, Azərbaycanın Əməkdar elm xadimi Əziz Qurbanəli oğlu Şərifzadə (Əziz Şərif) (1895-1988) Naxçıvan şəhərində anadan olmuşdur.

1918-ci ildə - İsmayıl xan Ziyadxanovun rəhbərliyi ilə Şamaxının müdafiəsinə yetişən milis dəstələri qısa vaxt ərzində Şamaxını rus və erməni dəstələrindən azad etdi. Ermənilər Malokan kəndi olan Qozlu çaya çəkildilər. İsmayıl xan bu kəndin ağsaqqallarını dəvət edərək erməniləri təhvil vermələrini, ya da onları kənddən çıxarmalarını tələb etdi. Malokanlar iki gün vaxt istədilər. İki gün sonra Bakıdan əlavə kömək gələndən sonra verdikləri sözdən imtina etdilər.

1919-cu ildə - Azərbaycanda ilk milli təhlükəsizlik orqanı yaradılıb. Azərbaycan Cümhuriyyətinin hərbi naziri Səməd bəy Mehmandarovun əmri ilə nazirlik tərkibində kəşfiyyat və əks-kəşfiyyat bölməsi (kvartirmeyster) təşkil edilib. Qurumun ilk rəhbəri Məmmədbağır Şeyxzamanlı, sonra onun qardaşı Nağı Şeyxzamanlı təyin edilib. Sovetləşmədən sonra təşkilatın üzvləri repressiyalara məruz qalib, M.Şeyxzamanlı başda olmaqla əksər rəhbər heyət güllələnib, N.Şeyxzamanlı Türkiyəyə mühacirət edib. Sovet dövründə qurum əvvəlcə Fövqəladə Komissiya ("ÇK") adlanıb, bir müddət Daxili İşlər Xalq Komissarlığının ("NKVD") tərkibində fəaliyyət göstərib, sonra Dövlət Təhlükəsizlik Komitəsi təşkil olunub. 1967-ci ilədək respublikanın təhlükəsizlik orqanlarına qeyri-azərbaycanlılar rəhbərlik ediblər. Həmin il general Heydər Əliyev Azərbaycan DTK-nın sədri təyin olunub. Azərbaycan müstəqilliyini bərpa etdikdən sonra, 1991-ci il noyabrın 1-də Milli Təhlükəsizlik Nazirliyi yaranıb. Prezident Heydər Əliyevin 1997-ci il 23 mart tarixli fərmanı ilə 28 mart - Milli təhlükəsizlik orqanları işçilərinin peşə bayramı günü elan olunub.

1924-cü ildə - Görkəmli şair, publisist Teymur Süleyman oğlu Əliyev (Tеymur Еlçin) (1924-1992) Şuşa şəhərində anadan olmuşdur.

1946-cı ildə - Təbrizdə Azərbaycan Dövlət Teatrı fəaliyyətə başladı. 

1992-ci ildə - Azərbaycan Suriya Ərəb Respublikası ilə diplomatik münasibətlər qurub. 

1993-cü ildə - Kəlbəcərin mühüm strateji əhəmiyyətə malik Qaraqaya yüksəkliyi ermənilər tərəfindən zəbt edildi. Bir gün sonra Başıbel-Tunel yolu zəbt edildi. 

1994-cü ildə - Gədəbəy cəbhə bölgəsinin baş komandanı, Hərbçi və alay komandiri, “Dəmir polkovnik” ləqəbli Cahangir İsgəndər oğlu Rüstəmov (1939-1994) maşında mina partladılması nəticəsində həlak olmuşdur. 

2014-cü ildə - Türkiyədə Xocalı soyqırımına aid ilk abidə Ankarada ucaldılmışdır.