1124
30/04/2017 1848-ci ildə - Şamaxıda xeyriyyə cəmiyyəti tərəfindən ibtidai məktəb sinfi olan Müdəqqəs Nina məktəbi açıldı.
1918-ci ildə - Şaumyanın başçılıq etdiyi Bakı Kommunası şəhərdə bütün legitim dövlət qurumlarını, o cümlədən Bakı Şəhər Dumasını devirib.
1920-ci ildə - Azərbaycan hökuməti Ermənistanın daşnak hökumətinə nota göndərərək tələb etdi: "1. Qarabağ və Zəngəzur ərazilərindən qoşunlarınızı çıxarın. 2. Öz sərhədlərinizə çəkilin. 3.Millətlərarası ədavətə son qoyun. Əks halda Azərbaycan Sovet Sosialist Respublikasının İnqilab Komitəsi özünü Ermənistan Respublikası hökuməti ilə müharibə vəziyyətində hesab edəcək". Qarabağda və Zəngəzurda yerləşən Azərbaycan qoşun hissələrinə hücumu dayandırmaq, əlverişli mövqe tutaraq müdafiə vəziyyətinə keçmək əmri verildi. Əmrdə bildirilirdi ki, Ermənistan ultimatumda göstərilən şərtləri yerinə yetirməsə, Qızıl ordu Azərbaycan hissələrinə köməyə göndəriləcəkdir. Təbii ki bu kömək deyil, sadəcə işğala bir forma vermək idi.
1937-ci ildə - Opera və Balet Teatrında Üzeyir Hacıbəyovun şah əsəri olan "Koroğlu" operasının (librettonun müəllifləri Q.İsmayılov və M.S Ordubadi) ilk tamaşası keçirilib.
1985-ci ildə - Azərbaycan SSR Elmlər Akademiyasının həqiqi üzvü, Azərbaycan SSR EA-nın Genetika və Seleksiya İnstitutunun Tut bitkisinin genetika və seleksiyası şöbəsinin müdiri, “Qırmızı Əmək Bayrağı”, “Şərəf Nişanı”, SSRİ medalları və SSRİ XTNS-nin qızıl medalları ilə təltif edilmiş İlyas Kərim oğlu Abdullayev (1913-1985) Bakı şəhərində vəfat etmişdir.
1991-ci ildə - Dağlıq Qarabağda və ətraf rayonlarda qanunsuz silahlı birləşmələrin tərksilah edilməsi ilə bağlı əməliyyat başlanıb. SSRİ Daxili Qoşunlarının iştirakı ilə keçirilən əməliyyatın məqsədi Azərbaycanı SSRİ-nin tərkibində saxlamaq, ittifaq referendumunu (17 mart 1991) boykot etmiş Ermənistana isə gözdağı vermək idi. Əməliyyat nəticəsində Xanlar (Göygöl) rayonunun Çaykənd qəsəbəsi, Hadrut (Xocavənd) rayonunun kəndləri erməni silahlı qüvvələrindən təmizlənib. Lakin Moskvanın Azərbaycana "üzgörənliyi" çox çəkmədi və 1991-ci ilin payızında Dağlıq Qarabağda azərbaycanlı əhaliyə qarşı etnik təmizləmə başlandı.
1993-cü ildə - BMT Təhlükəsizlik Şurası (TŞ) Azərbaycanla Ermənistan arasında münasibətlərə dair 822 saylı qətnamə qəbul edib. Qətnamə bir qədər əvvəl (6 aprel 1993) qəbul olunmuş "Ermənistan Respublikası ilə Azərbaycan Respublikası arasında münasibətlərin pisləşməsi barədə" TŞ sədrinin bəyanatına əsaslanmışdı. Sənəddə Kəlbəcərin "yerli erməni qüvvələri" tərəfindən işğal edildiyi vurğulanırdı. BMT TŞ-nin Dağlıq Qarabağ münaqişəsinə dair sonrakı qətnamələri (853, 874, 884) də bu sənədin fəlsəfəsinə köklənib və Ermənistanın Azərbaycana qarşı hərbi təcavüz faktını diqqətdənkənar qoyur.
1996-cı ildə - Azərbaycan Respublikası Andorra ilə diplomatik əlaqələr qurmuşdur.
2009-cu ildə - Azərbaycan Dövlət Neft Akademiyasına silahlı hücum baş vermişdir. Neft Akademiyasının 2-ci tədris binasında cəmiyyətin müxtəlif təbəqələrindən olan şəxslər güllələnmişdi. Akademiyaya süd məhsulları gətirən qadından tutmuş elmin yüksək dərəcəsinə çatmış professora qədər... Ağıllarına belə gətirməzdilər ki, onların alın yazıları məhz bu yerdə qanla yazılmışdır. Səhər saatlarında Dilarə Əliyeva küçəsi 227 saylı ünvanda yerləşən Qaz neft mədən və Neft mexanikası fakültələrinin yerləşdiyi binada baş vermiş gözlənilməz hadisə akademiyada olanları təşvişə salmışdı. Hadisədən xəbər tutan hər kəs auditoriyaların qapılarını arxadan bağlayıb qatilin əlindən canını qurtarmaq üçün binanın pəncərələrindən boylanaraq qışqırıb kömək istəyirdi. Təhsil ocağının giriş pilləkənindən tutmuş yuxarı mərtəbələrinədək hər yer qan içində idi. Dəhlizdə yaralılar və cansız bədənlər var idi. Silahlı terrorçunun atdığı güllələr müəllim və tələbələrinin əsasən baş və boyun nahiyəsindən dəymişdi. Gülləyə tuş gələnlərin içərisində akademiyanın professoru, laborantları, tələbələri, dosenti, müəllimləri var idi.
2010-cu ildə - Əməkdar artist, xalq artisti fəxri adlarına layiq görülmüş, müstəqil Azərbaycan Respublikasının ali mükafatı - “İstiqlal” ordeni ilə təltif edilmiş Əminə Paşa qızı Dilbazi (1919-2010) Bakı şəhərində vəfat etmiş, II Fəxri Xiyabanda dəfn olunmuşdur.