1007    

17/04/2017

1873-cü ildə - Mirzə Fətəli Axundovun "Hacı Qara" komediyası tamaşaya qoyuldu.

1884-cü ildə - Bəstəkar Zülfüqar Əbdülhüseyn oğlu Hacıbəyov (1884-1950) anadan olub. "Aşıq Qərib" operasının, musiqili komediyaların müəllifidir.

1899-cu ildə - Məşhur türkoloq, şərqşünas Əhməd Cəfəroğlu (1899-1976) Gəncədə anadan olub. Azərbaycanın sovetləşməsindən sonra Bakı Universitetində təhsilini yarımçıq qoyaraq Türkiyəyə gedib. İstanbul Universitetində çalışıb, Türkiyədə azərbaycanlı diasporunun tanınmış simalarından olub, "Azərbaycan yurd bilgisi" dərgisini nəşr etdirib.

1918-ci ildə - F.X.Xoyski Zaqafqaziya hökuməti qarşısında məruzə ilə çıxış etdi. Məruzədə deyilirdi: "Bakı hadisələri Yelizavetpol quberniyasının hər yerində müzakirə olunur və bütün qətnamələrdə Osmanlı qoşunlarının Bakıya buraxılması haqqında maddələr vardır, əgər hökumət Bakı məsələsini həll edə bilməsə, onda Yelizavetpol quberniyası müsəlmanlarının bu tələbini dinləməli olacaqdır. Və elə bir an yetişə bilər ki, xalq kütləsi özü hərəkət etməyə başlayar, bu da faciəvi vəziyyət yaradar, çünki Bakı məsələsi respublikanın olum və ya ölüm məsələsidir".

1924-cü ildə - Azərbaycan Kommunist (b) Partiyasının MK-nın Rəyasət Heyəti əvvəlki komissiyanın işini qeyri-qənaətbəxş saydı və Q.M.Musabəyovun sədrliyi ilə D.X.Bünyadzadə, A.N.Karakozov, İ.İ.Dovlatov, H.P.Cəbiyevdən ibarət yeni komissiya yaratmağı qərara aldı. Habelə "bütün Qarabağda millətlərarası möhkəm mehriban qonşuluq münasibətlərinin yaradılması ilə bağlı bütün başqa məsələləri aydınlaşdırmağı" ona həvalə etdi.

1928-ci ildə - SSRİ xalq artisti Lütfiyar İmanov (1928-2008) anadan olub. Opera və Balet Teatrının solisti kimi bir çox operalarda baş partiyaları ifa edib, Bakı Musiqi Akademiyasının professoru olub.

1938-ci ildə - Dövlət xadimi, fəlsəfə elmləri doktoru, akademik Ramiz Mehdiyev Bakıda anadan olub. Azərbaycan KP MK-nın katibi, Ali Sovetin, Milli Məclisin deputatı olub. 1995-ci ildən Azərbaycan Respublikası Prezidentinin İcra Aparatının rəhbəridir.

1994-cü ildə - Cəbhədə yaranmış kritik vəziyyətlə bağlı prezident Heydər Əliyevin sədrliyi ilə fövqəladə ümumrespublika müşavirəsi keçirilib. Prezident MDB-nin Moskva sammitində (14-15 aprel) Ermənistan rəhbəri L.Ter-Petrosyanla görüş barədə məlumat verib, atəşkəsin əldə olunması üçün danışıqların davam etdiyini bildirib.

1999-cu ildə - Bakı-Supsa neft kəməri istismara verilib. 827 km uzunluğunda olan və sutkalıq nəql həcmi 105 min barrel (ildə 5 milyon ton) olan kəmər Azərbaycanda "Əsrin müqaviləsi" çərçivəsində istehsal olunan "ilkin neftin" dünya bazarına çıxarılması üçün nəzərdə tutulmuşdu. Kəmərin tikintisi 590 milyon dollara başa gəlmişdi.