1037    

11/05/2017

1915-ci ildə - Məşhur heykəltəraş, xalq rəssamı, iki dəfə "Şərəf nişanı" ilə təltif olunmuş Fuad Həsən oğlu Əbdürrəhmanov (1915-1971) Şəkidə anadan olub. Azərbaycanın mədəniyyət xadimlərinin büst-portretlərini, Füzulinin monumental heykəlini yaradıb.

1917-ci ildə - Moskvada Ümumrusiya müsəlmanlarının 1-ci qurultayında (1-11 may) Məhəmməd Əmin Rəsulzadənin hazırladığı qətnamə layihəsi qəbul olunub. Qətnamədə Rusiyanın demokratik federativ respublikaya çevrilməsi, milli bölgələrə muxtariyyətin verilməsi əksini tapmışdı. İmperiyanın bütün bölgələrini təmsil edən 800-dək nümayəndə iştirak etdiyi qurultayın rəyasət heyətinə azərbaycanlı Əlimərdan bəy Topçubaşov da daxil idi.

1918-ci ildə - Batumda Zaqafqaziya Seymi ilə Osmanlı arasında yeni danışıqlar başlanıb. Zaqafqaziya heyəti tərkibinə Azərbaycandan Məhəmməd Əmin Rəsulzadə və Məmmədhəsən Hacınski daxil idi. Martda Trabzonda nəticəsiz qalmış danışıqların davamı olan Batum konfransının məqsədi tərəflərin qarşılıqlı ərazi bölgüsünü razılaşdırmaq idi. Dünya müharibəsində Almaniyanın müttəfiqi olan Osmanlı almanlarla bolşevik Rusiyası arasında bağlanmış sülhə (Brest-Litovsk) əsasən, Qars, Ərdəhan və Batumu nəzarətə götürmüşdü, həmçinin Axalkələk və Gümrüyə iddia edirdi.

1935-ci ildə - Xalq yazıçısı Maqsud Məmmədibrahim oğlu İbrahimbəyov (1935-2016) Bakıda anadan olub. Mənəvi-əxlaqi problemlərdən bəhs edən povest, hekayə və pyeslərin, ssenarilərinin müəllifidir. 1995, 2000, 2005-ci illərdə Milli Məclisin deputatı seçilib.

2007-ci ildə - Prezident İlham Əliyev Polşanın Krakov şəhərində keçirilən enerji sammitində iştirak edib. Sammitdə Xəzər dənizi-Qara dəniz-Baltik dənizi coğrafiyasını əhatə edən yeni enerji dəhlizinin yaradılması barədə bəyannamə imzalanıb.