1341    

19/04/2017

AMEA Tarix İnstitutunun əməkdaşları Misir Ərəb Respublikasının Azərbaycandakı səfirliyinin mədəniyyət və təhsil mərkəzində fəaliyyət göstərən ərəb dili kurslarında biliklərini təkmilləşdirirlər. Ərəb dilini öyrənən tarixçilər iki qrupa bölünüb: ibtidai və ərəb dilinə bələd olan qrup. Məşğələlərin hər biri iki saat olmaqla həftədə iki dəfə keçirilir. Kursu bitirən alimlərə sonda sertifikat təqdimat ediləcək. Layihə alimlərin ərəb dilində olan mənbələrin əsaslı tədqiqi üçün ərəb dili üzrə bilik səviyyəsinin yaxşılaşdırılmasına yönəlib. Məqsəd tarixi təhrif və saxtakarlıqlardan təmizləməkdir. Qeyd edək ki, Tarix İnstitutunun əməkdaşlarının ərəb dili biliyinin səviyyəsini təkmilləşdirmək barədə qərar Elmi Şuranının Azərbaycanda İslam Həmrəyliyi ilinə həsr olunmuş iclasında qəbul edilmişdir. İclasın qonağı – MƏR səfirliyinin mədəniyyət və təhsil mərkəzinin direktoru Əhməd Sami Elaydi tarixçilərə ödənişsiz olaraq mərkəzin dil kurslarında iştirak etməkdən başqa mərkəzin kitabxanasının 10.000 kitabının elektron variantının verilməsini də təklif etmişdi. Bundan başqa Əhməd Sami Elaydi Tarix İnstitutuna Misir kitabxanalarında qorunub saxlanılan Azərbaycan tarixi üzrə mənbələrin tədqiqində kömək etməyə hazır olduğunu vurğulamışdı. İnstitutun direktoru, əməkdar elm xadimi Yaqub Mahmudovun sözlərinə görə iki müəssisə arasında əməkdaşlıq çərçivəsində ərəb ölkələrində Azərbaycanın dövlətçilik tarixi, o cümlədən də Qarabağ, İrəvan və Naxçıvan tarixi üzrə ərəb dilinə tərcümə edilmiş kitabların təqdimatı və təbliği təşkil ediləcək.  

mənbə: AMEA Tarix İnstitutu İctimaiyyətlə Əlaqələr Şöbəsi