1309
17/04/2017 Aprelin 17-də Mərkəzi Elmi Kitabxanada AMEA Rəyasət Heyəti və bu qurumun Qafqazşünaslıq İnstitutunun birgə təşkilatçılığı ilə Qafqazşünasların Birinci Beynəlxalq Forumu öz işinə başladı. Forumun açılış mərasimi Azərbaycanın dövlət himninin səsləndirilməsi ilə başladı. AMEA-nın prezidenti, akademik Akif Əlizadə tədbiri giriş nitqi ilə açaraq tarixdə ilk dəfə keçirilən bu Forumun əhəmiyyətindən danışdı. Qeyd etdi ki, Qafqaz dünyanın diqqət mərkəzində olan və böyük dövlətlərin maraqlarının toqquşduğu regiondur. Akademik alimlərin Qafqaz regionunun geosiyasətinə, region dövlətlərində cərəyan edən hadisələrə, ictimai-siyasi, iqtisadi proseslərə, bu ölkələrin qarşılıqlı münasibətlərinə, böyük dövlətlərin regiona dair siyasətlərinə, münaqişələrə və terrorizmə dair elmi tədqiqatlar aparmalarına böyük ehtiyac olduğunu bildirdi: "Biz bunları əsas götürərək Qafqazşünasların Birinci Beynəlxalq Forumunu keçirməklə dünyanın müxtəlif ölkələrindən olan qafqazşünas alimləri çoxtərəfli formatda bir araya gətirmək, forum çərçivəsində onların ikitərəfli əməkdaşlığının əsasını qoymaq və perspektiv məsələlərə dair elmi müzakirələr aparmağı lazım bilmişik. Hesab edirəm ki, Qafqaz problemlərinə dair elmi-tədqiqat işləri aparan alimlərin bir-birini daha da yaxından tanımalarına, səylərini əlaqələndirmələrinə, çoxtərəfli və ikitərəfli formatlarda əməkdaşlıq etmələrinə ciddi ehtiyac var". Ermənistanın Azərbaycana qarşı hərbi təcavüzünə də toxunan A.Əlizadə qeyd etdi ki, bununla bağlı həqiqətlərin dünya ictimaiyyətinə çatdırılmasında alimlərin tədqiqatları mühüm rol oynayacaq. Sonra Prezident Administrasiyasının humanitar siyasət məsələləri şöbəsinin müdiri Fatma Abdullazadə Azərbaycan Prezidenti İlham Əliyevin Forum iştirakçılarına təbrik məktubunu oxudu. Tədbirdə Türk Tarix Qurumunun sədri, professor Rafiq Turan, Rusiya Elmlər Akademiyasının Cənub Elm Mərkəzinin sədri, akademik Gennadiy Matişov, Gürcüstan Elmlər Akademiyasının vitse-prezidenti, akademik Roin Metreveli, Çeçenistan Respublikası Elmlər Akademiyasının prezidenti, akademik Şaxrudin Qapurov, Böyük Britaniya Mərkəzi Asiya və Şərq Tədqiqatları Kral Cəmiyyətinin həqiqi üzvü Mixail Basxanov, ABŞ Koastal Karolina Universitetinin professori Kristofer Qann, AMEA-nın vitse-prezidenti, akademik İsa Həbibbəyli Qafqazla bağlı məlumatların gələcək nəsillərə çatdırılmasında qafqazşünas alimlərin rolunu, eləcə də beynəlxalq Forumun əhəmiyyətini xüsusi qeyd etdilər. Natiqlər Ermənistanın xalqımıza qarşı hərbi təcavüzü nəticəsində yaranmış Dağlıq Qarabağ münaqişəsi, Azərbaycan ərazilərinin işğalı və Xocalı soyqırımından, həmçinin mədəniyyət abidələrimizin məhv edilməsindən danışdılar. Daha sonra AMEA-nın “Azərbaycanlılara qarşı soyqırımı tədqiqatları” Komissiyası tərəfindən nəşr edilən Azərbaycan və xarici ölkə alimlərinin rus və ingilis dillərində yazılmış məqalələrindən ibarət “Soyqırımı həqiqətləri” kitabının təqdimat mərasimi də keçirildi. Nəşrlə bağlı çıxış edənlər əsərin elmi və tarixi əhəmiyyətindən danışdılar. Qeyd edildi ki, çap olunmuş kitab uzun illər boyunca mənfur qonşularımızın xalqımıza qarşı törətdikləri soyqırımlarının dərindən və hərtərəfli öyrənilməsində böyük rol oynayır. Tədbir çərçivəsində Ermənistanın Azərbaycana qarşı hərbi təcavüzü və onun nəticələrindən bəhs edən və müxtəlif dillərdə nəşr edilmiş əsərlərin sərgisi də nümayiş etdirildi. Forum öz işini bölmə iclaslarında davam etdirdi. Universitetlərin Qafqazşünaslıq ixtisası üzrə təhsil alan tələbələrinin də iştirak etdiyi bölmə iclaslarında “Qafqaz ölkələrinin sosial-iqtisadi və siyasi vəziyyəti”, “Qafqazın geosiyasəti”, “Böyük dövlətlərin və qonşu ölkələrin Qafqaz siyasəti”, “Qafqaz ölkələrinin qarşılıqlı münasibətləri”, “Qafqazda münaqişələr” mövzularında məruzələr dinləniləcək.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.