982    

05/05/2017

1892-ci ildə - İstiqlal şairi Əhməd Cavad (Cavad Məhəmmədəli oğlu Axundzadə) Şəmkir bölgəsinin Seyfəli kəndində anadan olub. 1918-ci ildə yazdığı “Azərbaycan marşı” şeiri Ü.Hacıbəylinin musiqisi ilə Azərbaycanın himni olmuşdur. Ə.Cavad həmçinin görkəmli filoloq və tərcüməçi (V.Şekspirin «Otello», «Romeo və Cülyetta», S.Rustavelinin «Pələng dərisi geymiş pəhləvan» və s.) olub. 1937-ci ildə antisovet fəaliyyətində ittihamı olunaraq güllələnib.

1908-ci ildə - AMEA-nın həqiqi üzvü, 1959-1961-cı illərdə AMEA-nın Neft Kimya Prosesləri İnstitutunun direktoru, 1965-1975-ci illərdə isə AMEA-nın Kimya Texnologiyasının Nəzəri Problemləri İnstitunun yaradıcısı və direktoru olmuş Murtuza Fətulla oğlu Nağıyev (1908-1975) Aşqabadda anadan olmuşdur. 

1910-cu ildə - Azərbaycanın görkəmli teatr və kino rejissoru, aktyoru, Cənubi Qafqazın ilk SSRİ xalq artisti Adil Rza oğlu İsgəndərov (1910-1978) Gəncədə anadan olub. Milli Dram Teatrının baş rejissoru işləyib, Azərbaycan kinosunda yaddaqalan obrazlar yaradıb, bir sıra filmlərə (“Axırıncı aşırım”, “Əhməd haradadır?” ) quruluş verib, Azərbaycan Mədəniyyət və İncəsənət Universitetinin professoru olub.

1920-ci ildə - Azərbaycan Müvəqqəti İnqilabi Komitəsi respublikada bütün xan, bəy və vəqf torpaqlarının müsadirə olunaraq əvəzi ödənilmədən kəndlilərin istifadəsinə verilməsi barədə qərar qəbul edib. Üstündən bir neçə il ötəndən sonra həmin torpaqlar kəndlilərdən zorla geri alınaraq kolxoz təsərrüfatlarına verildi.

1938-ci il mayın 5-dən iyunun 1-nə qədər - Zaqafqaziya hərbi dairəsi ərazi prinsipi nəzərə alınmadan yenidən quruldu. 

1992-ci ildə - Azərbaycanın Milli Qəhrəmanı, Goranboy özünümüdafiə batalyonunun tərkibində Şəfəq, Zeyvə, Qaraçinar və digər məntəqələrin müdafiəsində fəal iştirak etmiş Fikrət Əli oğlu Hacıyev (1964-1992) şəhid oldu. 

2006-cı ildə - Bakıda İqtisadi Əməkdaşlıq Təşkilatı (ECO) dövlət başçılarının 9-cu sammiti keçirilib. 10 müsəlman ölkəsini birləşdirən ECO 1985-ci ildə Türkiyə, İran və Pakistan tərəfindən təsis edilib, Azərbaycan keçmiş SSRİ-nin müsəlman respublikaları ilə birlikdə 1992-ci ildə quruma üzv olub, son olaraq təşkilata Əfqanıstan qəbul edilib.  

2008-ci ildə - Azərbaycan Respublikasının Əməkdar və Xalq artisti, xanəndə Səfa Hüseyn oğlu Qəhrəmanov (1949-2008) vəfat etmişdir.