1153    

16/01/2017

1807-ci ildə - Napoleon Qacar hökmdarı Fətəli şaha yazırdı ki, Rusiya üzərində qələbə "məni səninlə yaxınlaşdırır", ona görə də Rusiya üzərinə hücum etməyi, Zaqafqaziyanı tutmağı, "Xəzər dənizini ruslardan ötrü bağlamağı" məsləhət görürdü. O, "üç dövlətin əbədi ittifaqını" (yəni Fransa, Qacarlar və Osmanlının ittifaqını) yaratmağa çağırırdı. Fətəli şah öz növbəsində Napoleonun yanına çox zəngin hədiyyələrlə nümayəndə heyəti göndərdi və ittifaq bağlamağı təklif etdi. Nəticədə iki dövlət arasında 1808-ci il yanvarın 21-də müqavilə imzalandı. 

1915-ci ildə - I Dünya müharibəsi gedişində Qafqaz cəbhəsində Türkiyə (Osmanlı) qoşunlarını məğlub edən Rusiya qoşunları oradan İrana (Cənubi Azərbaycana) keçərək Təbrizə yaxınlaşıblar. Üç gündən sonra (yanvarın 20-si) Təbriz rus qoşunları tərəfindən işğal olundu.

1920-ci ildə - Azərbaycan Cümhuriyyətinin nümayəndələrinin qaldığı "Klaric" mehmanxanasında H.Vilsonun sədrliyi altında admiral Bitti, İngiltərə Xarici İşlər Nazirliyinin nümayəndəsi Robert Vansittart, həmçinin Azərbaycan və Gürcüstan nümayəndələrinin iştirak etdikləri müşavirə keçirildi. Müşavirənin əsas məqsədi bolşevik basqını təhlükəsi qarşısında qalan Azərbaycan və Gürcüstana maddi kömək göstərilməsi ilə bağlı məsələlərin aydınlaşdırılması idi. Bununla belə, iclasda Qafqaza müttəfiq qoşunları vasitəsilə kömək etmək məsələsi müzakirəyə çıxarılmadı. Yalnız hərbi sursat və ərzaq məhsulları göndərilməsi çərçivəsində yardım göstərmək məsələsinə toxunuldu. Admiral Bittinin Azərbaycanın xaricdən kömək almadan Xəzər dənizi sahillərini qorumaq üçün öz hərbi-dəniz qüvvələrini yarada bilməsi sualına Ə.M.Topçubaşov mənfi cavab verdi.

1926-cı ildə - Tanınmış şairə, əməkdar incəsənət xadimi Mədinə Gülgün (1926-1992) anadan olmuşdur. 1938-ci ildə ailəsi ilə birlikdə Ərdəbil şəhərinə gəlmişdir, Cənubi Azərbaycanda milli azadlıq və demokratiya uğrunda hərəkatın (1941-1946) fəal iştirakçısı olmuşdur. 

1990-cı ildə - Yanvarın 17-dən Bakıda Azərbaycan Kommunist Partiyasının Mərkəzi Komitəsinin binası qarşısında izdihamlı mitinq başlandı, ümumi tətil elan olundu. Tələb edildi ki, Moskva Ermənistanın Azərbaycana ərazi iddialarına qəti son qoysun, imperiyanın Bakıya və ətrafına yığdığı qoşunlar Dağlıq Qarabağa və daim erməni basqınlarına məruz qalan sərhəd bölgələrinə göndərilsin. 

1992-ci ildə - Azərbaycan Respublikasının Ali Sovetin Milli Şurası (1991-1992-ci illərdə qanunverici orqan funksiyasını yerinə yetirən orqan) 20 Yanvarın "Şəhidlər günü" elan olunması haqqında" qanun qəbul edib. Qanuna əsasən, yanvarın 20-si ölkə ərazisində qeyri-iş günü elan olunub.

1994-cü ildə - Azərbaycan Milli Ordusunun birləşmələri Qarabağ cəbhəsinin Füzuli istiqamətində Ermənistan silahlı qüvvələrinin yenidən hücuma keçmək cəhdinin qarşısını alıblar. 

2001-ci ildə - Avropa Şurası Nazirlər Komitəsi Azərbaycanın təşkilata tamhüquqlu üzv qəbul olunması haqqında qərar qəbul edib.