961    

29/04/2017

1909-cu ildə - Rus qoşunları Təbrizə daxil oldu və Təbriz üsyanı yatırıldı. Təbriz üsyanı Rəşt və İsfahanda üsyanların uğurla başa çatmasına, üsyançıların Tehrana yürüşünə, eyni zamanda Məhəmmədəli şahın hakimiyyətdən devrilməsinə (16 iyul 1909-cu il) və Konstitusiyanın bərpa olunmasına səbəb oldu.

1918-ci ildə - Erməni-daşnak quldur dəstələri Gümrü (o vaxtkı Aleksandropol) şəhəri yaxınlığında türk-müsəlman əhaliyə qarşı soyqırım həyata keçiriblər. Əksəriyyəti qadın və uşaqlar olmaqla 3 min nəfər qətlə yetirilib. İki gün sonra (1 may) erməni dəstələri Qars yaxınlığındakı Şiştəpə və Düzkənd kəndlərində 600 nəfər türk-müsəlman əhalini öldürüblər.

1919-cu ildə - Görkəmli kinorejissor, Azərbaycanın Xalq artisti Əjdər Mütəllim oğlu İbrahimov (1919-1993) Aşqabadda anadan olmuşdur. 

1919-cu ildə - "Müsavat" Partiyasının təşkil etdiyi fəhlə konfransı keçirildi. Burada çıxış edən fəhlə-natiqlər 1 May bayramının beynəlxalq xarakter daşıdığını göstərir, eyni zamanda qeyd edirdilər ki, onlar bu bayramın əhəmiyyətini yalnız müstəqilliyə nail olduqdan sonra anlayıblar. İki anlayışı beynəlmiləlçilik və milli müstəqilliyi vəhdətdə görən konfrans iştirakçıları 1 May nümayişinə yeni şüarla - "Yaşasın müstəqil Azərbaycan!" şüarı ilə çıxmağı qət etdilər. 

1920-ci ildə - Azərbaycan İnqilab Komitəsi Azərbaycan ordusunu fəhlə-kəndli ordusu zəminində yenidən təşkil etməyə başlamağı qərara aldı, hərbi-dəniz komissarı Ç.İ.İldınma  tapşırıldı  ki  respublikanın  müdafıəsi  üçün  zəhmətkeşlərin səfərbərliyə alınmasını elan etsin. 

1952-ci ildə - Tarix elmləri namizədi, dosent, Bakı Dövlət Universitetinin Tarix fakültəsinin dekanı Azad Əhmədağa oğlu Rzayev Bakı şəhərində anadan olmuşdur. 

1979-cu ildə - Tənqidçi, ədəbiyyatşünas, Azərbaycan Yazıçılar Birliyinin üzvü, filologiya elmləri doktoru Hidayat Əli oğlu Əfəndiyev (1908-1979) vəfat etdi. 

1992-ci ildə - Azərbaycan Cənubi Afrika Respublikası ilə diplomatik əlaqələr qurub.

1993-cü ildə - İslam Konfransı Təşkilatı Ermənistanın Azərbaycana hərbi təcavüzünü və Azərbaycan torpaqlarının işğalını pisləyən qətnamə qəbul edib.

2002-ci ildə - Trabzon şəhərində Türkiyə, Azərbaycan və Gürcüstan prezidentləri Əhməd Necdət Sezər, Heydər Əliyev və Eduard Şevardnadzenin iştirakı ilə təhlükəsizlik məsələlərinə həsr olunmuş zirvə görüşü keçirilib. Sammitin yekunu olaraq üç ölkənin daxili işlər nazirləri "Terrorizmin və ekstremizmin digər təzahürləri ilə mübarizə sahəsində əməkdaşlıq haqqında" saziş imzalayıblar.

2004-cü ildə - Prezident İlham Əliyev Strasburqda Avropa Şurası Parlament Assambleyasının yaz sessiyasında çıxış edib. Dövlət başçısı AŞPA-nın fəxri üzvü diplomu və xatirə medalı ilə təltif olunub.