1157    

28/03/2017

1803-cü ildə - Gürcü çarlıqlarını ələ keçirən Rusiya qoşunları Azərbaycanın şimal-qərbinə - Car-Balakənə hücum ediblər. Car Çar Rusiyası tərəfindən işğal edildi. 

1920-ci ildə - Əsgəran ətrafındakı bütün yüksəkliklər erməni silahlılarının əlində idi. Azərbaycan qoşun hissələrinin Əsgəran istiqamətində hücumu başladı. Əsgəranın möhkəmləndirilmiş mövqelərinin tutulması üçün hücum şose yolu boyu Xanabadadək aparılmalı idi. Döyüşə partizan dəstələri də cəlb edilmişdi. Onlar 3360 nömrəli hündürlük istiqamətində hərəkət etməli idilər. Xramort (Pirlər) kəndi istiqamətində Parlament mühafizə dəstəsi, Daşbaşı kəndi istiqamətində isə Bakı piyada alayının bölmələri irəliləməli idi. Lakin ilk hücum uğurla nəticələnmədi. 

1959-cu ildə - Azərbaycanın Milli Qəhrəmanı, Qarabağ müharibəsi şəhidi İlqar Sədi oğlu İsmayılov (1959-1992) Bakı şəhərində anadan olmuşdur. 

1964-cü ildə - Azərbaycanın Milli Qəhrəmanı, Qarabağ müharibəsi şəhidi Etibar Bəylər oğlu İsmayılov (1964-1994) Ağcabədi rayonunun Hindarx kəndində anadan olmuşdur. 

1974-cü ildə - Azərbaycanın Milli Qəhrəmanı Fariz Çoban oğlu Qəhrəmanov Bərdə rayonunun Xəsili kəndində anadan olmuşdur.

1992-ci ildə - Azərbaycanın Milli Qəhrəmanı, Qarabağ müharibəsində Daşaltı, Malıbəyli, Qaladərəsi kimi mühüm əməliyyatlarda iştirak etmiş Nizami Murad oğlu Məmmədov (1958-1992) şəhid olur. 

1992-ci ildə - Azərbaycanın Milli Qəhrəmanı, Qarabağ müharibəsi iştirakçısı Tabil Qasım oğlu Həsənov (1960-1992) Xocalının Kosalar kəndi istiqamətində gedən döyüşlərdə şəhid olmuşdur. 

1992-ci ildə - Azərbaycanın Milli Qəhrəmanı, Qarabağ müharibəsi şəhidi Cəmil Səmədxan oğlu Niftəliyev (1968-1992) Ağdamın Şelli kəndi uğrunda gedən döyüşlərdə şəhid oldu. 

1993-cü ildə - Erməni və rus birləşmələri, Nəreştar-Keçiliqaya, Mərcimək-Zülfüqarlı yaşayış məntəqələri istiqamətində hücuma keçərək, Kəlbəcər rayonu sakinlərindən təşkil edilmiş 2-ci və 3-cü özünümüdafiə bölüklərini dağıtmış, briqadanın 1-ci taboru faktiki mühasirə vəziyyətinə düşmüşdü. Kəlbəcər və Laçında yerləşən briqada və başqa bölmələr sağ cinahdan Ermənistan sərhədi boyunca erməni və rus ordu birləşmələri, cəbhə və sol cinahdan Qarabağ erməni ordusu və erməni birləşmələri, arxada isə keçilməz Murovdağ silsiləsi əhatəsində idi. 

1994-cü ildə - Milli Məclisdə 1990-cı il 20 Yanvar hadisələri ilə bağlı iki aya yaxın sürən müzakirələr yekunlaşıb. Parlament 20 Yanvara geniş hüquqi-siyasi qiymət verən qərar qəbul edib.

2001-ci ildə - Prezident Heydər Əliyev II Özəlləşdirmə Proqramına əsasən, rabitə, nəqliyyat, balıqçılıq, nəşriyyat-poliqrafiya və digər sahələr üzrə dövlət müəssisələrinin özəlləşdirilməsinə dair sənədlər paketini (10-dək sərəncam) imzalayıb.