1034    

22/04/2017

1841-ci ildə - Çar Rusiyasının Qafqaz Baş İdarə Şurasının qərarı ilə Qazax, Şəmsəddil və Borçalıda azərbaycanlı bəy və ağalar torpaq sahibliyindən məhrum edilib, mülkləri müsadirə edilib. Eyni qərar həmin ilin mayında Xəzəryanı bölgələr üçün də verildi. Bunun ardınca bölgələrdə kəndli çıxışları başlandı və 1842-ci ildə ağa və bəy torpaqlarının müsadirəsi dayandırıldı.

1905-ci ildə - Şair, ədəbiyyatşünas, tənqidçi, Azərbaycan Yazıçılar Birliyinin üzvü, filologiya elmləri doktoru, professor Mikayıl Həsən oğlu Rəfili (1905 – 1958) Qasım İsmayılov rayonunun (indiki Goranboy rayonu) Borsunlu kəndində varlı kəndli ailəsində doğulmuşdur. 

1911-ci ildә - Üzeyir bəy Hacıbəyovun "O olmasın, bu olsun" əsərinin ilk tamaşası Bakıda olmuşdur.

1914-cü ildə - Görkəmli teatr və kino aktyoru, əməkdar artist və xalq artisti Məmməd İsmayıl oğlu Bürcəliyev (1914-1994) Şəki şəhərində anadan olmuşdur.

1918-ci ildə - Bakıda hakimiyyəti ələ almış "Bakı Soveti"nin hökuməti - Stepan Şaumyanın sədrliyi ilə Xalq Komissarları Soveti yaradılıb. Tarixə "26 Bakı komissarı" adı ilı düşən qurum Leninin tapşırığı ilə Azərbaycanı sovetləşdirmək əzmində idi. "Bakı Kommunası"nda aparıcı vəzifələri ermənilər tuturdular, hökumətdə yeganə azərbaycanlı Məşədi Əzizbəyov idi. Bakı Kommunası Tiflisdə fəaliyyət göstərən Zaqafqaziya Seyminə qarşı yaradılmışdı. Hər iki qurumda təmsil olunan ermənilər isə əslində əlbir fəaliyyət göstərirdilər.

1919-cu ildə - Azərbaycanın cənub bölgəsində bolşeviklər tərəfindən qızışdırılan rus əhalisinin Xalq Cümhuriyyətinə qarşı qiyamı başlanıb. Qiyamçılar bölgəni "Muğan Sovet Respublikası" elan ediblər. Qiyam iyulun sonunda hökumət qüvvələri tərəfindən yatırıldı.

1919-cu ildə - Cənubi Qafqaz dövlətləri arasındakı ərazi mübahisələrini müzakirə etmək üçün Tiflisdə konfrans çağırıldı. Lakin konkret nəticə verməyən Tiflis konfransı da iyunda işini dayandırdı.

1945-ci ildə - II Dünya müharibəsinin gedişində Berlinin alınmasında iştirak edən Mayor Mövlan Məzahir oğlu Əliyev SSRI Ali Soveti Rəyasət heyətinin qərarına əsasən SSRI Ali baş komandanı, marşal I.V.Stalinin əmri ilə Mövlan Əliyev təşəkkür alır və daha sonra 09 may 1945-ci ildə "Almaniya üzərində qələbə" uğrunda medalla təltif edilir. 

1969-cu ildə - Azərbaycan Milli Qəhrəmanı Albert Aqarunoviç Aqarunov (1969-1992) Bakı şəhərində anadan olmuşdur. 

1980-ci ildə - Azərbaycan SSR-in Əməkdar incəsənət xadimi, SSRİ-nin Xalq rəssamı və SSRİ  Rəssamlıq Akademiyasının həqiqi üzvü, 1-ci dərəcəli Stalin mükafatı laureatı, heykəltəraş Pinxos Vladimiroviç Sabsay (1893-1980) Bakıda vəfat etmiş, Fəxri Xiyabanda dəfn edilmişdir.

1994-cü ildə - Ağdamın Cəvahirli kəndi Ermənistan Ordusu tərəfindən işğal olunmuşdur. 

1997-ci ildə - Azərbaycan Avropa Mədəniyyət Konvensiyasına qoşulmuşdur.

1999-cu ildə - Vaşinqtonda NATO sammiti çərçivəsində Azərbaycan, Ukrayna, Gürcüstan, Moldova və Özbəkistan prezidentlərinin görüşü keçirilib, Özbəkistan GUAM əməkdaşlıq qrupuna qəbul olunub. Özbəkistan 2002-ci ildə GUAM-da fəaliyyətini dayandırdı, 2005-ci ildə qurumu tərk etdi. 

2008-ci ildə - Milli Məclisdə Xanlar rayonun Göygöl rayonu adlandırılması haqqında qərar qəbul edildi.