1010    

13/05/2017

1920-ci ildə - Sovet Rusiyası ilə Gürcüstan arasında tələsik sülh müqaviləsi bağlandı, Rusiya Gürcüstanın müstəqilliyini tanıdı. Azərbaycan Respublikası ilə Gürcüstan Respublikası arasında fəal silahlı münaqişələr dayandırıldı və sülh bağlanması haqqında danışıqlara başlandı.

1929-cu ildə - Görkəmli şair, Azərbaycan Yazıçılar Birliyinin üzvü, Azərbaycan Jurnalistlər Birliyinin üzvü, “Qabaqcıl maarif xadimi”, “Azərbaycanın Əməkdar incəsənət xadimi” fəxri adlarına layiq görülmüş, adına ədəbiyyat mükafatı təsis edilmiş Hikmət Ziya oğlu Əfəndiyev (1929-1995) Nuxa (indiki Şəki şəhərində) anadan olmuşdur.

1943-cü ildə - Xalq yazıçısı, nasir, dramaturq, tənqidçi, ədəbiyyatşünas, ictimai xadim, Azərbaycan Yazıçılar Birliyinin üzvü, filologiya elmləri doktoru, professor, Azərbaycanın Əməkdar incəsənət xadimi, Azərbaycanın Xalq yazıçısı, “İstiqlal” ordeni ilə təltif olunmuş, Cəfər Cabbarlı mükafatına layiq görülmüş Azərbaycan Respublikası Baş Nazirinin müavini Elçin İlyas oğlu Əfəndiyev Bakıda anadan olub. 

1992-ci ildə - Görkəmli bəstəkar, pedaqoqu, SSRİ Xalq Artisti, 2 dəfə Stalin mükafatı laureatı, Lenin mükafatı laureatı, Sosialist Əməyi Qəhrəmanı, Lenin, Oktyabr İnqilabı və Qırmızı Əmək Bayrağı ordenlərinin laureatı, SSRİ Ali Sovetinin deputatı, AMEA-nın akademiki Qara Əbülfəz oğlu Qarayev (1918-1992) vəfat etmişdir.

1992-ci ildə - Milli təhlükəsizlik naziri İlhüseyn Hüseynov televiziya ilə çıxış edib mövcud böhrandan çıxmaq üçün ölkədə nizam-intizamın möhkəmləndirilməsini, başqa sözlə, diktatura yaradılmasını vacib hesab etdiyini bildirdi. Lakin 3 gün sonra o vəzifəsindən azad edildi və əvəzinə Fəxrəddin Təhməzov Milli təhlükəsizlik naziri təyin edildi.  

1996-cı ildə - Azərbaycan, Gürcüstan, Türkmənistan və Özbəkistan respublikaları arasında tranzit yük daşınmasının tənzimlənməsi sahəsində əməkdaşlıq və dəmiryol nəqliyyatı fəaliyyətinin əlaqələndirilməsi haqqında dördtərəfli Sərəxs (Türkmənistan) sazişləri imzalandı.

2003-cü ildə - Azərbaycan, Qazaxıstan və Rusiya arasında "Xəzər dənizinin dibinin həmhüdud sahələrinin bölgü xətlərinin kəsişmə nöqtəsi haqqında" saziş imzalanıb. Almatıda Xəzərin hüquqi statusu ilə bağlı beştərəfli işçi qrupun iclasında əldə olunan razılaşma dənizin sektorlara bölünməsinə dair Azərbaycan, Rusiya və Qazaxıstan prezidentləri səviyyəsində imzalanmış sazişlərin davamı idi. Sənəddə Azərbaycan və Rusiyanın Xəzərdə 19, Qazaxıstanın 29 faiz payı nəzərdə tutulub. 

2004-cü ildə - Avropa Komissiyasının (Avropa Birliyinin ali icra orqanı) Avropa Qonşuluq Siyasətinə dair strategiya sənədini qəbul etdiyi elan olunub. Sənəddə Azərbaycan, Ermənistan və Gürcüstanın bu siyasətə daxil edilməsi tövsiyə olunub. Həmin tövsiyəyə əsasən, Avropa Birliyinin sammitində (17-18 iyun 2004) üç Cənubi Qafqaz respublikasının qeyd olunan proqrama daxil edilməsi qərara alınıb. Azərbaycan AB ilə "qonşuluq siyasəti" üzrə əməkdaşlıq sazişini 2006-cı ilin noyabrında imzalayıb.

2006-cı ildə - Azərbaycanda 10 seçki dairəsi üzrə təkrar parlament seçkiləri keçirilib. 2005-ci ilin 6 noyabr seçkilərindən sonra həmin dairələrdə səsvermənin nəticələri Mərkəzi Seçki Komissiyası və Konstitusiya Məhkəməsi tərəfindən ləğv olunmuşdu. Təkrar seçkilərdə 10 deputat yerindən 5-ni YAP-ın nümayəndələri, 2-ni müxalifət, 3-nü bitərəf namizədlər qazandı.