1022    

07/04/2017

1906-cı ildə - Azərbaycanın ilk satirik jurnalı olan "Molla Nəsrəddin"in birinci sayı çapdan çıxıb. C.Məmmədquluzadənin redaktoru olduğu jurnal 1906-1918-ci illərdə Tiflisdə, 1921-ci ildə Təbrizdə, 1922-1931-ci illərdə Bakıda nəşr edilib. Jurnalda dövrün mütərəqqi ziyalıları Ö.F.Nemanzadə, M.Ə.Sabir, Ə.Haqverdiyev, Ə.Nəzmi, Ə.Əzimzadə və başqaları fəaliyyət göstərirdilər.

1919-cu ildə - Bakı əhalisindən Azərbaycan Cümhuriyyəti daxili işlər nazirinin adına ingilis əsgərləri tərəfindən törədilən biabırçılıqlar haqqında şikayət daxil olmuşdu. "Əsgərlər özlərini o qədər sırtıq, biabırçı və ədəbsiz aparırlar ki, qadınlar ingilis əsgəri küçədə olanda, oraya qətiyyən çıxa bilmirlər". İngilis hərbçiləri tərəfindən yerli vətəndaşların döyülməsi halları da olmuşdu. Bakı kəndləri sakinlərindən də yerli əhalini ingilis əsgərləninin qarət etməsi, onlardan zorla pul və ərzaq almaları haqqında şikayətlər daxil olurdu. İngilislər özbaşınalığı o dərəcəyə çatdırmışdılar ki, hətta Xarici İşlər Nazirliyinin ünvanına daxil olan diplomatik məktubları da açırdılar.  

1920-ci ildə - Təbrizdə Şeyx Məhəmməd Xiyabaninin başçılığı ilə üsyan başlanıb. Şəhərdə kütləvi çıxışlar hələ 1919-cu ilin avqustunda Britaniya-İran sazişinə etiraz olaraq başlamışdı. Sazişə əsasən, Cənubi Azərbaycandakı ingilis hərbi qüvvələrinə geniş hökmranlıq verilmişdi. Təbriz üsyanı qan tökülmədən qalib gəldi, Tehrandan göndərilmiş qüvvələr hadisələrə müdaxilə etməyə cəsarət göstərmədilər. İyunda Təbrizdə milli hökumət quruldu. Lakin onun ömrü az oldu və sentyabrda Xiyabaninin qətlə yetirilməsi ilə süqut etdi.

1946-cı ildə - Təbrizdə Azərbaycan radiosu fəaliyyətə başladı.

1959-cu ildə - Xalq yazıçısı Çingiz Akif oğlu Abdullayev Bakı şəhərində ziyalı ailəsində anadan olmuşdur. Detektiv janrında əsərləri dünyada məşhurluq qazanıb.

1992-ci ildə - Azərbaycanla İsrail dövləti arasında diplomatik əlaqalər qurulub.

1992-ci ildə - Azərbaycan Respublikası Hərbi-Dəniz Qüvvələri Qərargahı, mühafizə və təminat rotası yaradıldı. Xəzər Hərbi-dəniz donanmasının 25%-i və Ali Hərbi Dənizçilik məktəbi Azərbaycan Respublikasının ixtiyarına verildi.

2001-ci ildə - Ki Vestdə (ABŞ) Azərbaycan və Ermənistan prezidentləri Heydər Əliyev və Robert Koçaryan arasında dörd gün sürən danışıqlar nəticəsiz başa çatıb. Vasitəçilər növbəti danışıqların iyunda Cenevrədə keçiriləcəyini bəyan etsələr də, bu təşəbbüs reallaşmadı.