927    

20/04/2017

1812-ci ildə - Çar Rusiyasının generalı Rtişşev Zaqafqaziya diyarını idarə etməyə və buradakı rus qoşunlarına komandanlığa başlayanda Qacarlarla sülh bağlamaq göstərişi aldı. Rusiya demarkasiya xəttinin Kür, Araz və Arpaçay çayları boyunca keçməsi barədə əvvəllər irəli sürülən təkliflərdən imtina edir və sərhədi işğaldan sonra necə varsa elə qurmağa razılaşırdı. Lakin danışıqlar uzandı, çünki Abbas Mirzə ərazi güzəştləri tələb edirdi.

1827-ci ildə - Qacarlarla müharibənin (1826-1828) gedişində Azərbaycanın cənubuna doğru irəliləyən rus qoşunları Araz çayı üzərindəki Xudafərin körpüsünü (Cəbrayıl rayonu ərazisində) tutublar. Strateji əhəmiyyətli körpünün ələ keçirilməsi rus qoşunlarının cənubdan Naxçıvan xanlığına hücumlarına imkan yaratdı. May ayında Naxçıvan işğal olundu.

1885-ci ildə - Tanınmış pediatr, Azərbaycan səhiyyə sistemində mühüm xidmətləri olmuş professor Əbülfəz Fərəc oğlu Qarayev (1885-1952) anadan olub.

1894-cü ildə - Xalq artisti, aktyor və rejissor Rza Abbasqulu oğlu Təhmasib (1894-1980) Naxçıvanda anadan olub. Bir çox tamaşalara, "Səbuhi", "Bəxtiyar", "Onu bağışlamaq olarmı?" və s. filmlərə quruluş verib.

1916-cı ildə - Xalq artisti, milli teatr sənətimizin görkəmli nümayəndəsi Nəsibə Cahangir qızı Zeynalova (1917-2004) anadan olub.

1929-cu ildə - Azərbaycan Yazıçılar Birliyinin üzvü, professor, əməkdar incəsənət xadimi, nasir, tənqidçi, ədəbiyyatşünas, tərcüməçi, filologiya elmləri doktoru Çingiz Həsən oğlu Hüseynov Bakı şəhərində anadan olmuşdur. 

1964-cü ildə - Azərbaycanın Milli Qəhrəmanı Rəfael Hacı Şərafət oğlu Həbibov (1964-1992) Əli Bayramlı şəhərində (indiki Şirvan) anadan olmuşdur. 

1991-ci ildə - Qarabağa Xalq Yardımı Komitəsinin sədr müavini, Azərbaycan Yazıçılar Birliyi katibliyi heyətin üzvü, Respublika Ali Sovetinin millətlərarası münasibətlər üzrə daimi komissiyasının sədri, Ali Sovetin deputatı Aydın Məmmədov və Azərbaycan Yazıçılar Birliyinin üzvü, Gürcüstanın Əməkdar mədəniyyət işçisi, Azərbaycan Respublikası Ali Sovetinin deputatı, filologiya elmləri doktoru Dilarə Əliyeva seçicilərlə görüşdən qayıdarkən Qax rayonu ərazisində avtomobil qəzasında həlak olublar. Hər iki deputat parlamentdə "Demokratik Azərbaycan" blokunun aktiv üzvləri idilər.

1992-ci ildə - Azərbaycanla Estoniya arasında diplomatik əlaqələr yaradılıb.

1997-ci ildə - Prezident Heydər Əliyev "Kitabi Dədə Qorqud"un 1300 illiyinin genişşəkildə qeyd olunması haqqında fərman imzalayıb. Tarixi yubiley 2000-ci ilin aprelində UNESCO səviyyəsində qeyd olundu.

2004-cü ildə - Azərbaycanla Paraqvay arasında diplomatik münasibətlər qurulub.