959    

02/05/2017

1907-ci ildə - Dramaturq, Azərbaycan Yazıçılar Birliyinin üzvü, Azərbaycanın əməkdar artisti Məcid Baba oğlu Şamxalov (1907-1984) Ağdam rayonunun Gülablı kəndində anadan olmuşdur. 

1920-ci ildə - Q.K.Orconikidze və S.M.Kirovun Bakıdan V.İ.Leninə göndərdikləri məlum birgə teleqramın 1969-cu ildə şifrəsi açılmış sonuncu hissəsi Azərbaycanda Sovet hakimiyyətinin qurulmasının sadəcə formal bir addım olmasını açıq aşkar təsdiqləyir: "Sizin Azərbaycana təbrikiniz və onu ümumi şəkildə tanımağınız zəruridir. Sovet Rusiyası ilə hərbi-təsərrüfat, iqtisadi cəhətdən birləşməni həyata keçirəcəyik. Təcrübə bütün Qafqaz üçün bizə bundan sonra da Xalq Komissarları Sovetinin səlahiyyətlərinin verilməsini tələb edir. Bunları bizə radio ilə verin, yaxud kimisə göndərin, ancaq tezliklə. Nərimanova belə səlahiyyətlər verməyin". 

1921-ci ildə - Rusiya Kommunist bolşevik Partiyasının Mərkəzi Komitəsinin Qafqaz bürosu Zaqafqaziya respublikaları arasında gömrükxanaları və sərhəd postlarını ləğv etməyi qərara aldı.

1929-cu ildə - Görkəmli alim, dövlət mükafatı laureatı, əməkdar elm xadim, dilçi-türkoloq alim, tənqidçi, ədəbiyyatşünas, Azərbaycan Yazıçılar Birliyinin üzvü, filologiya elmləri doktoru, professor Yusif Mirəhməd oğlu Seyidov (1929-2013) Naxçıvan MR Şərur rayonunun Yengicə kəndində anadan olmuşdur.

1939-cu ildə - Azərbaycan Bəstəkarlar İttifaqının İdarə Heyətinin katibi, “Şöhrət” ordeni ilə təltif olunmuş, “Humay” mükafatına layiq görülmüş, xalq artisti, Əməkdar incəsənət xadimi, professor, sənətşünaslıq doktoru, musiqişünas, bəstəkar, pedaqoq, ictimai xadim Ramiz Fərzulla oğlu Zöhrabov Ərdəbil şəhərində anadan olmuşdur.

1945-ci ildə - SSRI rəhbərliyi radionun ictimai-siyasi, mədəni həyatda və faşizmə qarşı mübarizədə oynadığı böyük rolu nəzərə alaraq 1945-ci il mayın 2-də xüsusi qərarla mayın 7-sini Radio günü elan etdi. Həmin gün uzun illər boyu Azərbaycanda da bayram edildi. (1992-ci il noyabrın 6-sı "Azərbaycan Televiziya və Radio işçilərinin peşə bayramı" elan olundu.) 

1992-ci ildə - Türkiyənin baş naziri Süleyman Dəmirəl Azərbaycana ilk səfərə gəlib. Orta Asiya respublikalarına səfərdən sonra Bakıya gələn Dəmirəl burada respublika rəhbərliyi ilə (prezident səlahiyyətlərinin icraçısı Yaqub Məmmədov) görüşmüş, həmçinin Naxçıvana telefon edərək muxtar respublika Ali Məclisinin sədri Heydər Əliyevlə fikir mübadiləsi aparmışdı.

1995-ci ildə - Milli Məclis prezidentin təqdimatına əsasən, baş nazirin müavini Fuad Quliyevi baş nazir vəzifəsinə təsdiq edib. F.Quliyev 1994-cü ilin oktyabrından baş nazir səlahiyyətlərini icra edirdi. 1996-cı ildə səhhətilə bağlı vəzifəsindən istefa verdi və onu bu vəzifədə Artur Rasizadə əvəzlədi. 

1995-ci ildə - Milli Məclisin qərarı ilə yeni Konstitusiya layihəsinin hazırlanması üzrə komissiyanın tərkibi təsdiq edilib. Prezident Heydər Əliyevin sədrlik etdiyi komissiyanın tərkibinə tanınmış ictimai xadimlər, alimlər, hüquqşünaslar daxil oldu.

2003-cü ildə - Prezident Heydər Əliyev faşizm üzərində Qələbənin 58-ci ildönümü münasibətilə amnistiya təşəbbüsü ilə çıxış edib. Amnistiya aktı ümumilikdə 14 min nəfərə şamil edildi, o cümlədən 3400 məhbus azadlığa çıxdı.