1033    

04/04/2017

1905-ci ildə - Tanınmış rəssam, Azərbaycan Rəssamlar İttifaqının ilk sədri İsmayıl Axundov (1905-1969) anadan olmuşdur.

1909-cu ildə - Görkəmli bəstəkar Asəf Zeynallı (1909-1932) Dərbənd şəhərində anadan olub. Azərbaycan musiqi mədəniyyəti tarixində bir sıra yeni janrın yaradıcısı kimi tanınıb, simfonik, kamera-vokal və instrumental əsərlər bəstələyib.

1912-ci ildə - Aprelin 5-8-də Xaçmaz rayonunda Şollar-Bakı su kəmərinin inşaatçıları tətil etdilər. Onlar İngiltərə "Qriffıs və K°" firmasından əmək haqqının artırılması və iş gününün qısaldılmasını tələb edirdilər.

1944-cü ildə - Belorusiya uğrunda döyüşlərdə qvardiya mayoru Əliheydər İbrahimovun komandanlığı altında süvari diviziya Razdalnaya stansiyasına qəflətən hücum edərək faşist qarnizonunu darmadağın etmiş, 400-ə yaxın faşisti əsir almış, üç lokomotiv və çoxlu döyüş sursatı yüklənmiş beş qatar ələ keçirmişdi. Qvardiyaçılar Almaniyaya zorla aparılan çoxlu sovet vətəndaşını azad etmişdilər. Döyüşü məharətlə idarə etdiyinə görə Ə.İbrahimov Aleksandr Nevski, həmçinin "Qırmızı Bayraq" ordenləri ilə təltif olunmuşdu.

1991-ci ildə - Naxçıvan Muxtar Respublikasının Ali Məclisinin sədri Afiyəddin Cəlilov vəzifəsindən azad edildi. 

1993-cü ildə - Azərbaycan Respublikası ilə Malayziya (ölkəmizin müstəqilliyini 1991-ci il dekabrın 31-də tanıyıb) arasında diplomatik əlaqələr qurulub.

1994-cü ildə - Azərbaycan Respublikasının Prezidenti Heydər Əliyev xarici ticarəti sərbəstləşdirmək haqqında Fərman verdi. Xarici iqtisadi əlaqələr liberallaşdırıldı, həm fiziki, həm də hüquqi şəxslərə azad surətdə xarici ticarət hüququ verildi.  

2004-cü ildə - Azərbaycan Çad və Şərqi Timor dövlətləri ilə diplomatik münasibətlər qurub.